លោក​ ហេង វ៉ាន់ដា៖ បើ​សាលា​បន្ត​បិទទ្វារ តទៅ​មុខ​អាច​ជម្រុះបុគ្គលិក ឈាន​ទៅបិទ​ទ្វារសាលាតែម្តង

ភ្នំពេញ៖ វិស័យឯកជនគ្រោងដាក់សំណើ ទៅក្រសួងអប់រំយុវជននិងកីឡា សុំបើកដំណើរការសាលារៀនឡើងវិញឱ្យបានឆាប់ ដើម្បីជួយសង្គ្រោះដល់គ្រឹះស្ថានអប់រំផ្នែកឯកជននៅទូទាំងប្រទេស ចៀសវាងកុំឱ្យគ្រឹះស្ថានឯកជនទាំងនោះប្រឈមនឹងការបិទទ្វារ ដោយសារវិបត្តិជំងឺកូវីដ‑១៩។

លោក ហេង វ៉ាន់ដា ប្រធានក្រុមការងារ ដ(១១) វិស័យអប់រំ នៃវេទិការាជរដ្ឋាភិបាល-ផ្នែកឯកជន មានប្រសាសន៍នៅព្រឹកនេះថា ក្រុមការងារនឹងដាក់សំណើរទៅក្រសួងអប់រំនៅល្ងាចនេះ ដើម្បីស្នើបើកគ្រឹះស្ថានអប់រំឯកជនឡើងវិញយ៉ាងយូរនៅខែកក្កដាឆ្នាំ២០២១ខាងមុខនេះ ដោយសិក្សាឆ្លាស់គ្នាពាក់កណ្តាលនៅសាលា និងពាក់កណ្តាលទៀតរៀននៅតាមផ្ទះ។

ការស្នើសុំបើកសាលាឯកជនឡើងវិញនេះ ដោយសារបច្ចុប្បន្នបុគ្គលិកអប់រំ និងគ្រូនៅតាមសាលាបានចាក់វ៉ាក់សាំងរួចរាល់ហើយ ពិសេសនៅរាជធានីភ្នំពេញនៅសល់តាមបណ្តាខេត្តមួយចំនួនប៉ុណ្ណោះ ដើម្បី​ជួយ​​សង្រ្គោះ​ដល់គ្រឹះស្ថានឯកជន ដែលកំពុងជួបវិបត្តិហិរញ្ញវត្ថុយ៉ាងធ្ងន់ធ្ងរ ដោយសារតែវិបត្តិជំងឺកូវីដ‑១៩។

លោកបានបញ្ជាក់​ថា ប្រសិនបើមិនបើកសាលារៀនឡើងវិញទេនោះ គ្រឹះស្ថានឯកជននឹងត្រូវកាត់បន្ថយបុគ្គលិកដោយសារគ្មានថវិកាបើកប្រាក់ខែឱ្យពួកគេ ដោយសារមិនមានប្រាក់ចំណូល ហើយអាចនឹងឈានដល់បិទទ្វារផងដែរ។

«សាលាឯកជនបានទទួលរងគ្រោះធ្ងន់ធ្ងរណាស់ហើយ​រឿងកូវីដ‑១៩នេះ តាំងពីឆ្នាំ២០២០ បន្តរហូតដល់ព្រឹត្តិការណ៍សហគមន៍២០កម្ភៈនេះ។ បើ​បន្ត​អូស​បន្លាយ​ទៅ​មុខ​ទៀត សាលាមិនអាច​បើក​ឡើង​វិញ​ឆាប់ៗ​នោះទេ​គឺ​មិនអាចទប់ជាប់នោះ​ទេ ព្រោះការរំពឹងរៀនតែនៅតាម​អនឡាញ​ដែលមាន៣០ទៅ៤០ភាគរយ មិនអាចយកមកទប់ទល់នឹងការចំណាយ​លើ​បុគ្គលិក និងចំណាយផ្សេងៗបាន​ទេ»។

លោកបានបន្ថែមថា ក្នុងករណីមានកូវីដឆ្លងក្នុងថ្នាក់ណាមួយ ស្នើបិទថ្នាក់នោះនិងដាក់ឱ្យសិស្សធ្វើចត្តាឡីស័ក ជាជាងបិទគ្រឹះស្ថានទាំងស្រុង ធ្វើឱ្យប៉ះពាល់ដល់សេដ្ឋកិច្ចសាលាខ្លាំងណាស់។

ក្រុមការងារសំណូមពរ​ឱ្យក្រសួងអប់រំកំណត់ថ្ងៃប្រឡងបាក់ឌុបជាតិឱ្យបានច្បាស់លាស់។ ជាមួយ​គ្នា​នេះ ស្នើសុំធនាគារជាតិបន្ថយអត្រាការប្រាក់ ពិសេសស្នើបន្ថយអត្រាការប្រាក់កាតព្វកិច្ច ចំពោះធនាគារឯកជន ដើម្បីឲ្យធនាគារឯកជនមានលទ្ធភាពបន្ថយអត្រាការប្រាក់មកដល់គ្រឹះស្ថានអប់រំឯកជន។ ស្នើសុំផ្អាកការបង់ បសស តែសុំឲ្យផ្តល់អត្ថប្រយោជន៍ដល់បុគ្គលិកដដែលនិងស្នើផ្អាកការបង់ពន្ធលើប្រាក់បៀវត្ស និងពន្ធអចលនទ្រព្យរហូតដល់ស្ថានភាពជាប្រក្រតី នូវដំណើរការគ្រឹះស្ថានអប់រំ ឯកជនឡើងវិញ។

យ៉ាងណាលោក​បានបញ្ជាក់ថា សំណើសុំមួយចំនួនខាងលើនេះ មិនអាចជួយគ្រឹះស្ថានអប់រំឯកជន ឲ្យរួចផុតពីព្យុះនេះបានទេ គឺមានតែម្យ៉ាងគត់ ត្រូវតែបើកគ្រឹះស្ថានឡើងវិញ៕

អត្ថបទ៖​ សំអឿន