ព័ត៌មានជាតិ

គ្រួសារសព១២នាក់ ស្លាប់ដោយពុលស្រា ស នៅស្រុកល្វាឯមទទួលបានអំណោយពីសាខាកាកបាទក្រហម

បានផុស

៥ years មុន

នៅ

ថ្ងៃចន្ទ ២៤ ឧសភា ២០២១

ដោយ

គ្រួសារសពចំនួន១២នាក់ ដែលបានស្លាប់ដោយសារពុលស្រាសបណ្តាលឲ្យស្លាប់ជាបន្តបន្ទាប់ចាប់ពីថ្ងៃទី១០ ដល់ថ្ងៃទី១៩ ខែឧសភា កន្លងទៅថ្មីៗនេះឃុំសារិកាកែវ ស្រុកល្វាឯម ខេត្តកណ្តាលទទួលបានអំណោយមនុស្សធម៌ពីសាខាកាកបាទក្រហមកម្ពុជាខេត្តកណ្តាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ សោភ័ណ្ឌ អភិបាលខេត្តកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត កាលរសៀលថ្ងៃទី២៣ ខែឧសភា ឆ្នាំ២០២១ បានថ្លែងនូវការសោកស្តាយ និងបានចូលរួមរំលែកមរណទុក្ខដល់គ្រួសារសព្វចំពោះការបាត់បង់សមាជិកជាទីស្រឡាញ់ និងសូមឧទ្ទិសនូវមហាកុសលដល់វិញ្ញាណក្ខន្ធសពបានដល់សុគតិភព។

លោកអភិបាលខេត្តបានធ្វើការលើកទឹកចិត្ត និងផ្តាំផ្ញើដល់គ្រួសារសពត្រូវរឹងមាំខិតខំធ្វើការងារ និងរកទទួលទាន ដើម្បីលើកស្ទួយជីវភាពគ្រួសារគ្រប់គ្រងកូនចៅឲ្យបានល្អ ឲ្យកូនៗបានចូលរៀនគ្រប់ៗគ្នា និងត្រូវបន្តរក្សាអនាម័យតាមវិធានសុខាភិបាលដើម្បីជៀសផុតពីជំងឺកូវីដ-១៩។

អំណោយដែលចែកជូនដល់គ្រួសារសព ក្នុងមួយគ្រួសារទទួលបាន៖ អង្ករ៥០គីឡូក្រាម ត្រីខ ១យួរ ទឹកត្រី ១យួរ ទឹកស៊ីអ៊ីវ ១យួរ ប្រេងឆា ១ដប មី ១កេស ទឹកសុទ្ធ ១កេស ទឹកក្រូច ១កេស ជែលលាងដៃ ១ដប ម៉ាស ១០បន្ទះ និងថវិកា៥០ម៉ឺនរៀល ។

គួរបញ្ជាក់ថា ផ្អែកតាមលទ្ធផលមន្ទីរដែលទទួលបានសំណាកស្រាចំនួន៣៨សំណាកក្នុងនោះស្រាថ្នាំចំនួន១៥សំណាក និងស្រាសចំនួន១៣សំណាក ដែលមានសារធាតុមេតាណុលលើសកម្រិតជាង០,៥ភាគរយ មានចំនួន២០សំណាកអាចធ្វើឲ្យពុលខណៈកម្រិតមិនពុលវិញមានមិនលើសពី០,១ភាគរយឡើយ។

ក្រសួងសុខាភិបាលសន្និដ្ឋានថា ហេតុការណ៍ស្លាប់អ្នកភូមិទាំង១២នាក់ខាងលើដោយសារពួកគាត់បានពិសាស្រាស ឬស្រាថ្នាំដែលមានសារធាតុមេតាណុលខ្ពស់ ។

ក្រសួងសុខាភិបាលបានអំពាវនាវដល់បងប្អូនប្រជាពលរដ្ឋបញ្ឈប់ជាបន្ទាន់ការពិសារស្រាសស្រាថ្នាំដែលផលិតដោយមិនមានបច្ចេកទេសត្រឹមត្រូវដែលនាំឲ្យប៉ះពាល់ដល់សុខភាពនឹងឈានដល់ស្លាប់បាត់បង់អាយុជីវិតថែមទៀតផង៕

អត្ថបទ ៖ សំអឿន