អាយុ ៨ ឆ្នាំ លោក​ព្រឿង ឈៀង ចូល​សិល្បៈ ពេល​​តាម​ជីដូន​​ទៅហាត់​​របាំ​ក្នុងវាំង

ដោយមានជីដូនឈ្មោះ ម៉ម យឹមយ៉ាន ជាគ្រូធំបង្ហាត់របាំព្រះរាជទ្រព្យ តាមដង្ហែព្រះមហាក្សត្រីយ៉ានីកុសុមៈនារីរ័ត្ន សេរីវឌ្ឍនា​ ព្រះមាតាសិល្បៈខ្មែរ លោកសាស្ត្រាចារ្យព្រឿង ឈៀង ត្រូវបានជីដូន​ឧស្សាហ៍នាំទៅមើលគេហាត់សមរបាំ តាំងពីអាយុ៤ឆ្នាំ ធ្វើឲ្យលោកមានចំណាប់អារម្មណ៍លើតួស្វា គួបផ្សំនឹងនិស្ស័យពីកំណើត​ផង លោកក៏បានចាប់ផ្ដើមចូលសិល្បៈពេញសិទ្ធិនៅអាយុ៨ឆ្នាំ ព្រមទាំងមានឱកាសចេញសម្ដែងនៅក្រៅប្រទេសក្នុងអាយុ៩ឆ្នាំទៀតផង។

នៅក្នុងកិច្ចពិភាក្សាពិសេស ក្នុង​តួនាទី​ជា​គណៈកម្មការវាយតម្លៃក្នុងកម្មវិធីវង់តន្ត្រីខ្មែររដូវកាលទី២ កាលពីថ្ងៃទី២៦ ខែឧសភា ឆ្នាំ ២០២១ កន្លងទៅ ឯកឧត្តមសាស្រ្តាចារ្យ ព្រឿង ឈៀង បានមានប្រសាសន៍ថា «សិល្បៈជាព្រលឹង និងអត្តសញ្ញាណជាតិ។ ជំនឿ និងសាសនាជាមូលដ្ឋានគ្រឹះនៃសិល្បៈវប្បធម៌ខ្មែរ។ យើងអភិរក្ស ដើម្បីអភិវឌ្ឍ យើងអភិវឌ្ឍក្នុងស្មារតីអភិរក្ស។ បើទោះបីជាយើងអភិវឌ្ឍសិល្បៈតាមកាលៈទេសៈមែន តែការវិវត្តនេះត្រូវឈរលើអត្តសញ្ញាណជាតិ»។

ក្នុងនាមជាអតីតនាដកផ្នែករបាំព្រះរាជទ្រព្យ និងមានជំនាញឯកទេសខាងរបាំប្រជាប្រិយ និងល្ខោនខោល លោកគ្រូក៏បានសង្កត់ធ្ងន់ដែរថា «កាតព្វកិច្ចរបស់មនុស្សជំនាន់ក្រោយ ដើម្បី​ការពារ និងលើកស្ទួយសិល្បៈមាន៣ គឺចូលរួមអភិរក្ស ចូលរួមអភិវឌ្ឍ និងចូលរួមទទួលខុសត្រូវ»។

លោកសាស្រ្តាចារ្យ ព្រឿង ឈៀង គឺជាទីប្រឹក្សាក្រសួងវប្បធម៌ និងវិចិត្រសិល្បៈ ហើយកាលពីថ្មីៗនេះ លោកក៏​ត្រូវ​បាន​ជ្រើសរើស​ជាគណៈកម្មការមួយរូប ក្នុងកម្មវិធីវង់តន្ត្រីខ្មែរ រដូវកាលទី២។

គណៈកម្មការមេប្រយោគរូបនេះ ក៏បានចែករំលែកនូវអនុសាសន៍សម្រាប់អ្នកមានបំណងចូលរួមប្រឡងក្នុងវិញ្ញាសារបាំ ឬល្ខោនផងដែរថា ដើម្បីទទួលបានពិន្ទុល្អ ត្រូវមានលក្ខណសម្បត្តិ៣យ៉ាង គឺទីមួយ ល្អមើល (សម្លៀកបំពាក់សមរម្យត្រឹមត្រូវ មានអលង្ការ យកអវៈយវៈដងខ្លួនជាឧបករណ៍ ចលនាជាមធ្យោបាយ រាំមានជួរ ក្រឡា ស្រុះគ្នា មានមនោសញ្ចេតនាក្នុងខ្លួន ទើបមានសោភ័ណ), ទីពីរ ពីរោះត្រចៀក និងទីបី ល្អគិត។

គួរបញ្ជាក់ថា កម្មវិធីវង់តន្ត្រីខ្មែរ ផ្ដួចផ្ដើមបង្កើតឡើង ដោយសហភាពសហព័ន្ធយុវជនកម្ពុជា ខេត្តស្វាយរៀង គាំទ្រដោយក្រសួងវប្បធម៌ និងវិចិត្រសិល្បៈ និងសមាគមមិត្តតន្រ្តីករ ដែលបានបើកឱកាសស្វាគមន៍ដល់អ្នកស្នេហាវិស័យសិល្បៈបុរាណខ្មែរគ្រប់ទម្រង់ បញ្ចេញនូវទេពកោសល្យរបស់ខ្លួន ក្នុងវិញ្ញាសា «សិល្បៈបុរាណចម្រុះ»៕