អគ្គនាយកស៊ីម៉ាក់ចង់សង់អគារ សារមន្ទីររាងគ្រាប់មីនធំជាងគេលើពិភពលោក

លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ មានបំណងចង់បានអគារសារមន្ទីរមីនមានលក្ខណៈរាងគ្រាប់មីនធំជាងគេនៅលើពិភពលោក ដើម្បីឱ្យយុវជនជំនាន់ក្រោយបានស្វែងយល់រៀនសូត្រ អំពីមរតកសង្គ្រាម និងអត្ថន័យ នៃសន្តិភាពពេញលេញនៅកម្ពុជា។

ការលើកឡើងរបស់លោក ហេង រតនា ធ្វើឡើងនៅថ្ងៃទី១០​ ខែកុម្ភ:​ ឆ្នាំ២០២២​ នៅវិទ្យាស្ថានបច្ចេកទេសសកម្មភាពកំចាត់មីន ខេត្តកំពង់ឆ្នាំង ក្នុងឱ្យកាសជួបពិភាក្សាជាមួយក្រុមប្រឹក្សាយោបល់ជប៉ុន​របស់ JICA ក្នុងការសិក្សាស្រាវជ្រាវវាយតំលៃតម្រូវការ និងរូបរាងអាគារផេ្សងៗដែលត្រូវសាងសង់ទាំងនៅខេត្តកំពង់ឆ្នាំង និងខេត្តសៀមរាប។

តាមរយៈទំព័រហ្វេប៊ុកផ្លូវការនៅថ្ងៃនេះ លោកអគ្គនាយកស៊ីម៉ាក់បានសរសេរថា៖ “ចង់បានអគារសារមន្ទីររាងគ្រាប់មីនធំជាងគេលើពិភពលោក ​​សម្រាប់បង្ហាញពិភពលោកថា​ សម្តេចតេជោ​ ហ៊ុន​ សែន​ មគ្គុទេសក៍ឯកសន្តិភាព​បានដឹកនាំកម្ពុជាពីប្រទេសមានគ្រាប់មីនប្រឆាំងមនុស្សច្រើនជាងគេលើលោក​ មកជាប្រទេសគ្មានគ្រាប់មីនប្រឆាំងមនុស្សទៀតឡើយនៅចុងឆ្នាំ២០២៥​ និងបន្សល់ទុកតែអគាររាងគ្រាប់មីនធំបំផុត ដើម្បីយុវជនជំនាន់ក្រោយស្វែងយល់រៀនសូត្រអំពីមរតកសង្គ្រាម​ និងអត្ថន័យនៃសន្តិភាពពេញលេញនៅកម្ពុជា”។

នៅក្នុងឱកាសពិភាក្សានោះ លោកអគ្គនាយកស៊ីម៉ាក់បាន បង្ហាញគ្រាប់មីនដែលបានដោះបន្សាបរួច និងសម្រាប់ទុកឱ្យហ្វឹកហ្វឺនដល់ក្រុមវិស្វករជប៉ុនឱ្យយល់ពីទ្រង់ទ្រាយសំណង់ផងដែរ។

“កម្ពុជាថ្មី” បានព្យាយាមសាកសួរព័ត៌មានលោក ហេង រតនា បន្ថែម ពាក់ព័ន្ធនឹងការសាងសង់អគារសារមន្ទីរខាងលើនេះដែរ តែមិនអាចទាក់ទងបាន៕

អត្ថបទ៖ សំអឿន