ទីប្រឹក្សា​ជាន់ខ្ពស់​សម្តេចព្រះអគ្គមហាសង្ឃរាជាធិបតី ទេព វង្ស បរិច្ចាគ​អំណោយ​ដល់ពលរដ្ឋខ្វះខាត២៥គ្រួសារនៅស្រុកត្រាំ​កក់​

លោក ណុប សុផាត ទីប្រឹក្សាជាន់ខ្ពស់សម្តេចព្រះអគ្គមហាសង្ឃរាជាធិបតី ទេព វង្ស និ​ង​ជា​អគ្គនាយកក្រុមហ៊ុនដូនកែវ អ៊ិនវេស្មិន ម្ចាស់គម្រោងដីឡូតិ៍អភិវឌ្ឍន៍សហគមន៍ឃុំលាយបូរ នៅព្រឹកថ្ងៃទី២៥ ខែធ្នូ ឆ្នាំ២០២១ នេះ បានបរិច្ចាគអំណោយមួយចំនួនដល់ពលរដ្ឋដែលមានជីវភាពខ្វះខាតចំនួន២៥គ្រួសារមកពី៥ភូមិក្នុងឃុំលាយបូរ ស្រុកត្រាំកក់ ខេត្តតាកែវ។

ថ្លែងនៅក្នុងឱកាសនោះដែរ លោក ណុប សុផាត បញ្ជាក់ថា ត្បិតតែអំណោយនេះមិនអាចផ្គត់ផ្គង់ដោះស្រាយទុក្ខលំបាកជូនពលរដ្ឋខ្វះខាតទាំង២៥គ្រួសារនេះបានយូរអង្វែង តែក៏អាចជួយសម្រួលជីវភាពពួកគាត់បានមួយគ្រាៗដែរ។ ហើយទាំងអស់នេះគឺជាការបរិច្ចាគចេញពីទឹកចិត្តគាត់និងក្រុមការងារគម្រោងដីឡូតិ៍អភិវឌ្ឍន៍សហគមន៍ឃុំលាយបូរ ដើម្បីជួយសម្រាលបន្ទុកអាជ្ញាធរបានមួយចំណែកខ្លះ ទោះមិនបានគ្រប់គ្រួសារក្រីក្រក្នុងមូលដ្ឋានឃុំក៏ដោយ។

សូមបញ្ជាក់ថា អំណោយដែលលោក ណុប សុផាត ម្ចាស់គម្រោងដីឡូតិ៍អភិវឌ្ឍន៍សហគមន៍ឃុំលាយបូរប្រគាល់ជូនពលរដ្ឋខ្វះខាត់ទាំង២៥គ្រួសារនោះមាន មួយគ្រួសារៗ អង្ក២៥គីឡូ មី ទឹកត្រី ទឹកស៊ីអ៊ីវ ម៉ាសនិងថវិកាមួយចំនួនផងដែរ៕

អត្ថបទ៖ វីរៈ