រដ្ឋបាលខេត្តព្រះសីហនុ ផ្លាស់ប្ដូរទីកន្លែងបំពេញការងារបណ្ដោះអាសន្ន ចាប់ពីថ្ងៃទី ៩កម្ភៈតទៅ

រដ្ឋបាលខេត្តព្រះសីហនុ បានប្រកាសផ្លាស់ប្ដូរទីកន្លែង បំពេញការងារជាបណ្ដោះអាសន្ន ចាប់ពីថ្ងៃទី ៩ ខែកម្ភៈ ឆ្នាំ ២០២២តទៅ ដើម្បីឲ្យក្រុមការងារសាងសង់ រុះរើអគាររដ្ឋបាលបច្ចុប្បន្ន សាងសង់អគារថ្មីមានលក្ខណៈស្តង់ដារ សក្តិសមជាខេត្តតំបន់សេដ្ឋកិច្ចពិសេស គំរូពហុបំណង។

យោងតាមសេចក្តីជូនដំណឹង របស់រដ្ឋបាលខេត្តព្រះសីហនុ ចុះថ្ងៃទី ៤កម្ភៈនេះ បានឲ្យដឹងថា រដ្ឋបាលខេត្តព្រះសីហនុ នឹងរៀបចំសាងសង់អគារ រដ្ឋបាលសាលាខេត្តព្រះសីហនុថ្មី ដើម្បីជួយសម្រួលក្នុងការបំពេញការងារ និងផ្តល់សេវាជូនប្រជាពលរដ្ឋ ប្រកបដោយប្រសិទ្ធភាពខ្ពស់ សក្តិសម ជាខេត្តតំបន់សេដ្ឋកិច្ចពិសេសគំរូពហុបំណង។

រដ្ឋបាលខេត្ត បានបន្តថា ក្នុងកិច្ចដំណើរការនៃការសាងសង់អគារ រដ្ឋបាលសាលាខេត្តព្រះសីហនុ ត្រូវប្រើប្រាស់រយៈពេលប្រមាណ ១៨ខែ គិតចាប់ពីថ្ងៃបើកការដ្ឋានសាងសង់នៅថ្ងៃ ៧ ខែមីនា ឆ្នាំ២០២២ ខាងមុខនេះតទៅ។

រដ្ឋបាលខេត្ត បានបន្តទៀតថា ដើម្បីឲ្យការសាងសង់ ទទួលបានជោគជ័យតាមការគ្រោងទុក ក្រុមហ៊ុនសាងសង់ នឹងរុះរើរងាររដ្ឋបាលសាលាខេត្តបច្ចុប្បន្ន ដើម្បីបើកការដ្ឋានសាងសង់អគាររដ្ឋបាលសាលាខេត្តថ្មី។ ដូចនេះរដ្ឋបាលខេត្តព្រះសីហនុ នឹងធ្វើការផ្លាស់ប្តូរទីតាំង បំពេញការងារដ្ឋបាលប្រចាំថ្ងៃ និងការបម្រើសេវា ជូនប្រជាពលរដ្ឋជាបណ្តោះអាសន្ន ទៅទីតាំង ថ្មីស្ថិតនៅផ្លូវលេខ១០៣២ ភូមិ ៣ សង្កាត់លេខ ៤ ក្រុងព្រះសីហនុ ខេត្តព្រះសីហនុ ចាប់ពីថ្ងៃទី ៩ ខែកុម្ភៈ ឆ្នាំ ២០២២ នេះតទៅ។

បើតាមលោក គួច ចំរើន អភិបាល នៃគណៈអភិបាលខេត្តព្រះសីហនុ បានមានប្រសាសន៍ថា អគារសាលាខេត្តថ្មីនេះ មានកម្ពស់ ៤ជាន់ និងមានផ្ទៃក្រឡាសរុប ៤៤,០៩៣ម៉ែត្រការ៉េហើយ ចំពោះស្ថាបត្យកម្មនៃអគារ គឺយកតាមរចនាបទសំបូរព្រៃគុក ដែលជាអគារមានលក្ខណៈខ្មែរទំនើបស៊ីវីល័យ។

លោកអភិបាលខេត្ត បានមានប្រសាសន៍បន្តទៀតថា ការសាងសង់អគារថ្មីនេះ បានទទួលការឯកភាពពីសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងមានការគាំទ្រពីលោក​ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ផងដែរ៕

អត្ថបទ៖ សំអឿន