ព័ត៌មានជាតិ

ខេត្តកោះកុង ម្ខាងជាប់សមុទ្រ ម្ខាងព្រៃឈើក្រំថ្ម គឺជាឋានសួគ៌អ្នកទេសចរពនេចរ

បានផុស

៥ years មុន

នៅ

ថ្ងៃពុធ ៣ វិច្ឆិកា ២០២១

ដោយ

ក្នុងចំណោមខេត្តជាប់សមុទ្រទាំង ៤ ខេត្តកោះកុងគឺជាឋានសួគ៌សម្រាប់អ្នកស្រលាញ់ចូលចិត្តធម្មជាតិ។ គ្របដណ្តប់ដោយព្រៃឈើយ៉ាងក្រាស់ និងជាខេត្តមានឆ្នេរសមុទ្រវែងជាងគេ រួមទាំងមានកោះ ឆ្នេរ ដៃព្រែក ស្ទឹង អូរ និងជីវៈចម្រុះសំបូរបែបយ៉ាងច្រើនអនេក។

សក្តាពលនៃខេត្តកោះកុង ធ្វើឲ្យខេត្តភាគនីរតីនេះជាគោលដៅទេសចរណ៍ធម្មជាតិលេខ ១ របស់ប្រទេសកម្ពុជា។ កម្ពុជាថ្មីសូមណែនាំពីតំបន់ទេសចរណ៍សក្តានុពលតាមបណ្តាស្រុកនានាក្នុងខេត្តកោះកុង៖

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក/ ក្រុងខេមរភូមិន្ទ

រមណីយដ្ឋានទឹកធ្លាក់សិលាមានជ័យ ជារមណីយដ្ឋានធម្មជាតិនៅជិតទីរួមខេត្ត តាមផ្លូវឆ្ពោះទៅខេត្តពោធិ៍សាត់។ ភ្ញៀវទេសចរពីចម្ងាយមិនសូវបានស្គាល់តំបន់ទឹកធ្លាក់នេះច្រើនទេ ភាគច្រើនជាអ្នកស្រុកកោះកុងដែលតែងតែមកលេងជាហូហែរ។

ខ/ ស្រុកមណ្ឌលសីមា

-ឆ្នេរប៉ាក់ខ្លង ជាទីកម្សាន្តដ៏ពេញនិយមបំផុតនៅខេត្តកោះកុង ហើយក៏នៅមិនឆ្ងាយពីក្រុងខេមរភូមិន្ទ។ មានឆ្នេរខ្សាច់សស្អាត ខ្យល់ធម្មជាតិស្រឡះល្អ ហើយភ្ញៀវទេសចរណ៍មកលេងខេត្តកោះកុងភាគច្រើនមិនសូវរំលងនោះទេ។

-កោះកុងរីសត ជារមណីយដ្ឋានកែច្នៃ ដែលវិនិយោគដោយវិស័យឯកជន ដែលមានកាស៊ីណូ សណ្ឋាគារ និងសេវាកម្សាន្តផ្សេងៗទៀត ស្ថិតនៅកៀកច្រកព្រំដែនអន្តរជាតិចាំយាម។

-ទឹកធ្លាក់តាចាត មានទីតាំងស្ថិតនៅក្នុងភូមិទួលគគីរ ឃុំទួលគគីរ ស្រុកមណ្ឌលសីមា ដែលមានចំងាយប្រមាណជា ២៥ គីឡូម៉ែត្រពីទីរួមខេត្តកោះកុង។ នៅទីនេះមានសក្តានុពលទេសចរណ៍សំខាន់ៗដូចជាប្រភពទឹកធ្លាក់ធម្មជាតិ ផ្ទាំងថ្ម សម្រាប់ងូតទឹកកម្សាន្ត និងលំហែរអារម្មណ៍។

-រមណីយដ្ឋានចេតិយឃុនឆាង ឃុនផែន ជារមណីយដ្ឋានវប្បធម៌ប្រវត្តិសាស្ត្រ ស្ថិតត្រើយខាងលិចនៃដៃសមុទ្រ ជាកន្លែងដែលភ្ញៀវទេសចរចង់ដឹងចង់ស្គាល់ នៅពេលបានធ្វើដំណើរឆ្លងកាត់ខេត្តកោះកុង។

គ/ ស្រុកគីរីសាគរ

-រមណីយដ្ឋានតារាសាគរ មានចម្ងាយជាង ១៥០ គីឡូម៉ែត្រ ស្ថិតនៅភូមិកោះស្តេច ឃុំកោះស្តេច ស្រុកគីរីសាគរ កំពុងត្រូវបានអភិវឌ្ឍជារមណីយដ្ឋានទេសចរណ៍រដ៏ទាក់ទាញបំផុតនៅតំបន់អាស៊ីអាគ្នេយ៍ ដែលមានការសាងសង់ព្រលានយន្តហោះ សណ្ឋាគារ កាស៊ីណូ កន្លែងកម្សាន្តជាច្រើនទៀត ដែលបម្រើដល់ទេសចរជាតិនិងអន្តរជាតិ។

ឃ/ ស្រុកស្រែអំបិល

-រមណីយដ្ឋានឆ្នេរនេសាទ មានចម្ងាយជិតជាងគេបើធ្វើដំណើរពីរាជធានីភ្នំពេញស្ថិតនៅភូមិនេសាទ ឃុំជ្រោយស្វាយ ស្រុកស្រែអំបិល ចម្ងាយប្រហែល ១៦៧ គីឡូម៉ែត្រពីក្រុងខេមរភូមិន្ទ។ ឆ្នេរនេសាទស័ក្តិសមសម្រាប់ភ្ញៀវទេសចរត្រូវការកន្លែងស្ងប់ស្ងាត់ និងការមុជទឹកលេងកម្សាន្ត។

ក្រៅពីរមណីយដ្ឋានទេសចរណ៍ ខេត្តកោះកុងមានសហគមន៍ទេសចរណ៍ និងអេកូទេសចរណ៍បែបសហគមន៍ ដូចជាសហគមន៍ទេសចរណ៍ត្រពាំងរូង សហគមន៍ទេសចរណ៍តាតៃក្រោម សហគមន៍ទេសចរណ៍អារ៉ែង សហគមន៍ការពារធនធានធម្មជាតិពាមក្រសោប សហគមន៍អេកូទេសចរណ៍ជីផាត។

បើតាមមន្រ្តីមន្ទីរទេសចរណ៍ខេត្តកោះកុងលោក សាគុណ ភក្តី បានឲ្យកម្ពុជាថ្មីដឹងថា តំបន់ទេសចរណ៍ទាក់ទាញជាងគេក្នុងខេត្តកោះកុងមាន សហគមន៍តំបន់ការពារធម្មជាតិពាមក្រសោប (ជាព្រៃកោងកាងធំបំផុត) តំបន់តាតៃក្រោម (ទឹកធ្លាក់ ជិះទូកតាមដងព្រែក រីសត) តំបន់ឆ្នេរ (មានឆ្នេរចាំយាម និងឆ្នេរប៉ាក់ខ្លង) និងតំបន់ទេសចរណ៍ជួរភ្នំក្រវ៉ាញខាងត្បូង (សហគមន៍អេកូទេសចរណ៍តំបន់ស្ទឹងអារ៉ែង និងជីផាត)៕

អត្ថបទ៖ ប៊ុណ្ណារ៉ា

Related Topics:រមណីយដ្ឋានទេសចរណ៍២៥ខេត្តក្រុង