អាជ្ញាធរអេដស៍ នឹងចែកស្រោមអនាម័យ​ដោយឥតគិតថ្លៃ​ក្នុងទិវានៃក្តីស្រលាញ់

អាជ្ញាធរជាតិប្រយុទ្ធនឹងជំងឺអេដស៍ ដែលហៅកាត់ថា (NAA)សហការជាមួយអង្គការដៃគូនានានឹងរៀបចំ​ប្រារព្វទិវានៃក្តីស្រលាញ់ នៅថ្ងៃទី ១៣ ខែកម្ភៈ ឆ្នាំ២០២២ ដើម្បីផ្សព្វផ្សាយដល់យុវវ័យបានដឹង និងចេះការពារខ្លួនចៀសផុតពីការឆ្លងជំងឺអេដស៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឈិម ឃិន ដារ៉េត អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេសដស៍ បានមានប្រសាសន៍នៅព្រឹកថ្ងៃទី ១២កម្ភៈថា កម្មវិធីនេះធ្វើឡើងក្នុងគោលបំណងដើម្បីលើកកម្ពស់ការយល់ដឹងពីការបង្ការមេរោគអេដស៍ និងការប្រើប្រាស់ស្រោមអនាម័យ ផ្តោតទៅលើក្រុម ប្រឈមមុខខ្ពស់ និងជាពិសេសក្រុមយុវវ័យ ដើម្បីកាត់បន្ថយការចំលងមេរោគអេដស៍ ។

លោកបានបន្តថា នៅក្នុងកម្មវិធីនោះក៏មានដាក់តាំងប៊ូតមួយចំនួនផងដែរ ដើម្បីធ្វើការចែកស្រោមអនាម័យ​និងធ្វើតេស្តឈាមរកមេរោគអេដស៍ ដោយឥតគិតថ្លៃជួនដល់បងប្អូនប្រជាពលរដ្ឋដែលធ្វើដំណើរ​តាមផ្លូវក៏ដូចជាផ្សព្វផ្សាយនូវចំណេះដឹងទាក់ទិននឹងវិធីការពារខ្លួនកុំឱ្យឆ្លងជំងឺអេសដ៍ ពិសេសយុវវ័យកុំមានការភ្លើតភ្លឺននៅក្នុងទិវានៃក្តីស្រលាញ់១៤កម្ភៈ ព្រោះវាជាថ្ងៃបុណ្យរបស់បរទេសមិនមែនជាថ្ងៃបុណ្យរបស់ខ្មែរទេ។

គួរបញ្ជាក់ថា ក្រៅពីមានការយកចិត្តទុកដាក់ពីអាជ្ញាធរជាតិប្រយុទ្ធនឹងជំងឺអេសដ៍ក៏មានក្រសួងចំនួន៣ រួមមាន ក្រសួងសុខាភិបាល ក្រសួង សុខាភិបាលក្រសួងវប្បធម៌និងវិចិត្រសិល្បៈក៏បានណែនាំដល់យុវវ័យ និងសិស្ស​ត្រូវ​សិក្សា​ស្វែងយល់​ឱ្យ​ស៊ីជម្រៅ​ពី​វប្បធម៌ ប្រពៃណីដែលជា​មរតក​ដ៏​ថ្លៃថ្លា​របស់​ដូនតាព្រមទាំង​ឈ្វេងយល់​ឱ្យបាន​គ្រប់​ជ្រុងជ្រោយ អំពី​ខ្លឹមសារ​នៃ​ថ្ងៃទី​១៤ កុម្ភៈ ដែលជា​វប្បធម៌ ទំនៀមទម្លាប់​នាំចូល​ពី​ក្រៅដើម្បី​បន្ស៊ី និង​សម្រប​ទៅតាម​បរិបទ នៃ​សង្គម​របស់ខ្លួនក្នុង​គោលដៅ​រក្សា​ការពារ​ឲ្យ​បាន​នូវ​តម្លៃ និង​ឧត្តមភាព នៃ​វប្បធម៌​ជាតិដែលមាន​ចំណាស់​រាប់ពាន់​ឆ្នាំ​មកហើយ​នៅ​ទ្វីបអាស៊ី​នេះ​៕ អត្ថបទ៖ សំអឿន