អាជ្ញាធរខេត្តកំពង់ចាម បន្តចុះចែកអំណោយជូនពលរដ្ឋខ្វះខាត៩១៩គ្រួសា ក្នុងស្រុកកងមាស

លោក ហាន កុសល អភិបាលរងខេត្ត តំណាងដ៍ខ្ពង់ខ្ពស់ ឯកឧត្តម អ៊ុន ចាន់ដា អភិបាលខេត្តកំពង់ចាម បានចុះសំណេះ​សំណាល និងចែកអំណោយរបស់ សមាគមសាសនាចក្រព្រះយាស៊ូគ្រឹះ នៃពួកបរិស័ទថ្ងៃចុងក្រោយ តាមរយៈ រដ្ឋបាលខេត្តកំពង់ចាម ទៅចែកអំណោយជូនដល់ប្រជាពលរដ្ឋខ្វះខាត និងរងគ្រោះដោយសារការឆ្លងជំងឺកូវីដ១៩ ចំនួន ៩១៩គ្រួសារ ក្នុងស្រុកកងមាស ខេត្តកំពង់ចាម ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹក ថ្ងៃទី ១៤ ខែកក្កដា ឆ្នាំ ២០២១ លោក ហាន កុសល អភិបាលរងខេត្ត កំពង់ចាម បានពាំនាំនូវប្រសាសន៍សួរសុខទុក្ខ ពីសំណាក់ ឯកឧត្តម អ៊ុន ចាន់ដា អភិបាល ខេត្តកំពង់ចាម ដោយធ្វើការក្រើនរំលឹកដល់បងប្អូនប្រជាពលរដ្ឋ ក្នុងស្រុកកងមាស ឲ្យបង្កើនការថែទាំ អនាម័យសុខភាព ការពារសុវត្ថិភាពផ្ទាល់ ក៏ដូចជា ជាមួយក្រុមគ្រួសារ និងសហការជាមួយអាជ្ញាធរ ក្នុងការចូលរួមទប់ស្កាត់ ការឆ្លងរីករាលដាល នៃជម្ងឺកូវីដ ១៩ ។

ជាងនេះទៅទៀតនោះ លោកអភិបាលរងខេត្ត ក៏បានអំពាវនាវ ដល់ពលរដ្ឋទាំងអស់ សូមបន្តអនុវត្តឱ្យបានម៉ឺងម៉ាត់នូវវិធានការសុខាភិបាល «៣ការពារ និង ៣កុំ» ជាពិសេស ការអនុវត្តន៍កាតព្វកិច្ចពាក់ម៉ាស់ ការលាងសម្អាតដៃជាមួយសាប៊ូ អាល់កុល ឬជែលឲ្យបានញឹកញាប់ និងកាតព្វកិច្ចរក្សាគម្លាតសុវត្ថិភាពបុគ្គល ស្របតាមសេចក្តីជូនដំណឹងរបស់ក្រសួងសុខាភិបាល ក្នុងអំឡុងពេល នៃការឆ្លងរាលដាល នៃវីរុសកូវីដ ១៩ បម្លែងថ្មី កុំឲ្យឆ្លងរីករាលដាលចូលក្នុងសហគមន៍យើង ។

នាឱឝាសនោះ លោកអភិបាលរងខេត្ត និងក្រុមការងារ បាននាំអំណោយរបស់រដ្ឋបាល ខេត្តកំពង់ចាម ចែកជូនប្រជាពលរដ្ឋទាំង ៩១៩គ្រួសារ ដោយក្នុង ១គ្រួសារៗ ទទួលបាន ៖ អង្ករ ២៥គីឡូក្រាម មី ១កេស ទឹកត្រី ១យួរ ទឹកស៊ីអ៊ីវ ១យួរ និងត្រីខ ១យួរ ៕

អត្ថបទ ៖ ហុង ម៉េងហៀ