ព័ត៌មានជាតិ
តុលាការសម្រេចឃុំខ្លួនស្ត្រីម្នាក់ ក្នុងសំណុំរឿងឆបោកប្រាក់ ៧០ម៉ឺនដុល្លារ
កម្លាំងទីបញ្ជាការកងរាជអាវុធហត្ថខេត្តបាត់ដំបង បានឲ្យដឹងនៅថ្ងៃទី២០ ខែកញ្ញាថា ស្ត្រីជាអាជីវករវ័យចំណាស់ម្នាក់ ត្រូវបានកម្លាំងសមត្ថកិច្ច ចុះអនុវត្តតាមដីកាបញ្ជាឲ្យចូលខ្លួន ពីបទឆបោកលុយចំនួន ៧០ម៉ឺនដុល្លារក្រោយបញ្ជប់ការសាកសួររយ:ពេល៣ថ្ងៃ ត្រូវបានតំណាងអយ្យកាអម សាលាដំបូងខេត្តបាត់ដំបង សម្រេចបញ្ជូនទៅឃុំខ្លួនជាស្ថាពរហើយ កាលពីរសៀលថ្ងៃទី១៨ ខែកញ្ញា ឆ្នាំ២០២១កន្លងមកនេះ។
ការនាំខ្លួនស្ត្រីជនសង្ស័យរូបនេះ បានធ្វើឡើងកាលពីថ្ងៃទី១៥ ខែកញ្ញា ឆ្នាំ២០២១ ដោយអនុវត្តតាមដីកាឲ្យចូលខ្លួនរបស់តំណាងអយ្យការអម សាលាដំបូងខេត្តបាត់ដំបង បន្ទាប់ពីស្ត្រីរូបនេះមិនព្រមទទួលដីកា និងមិនចូលឆ្លើយបំភ្លឺ ១លើក ជា ២លើក តាមពាក្យបណ្តឹងរបស់ដើមបណ្តឹងឈ្មោះ សរ សុវណ្ណារ៉ា រស់នៅក្នុងភូមិកាប់គោថ្មី សង្កាត់អូរចា ក្រុងបាត់ដំបង ខេត្តបាត់ដំបងដូចគ្នា។
បើយោងតាមពាក្យបណ្ដឹង របស់ឈ្មោះ សរ សុវណ្ណារ៉ា បានចោទប្រកាន់ស្ត្រីខាងលើនេះ បាននិយាយបញ្ចុះបញ្ចូលដោយកុហកខ្លួនថា ខ្លួនមានក្មួយស្រីឈ្មោះ ជិន ស្រីម៉ិច និង ជិន ស្រីម៉ី ដែលពួកគេដេញថ្លៃបាន ក្នុងការដឹកជញ្ជូនស៊ីម៉ង់ត៍ ពីក្រុមហ៊ុនជីបម៉ុង។
ខ្លឹមសារ នៃពាក្យបណ្តឹងបន្តថា ស្ត្រីជាអាជីវករខាងលើ (ជនសង្ស័យ) បាននិយាយថា បើសិនជាគាត់ (ជនរងគ្រោះ) ចាប់អារម្មណ៍អ្នកស្រីមានបុងលក់ជូន ដើម្បីបានសិទ្ធិក្នុងការដឹកជញ្ជូនទំនិញខាងលើនេះ ដោយបុងមួយលក់ក្នុងតម្លៃ ១៤០៤ដុល្លារ បើឈ្មោះ សរ សុវណ្ណារ៉ា ទិញគឺមួយបុងចំណេញលុយ បានចំនួន៣៥ដុល្លារ គឺរៀងរាល់រយ:ពេល ១៥ថ្ងៃទូទាត់បើកលុយម្តង។ ក្រោយពីស្តាប់ និងពិចារណារួចរាល់គាត់ (សរ សុវណ្ណារ៉ា ជាជនរងគ្រោះ) បានយល់ព្រមទិញបុងទាំងនោះ ដោយចាប់ផ្តើមគិតទិញ ចាប់ពីថ្ងៃទី១៤ ខែកុម្ភ: ឆ្នាំ២០១៩ រហូតថ្ងៃទី២ខែមីនា ឆ្នាំ២០២១កន្លង ទៅហើយបុងដែលគាត់ (ជនរងគ្រោះ) ទិញបានសរុបចំនួន៥០០បុង ស្មើនឹងតម្លៃ៧០២០០០ ដុល្លារអាមេរិក។
ប៉ុន្តែសាច់ប្រាក់ដែលខ្លួនចំណាយ ក្នុងការទិញបុងត្រឹមតែសាច់ប្រាក់ចំនួន ៤១៧ ៨៧៥ដុល្លារប៉ុណ្ណោះ។ ចំណែកឯទឹកប្រាក់ ដែលចំណេញចំនួន ២៨៤១២៥ដុល្លារ លោកមិនបានបើកយកមកទុកឡើយ ដោយបានផ្ទេរទៅទិញបុងបន្ថែមទៀត រហូតដល់គ្រប់ចំនួន៥០០បុង។
ក្រោយមកនៅអំឡុងខែមេសា ឆ្នាំ២០២១ ឈ្មោះ សរ សុវណ្ណារ៉ា បានយកបុងខាងលើ ទៅទូទាត់បើកប្រាក់ជាមួយក្រុមហ៊ុន ជីប ម៉ុង។ ប៉ុន្តែខាងភាគីក្រុមហ៊ុនអះអាងថា បុងខាងលើនេះ គឺជាបុងហ្វូតូកូពី ព្រោះលេខមុខទំនិញ មានលេខរៀងដូចគ្នាដដែលៗ។ ពេលនោះទើបឈ្មោះ សរ សុវណ្ណារ៉ា (ជនរងគ្រោះ) បានដឹងថា រូបខ្លួនចាញ់បោកគេហើយដោយជនឆបោក បានយកបុងដែលខ្លួនបានទូទាត់ម្តងរួចហើយ មកហ្វូតូកូពីរួចលក់ឲ្យរូបលោកម្តងទៀត ធ្វើឲ្យគាត់កើតទុកមិនសុខចិត្ត បានចូលដាក់ពាក្យបណ្តឹង ដល់សាលាដំបូងខេត្តបាត់ដំបងតែម្តង ដើម្បីឲ្យប្រព័ន្ធច្បាប់ជួយរកយុត្តិធម៌។ ប្រភពដដែលខាងលើថា ករណីខាងលើស្ត្រី ជាជនល្មើសមានឈ្មោះ គុម្ព វង់ម្នី ជាអាជីវករ មានទីលំនៅក្នុងភូមិកាប់គោ សង្កាត់អូរចារ ក្រុងបាត់ដំបង ដែលអាចប្រឈមនឹងជាប់ពន្ធនាគាពី១ ដល់ ៣ឆ្នាំ៕
អត្ថបទ៖ សៅ សារិទ្ធ
-
ព័ត៌មានជាតិ៥ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៣ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៣ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ព័ត៌មានជាតិ៤ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ជីវិតកម្សាន្ដ១ សប្តាហ៍ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សេដ្ឋកិច្ច៤ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៤ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សន្តិសុខសង្គម៣ ថ្ងៃ ago
បឋម៖ អគ្គិភ័យកំពុងឆេះផ្ទះពលរដ្ឋក្នុងបុរីពិភពថ្មីកំបូល