ព័ត៌មានជាតិ

បុរសរត់កង់បីម្នាក់ បានដេកស្លាប់បង្កការភ្ញាក់ផ្អើលទាំងព្រឹក

បានផុស

៥ years មុន

នៅ

ថ្ងៃពុធ ២១ កក្កដា ២០២១

ដោយ

បុរសជាអ្នករត់កង់បីម្នាក់ បានស្លាប់នៅលើម៉ូតូកង់បីរបស់ខ្លួន ដែលចតនៅមុខមន្ទីរពេទ្យបង្អែកខេត្ត ឋិតក្នុងសង្កាត់ចំការសំរោង ក្រុងបាត់ដំបង ដោយមិនដឹងមូលហេតុ នៅព្រឹកថ្ងៃទី២១ ខែកក្កដា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមសាក្សី ដែលស្និតជាមួយជនរងគ្រោះបានចេញមុខមកបញ្ជាក់ថា មុនកើតហេតុជនរងគ្រោះមានឈ្មោះ ផន ចិន្តា ភេទប្រុស អាយុ៣៧ឆ្នាំ មានមុខរបររត់”ផាសអាប់”រស់នៅបណ្តោះអាសន្ននៅក្នុងភូមិទួលតាឯក សង្កាត់ទួលតាឯក ក្រុងបាត់ដំបង តែងមានជំងឺប្រចាំកាយច្រើនមុខ មានដូចជាជំងឺក្រិនថ្លើម និងជំងឺទឹកនោមផ្អែមជាដើម។

ប្រភពដដែលបន្តថា ដោយសារសភាពជំងឺធ្វើទុក្ខខ្លាំងកាលពីថ្ងៃទី២០ ខែកក្កដាកន្លងមកបានពឹងពាក់ខ្លួនឲ្យជូនទៅរកគ្រូខ្មែរនៅឯស្រុកសំឡូត ដើម្បីព្យាបាលរោគដោយខ្លួនជាអ្នកបើកម៉ូតូ រីឯជនរងគ្រោះអង្គុយផងនិងដេកផងនៅផ្នែកខាងក្រោយ លុះដល់ពាក់កណ្តាលផ្លូវចំណុចវាលចម្បាំងគាត់បាននិយាយសាកសួរទៅរកអ្នកជំងឺ តែគាត់មិនតបតស្ងាត់មាត់ឈឹងលែងឆ្លងឆ្លើយរហូតគាត់មិនអស់ចិត្ត ខ្លួនក៏ឈប់ម៉ូតូកង់បី ដើម្បីសួរនាំពីអាការរោគទើបដឹងថា ជនរងគ្រោះបានស្លាប់បាត់ទៅហើយ។

ប្រភពខាងលើបានប្រាប់បន្ថែមថា នៅថ្ងៃដដែលក្រោយពេលដែលខ្លួនបានដឹងថា ជនរងគ្រោះស្លាប់ខ្លួនក៏បានដឹកវិលត្រឡប់បកក្រោយមកខេត្តវិញទាំងមិនបានដឹងថា ជនរងគ្រោះមានទីលំនៅនៅឯណាផងហើយក៏សម្រេចចិត្តដឹកសាកសពមកទុកនៅចំណតម៉ូតូរបស់គាត់នៅមុខមន្ទីរពេទ្យបង្អែកខេត្តបាត់ដំបង នៅព្រលប់ថ្ងៃទី២០ ខែកក្កដា ឆ្នាំ២០២១ ហើយទុកចោលរហូតដល់ព្រឹកឡើងថ្ងៃទី២១ ទើបមានការភ្ញាក់ផ្អើលដល់អ្នកធ្វើដំណើរជិតខាងមកមើលតែម្តង។

ករណីនេះ ក្រោយពេលដែលសមត្ថកិច្ចជំនាញចុះទៅពិនិត្យលើសាកសពសមត្ថកិច្ចជំនាញបានបញ្ជាក់ថា ជនរងគ្រោះពិតជាស្លាប់ដោយសារជំងឺប្រចាំកាយកម្រិតធ្ងន់ធ្ងរប្រាកដមែន រួចប្រគល់សាកសពទៅឲ្យសាច់ញាតិយកទៅធ្វើកិច្ចតាមបែបសាសនានិ ងបូជានៅក្នុងវត្តបច្ឆាក្រុងបាត់ដំបងតែម្តង៕

អត្ថបទ៖ សៅ សារិទ្ធ