ក្រសួងសេដ្ឋកិច្ច ប្រកាសជ្រើសរើសមន្ត្រី ក្របខណ្ឌគយចំនួន ៥០នាក់

ក្រសួងសេដ្ឋកិច្ច និងហិរញ្ញវត្ថុ បានប្រកាសជ្រើសរើសមន្ត្រីក្របខណ្ឌគយចំនួន ៥០នាក់ ដើម្បីប្រឡងប្រជែងចូលបម្រើការងារ នៅអគ្គនាយកដ្ឋានគយ និងរដ្ឋាករកម្ពុជា។

យោងតាមសេចក្តីជូនដំណឹង របស់ក្រសួងសេដ្ឋកិច្ច និងហិរញ្ញវត្ថុ ចុះថ្ងៃទី២៨ ខែកញ្ញានេះ បានឲ្យដឹងថាក្រសួង នឹងរៀបចំការប្រឡងជ្រើសរើសបេក្ខជន ជាមន្ត្រីរាជការទាំងពីរភេទចំនួន ៥០នាក់ប្រភេទក្របខណ្ឌ “ក” ចំនួន ៣០រូប និង “ខ” ចំនួន ២០រូប ឲ្យចូលបប្រើការងារ នៅអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ តាមតារាងបែងចែក ក្របខណ្ឌ និងលក្ខខណ្ឌកំណត់ដូចខាងក្រោម។

ក្នុងនោះក្របខណ្ឌ “ក”បេក្ខជនជាមន្ត្រីរាជការ ត្រូវមានអតីតភាពយ៉ាងតិច ៣ឆ្នាំ បន្ទាប់ពីការតាំងស៊ប់ ក្នុងក្របខណ្ឌ ឬតាមការ កំណត់ដោយឡែកណាមួយ របស់ក្រសួង-ស្ថាប័នសាមីរបស់បេក្ខជន។ មានកម្រិតបណ្តុះបណ្តាល សញ្ញាបត្របរិញ្ញាបត្រ ឬសញ្ញាបត្រ មានតម្លៃសមមូលឡើងទៅ។

ចំពោះក្របខណ្ឌ “ខ” វិញបេក្ខជនជាមន្ដ្រីរាជ ត្រូវមានអតីតភាពយ៉ាងតិច ៣ឆ្នាំ បន្ទាប់ពីការតាំងស៊ប់ក្នុងក្របខណ្ឌ ឬកំណត់ដោយឡែកណាមួយរបស់ក្រសួង-ស្ថាប័នសាមីរបស់បេក្ខជន។ មានកម្រិតបណ្តុះបណ្តាលសញ្ញាបត្របរិញ្ញាបត្ររង ឬសញ្ញាបត្រ ដែលមានតម្លៃសមមូលឡើងទៅ។

សេចក្តីជួនដំណឹងដដែល បានបន្តថា បេក្ខជនដែលត្រូវបានជ្រើសរើស ចូលបម្រើការងារ នៅក្រសួងសេដ្ឋកិច្ចនិងហិរញ្ញវត្ថុ ត្រូវបំពេញការងារយ៉ាងតិចចំនួន ៣ឆ្នាំ នៅកន្លែងការងារ ដែលសាមីជនបានជ្រើសរើស នៅពេលប្រឡង ទើបមានសិទ្ធិអាចសុំផ្លាស់ប្ដូរកន្លែងការងារ។

ចំពោះការដាក់ពាក្យសុំចូលរួមប្រឡង តាមរយៈប្រព័ន្ធ Online ដែលអាចរកបានតាមរយៈទំព័រនាយកដ្ឋានបុគ្គលិក​នៃក្រសួងសេដ្ឋកិច្ច និងហិរញ្ញវត្ថុ www.pd.mef.gov.kh គេហៈទំព័រអគ្គនាយកដ្ឋានគយ និងរដ្ឋាករកម្ពុជា WWW.customs. gov.kh ឬ គេហទំព័រវិទ្យាស្ថានសេដ្ឋកិច្ច និងដើរញ្ញវដូ www.efi. mef gov. kh និងត្រូវដាក់ពាក្យនៅនាយកដ្ឋានបុគ្គលិក នៃអគ្គលេខាធិការដ្ឋាន កសហវ, អគ្គនាយកដ្ឋានគយ និងរដ្ឋាករកម្ពុជា និងវិទ្យាស្ថានសេដ្ឋកិច្ច និងហិរញ្ញវត្ថុ រៀងរាល់ម៉ោងធ្វើការចាប់ពីថ្ងៃទី១ ខែតុលា ឆ្នាំ២០២១ ដល់ថ្ងៃទី៣១ ខែធ្នូ ឆ្នាំ២០២១។

ចំពោះកាលបរិច្ឆេទប្រឡង មណ្ឌលប្រឡង និងបញ្ជីរាយនាមបេក្ខជន គណៈកម្មការរៀបចំការប្រឡង និងបិទផ្សាយនៅនាយដ្ឋានបុគ្គលិក នៃអគ្គលេខាធិការដ្ឋាន ក្រសួងសេដ្ឋកិច្ចនិងហិរញ្ញវ, អគ្គនាយកដ្ឋនាគយនិងរដ្ឋាករកម្ពុជា និងវិទ្យាស្ថានសេដ្ឋកិច្ច និងហិរញ្ញវត្ថុ ឬបេក្ខជន អាចទទួលចូលព័ត៌មាន តាមគេហទំព័រខាងលើ៕

អត្ថបទ៖ សំអឿន