ព័ត៌មានជាតិ

ថ្នាក់ដឹកនាំខេត្តគោរពវិញ្ញាណក្ខន្ធ សព ឧត្តមសេនីយ៍ឯក អ៊ិន ធន មេបញ្ជាការរង និងជានាយសេនាធិការយោធភូមិភាគទី២

បានផុស

៥ years មុន

នៅ

ថ្ងៃចន្ទ ១៣ ធ្នូ ២០២១

ដោយ

សៀមរាប ៖ ថ្ងៃទី១៣ ខែធ្នូ ឆ្នាំ២០២១ លោកទៀ សីហា អភិបាល នគណ:អភិបាលខេត្តសៀមរាប និងលោក អ៊ាន ឃុន ប្រធានក្រុមប្រឹក្សាខេត្ត បានដឹកនាំ មន្ទីរ អង្គភាពជុំវិញខេត្ត ចូលរួមដាក់កម្រងផ្កា និងគោរពវិញ្ញាណក្ខន្ធ ចូលរួមរំលែកទុក្ខ ជាមួយក្រុមគ្រួសារ នៃសពឯកឧត្តមឧត្តមសេនីយ៍ឯក អ៊ិន ធន មេបញ្ជាការរង និងជានាយសេនាធិការយោធភូមិភាគទី២ នៃកងយុទ្ធពលខេមរភូមិន្ទ ដែលបានទទួលមរណភាព កាលពីថ្ងៃទី១១ ខែធ្នូ ឆ្នាំ២០២១ វេលាម៉ោង ៧ នឹង១៥នាទីព្រឹក ក្នុងជន្មាយុ៦៣ ឆ្នាំ ដោយរោគាពាធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សពត្រូវបានតម្កល់ និងធ្វើបុណ្យតាមប្រពៃណីទំនៀមទំលាប់ នៅគេហដ្ឋាននៃសព ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប។

ក្នុងឱកាសចូលរួមរំលែកទុក្ខនោះដែរ ឯកឧត្តម ទៀ សីហា និងឯកឧត្តម អ៊ាន ឃុន បានសម្តែងនូវក្តីសោកស្តាយអសឡោះអាឡៃយ៉ាងក្រៃលែង ដោយការបាត់បង់មន្ត្រី ថ្នាក់ដឹកនាំដ៏ឆ្នើមមួយរូប ដែលបានបំពេញភារកិច្ចជូនជាតិមាតុភូមិស្ទើរពេញមួយជីវិតនាពេលកន្លងមក។

លោកក៏បានផ្តាំផ្ញើដល់ភរិយានិងកូនចៅនៃសព សូមកាត់ចិត្តកាត់ថ្លើមព្រោះនេះជាច្បាប់ធម្មជាតិ ពោលគឺសង្ខាររបស់មនុស្ស សត្វរមែងមិនទៀងទាត់ កើតហើយបាត់បង់ទៅវិញ ជានិយាមនៃធម្មជាតិមិនអាចនរណាគេចផុតបានឡើយគ្រាន់តែមុន និងក្រោយតែប៉ុណ្ណោះ។

ក្នុងនោះដែរ លោកអភិបាលខេត្ត និងប្រធានក្រុមប្រឹក្សាខេត្ត ក៏បានប្រគល់នូវលិខិតចូលរួមរំលែកទុក្ខ ក្នុងនាមរដ្ឋបាលខេត្ត និងបច្ច័យចំនួន ២លាន រៀល ដើម្បីចូលរួមក្នុងពិធីបុណ្យសព សម្រាប់គ្រួសារយកទៅប្រើប្រាស់ក្នុងពិធីបុណ្យនេះផងដែរ៕

ដោយ ៖ គឿនវេត