ព័ត៌មានជាតិ

ខេត្តបាត់ដំបង គ្រោងបំពាក់កាមេរ៉ាតាមដងផ្លូវ ពិនិត្យមើលអ្នកចោលសំរាមផ្ដេសផ្ដាស

បានផុស

៤ years មុន

នៅ

ថ្ងៃពុធ ១៦ កុម្ភៈ ២០២២

ដោយ

អាជ្ញាធរខេត្តបាត់ដំបង គ្រោងនឹងបំពាក់កាមេរ៉ានៅតាមដងផ្លូវនានា ដើម្បីពិនិត្យមើលសុខសុវត្ថិភាពនៅតាមដងផ្លូវនិងពិនិត្យមើលអ្នកចោលសំរាមនៅតាមទីសាធារណៈផ្តេសផ្តាស ដើម្បីធ្វើការផាកពិន័យទៅតាមច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំណែនាំអនុវត្តផែនការធ្វើឱ្យប្រសើរឡើងនូវសោភ័ណភាព បរិស្ថាន អនាម័យទូទាំងខេត្តបាត់ដំបងកាលពីថ្ងៃទី ១៥ កុម្ភៈ លោក សុខ លូ បានលើកឡើងថា « ឥលូវនេះ យើងកំពុងសិក្សាអំពីការដាក់កាមេរ៉ាតាមដងផ្លូវដោយក្នុងគោលបំណងទី ១ គឺដើម្បីពិនិត្យមើលសុខសុវត្ថិភាពនៅតាមដងផ្លូវ ទី ២ ពិនិត្យមើលអ្នកចោលសំរាមនៅតាមទីសាធារណៈ ដើម្បីពិន័យអ្នកដែលចោលសំរាមផ្ដេសផ្ដាសនៅតាមសាធារណៈ»។

លោកអភិបាលខេត្ត បានធ្វើការណែនាំដល់អាជ្ញាធរក្រុងស្រុកទាំង ១៤ ត្រូវយកចិត្តទុកដាក់ខ្ពស់ពីបញ្ហាសំរាមនៅក្នុងមូលដ្ឋានរបស់ខ្លួន ដើម្បីលើកកម្ពស់សោភ័ណភាព បរិស្ថាន អនាម័យទូទាំងខេត្តបាត់ដំបងឱ្យកាន់តែប្រសើរ។ លោកអភិបាលខេត្តបានបន្តថា ចំពោះកិច្ចការងារសោភ័ណភាព បរិស្ថាន អនាម័យ មិនមែនសំដៅតែក្នុងក្រុងបាត់ដំបង តែមួយមុខប៉ុណ្ណោះទេ ពោលគឺត្រូវធ្វើទូទាំងខេត្តបាត់ដំបងតែម្ដង ក្នុងនោះមន្ទីរអង្គភាពជុំវិញខេត្ត ត្រូវតែមានកាតព្វកិច្ចមួយដ៏សំខាន់ គឺត្រូវតែមានការរៀបចំជាធុងសំរាម និងកន្លែងដាក់សំរាមឱ្យបានត្រឹមត្រូវ ដើម្បីរៀបចំឲ្យក្រុមហ៊ុនប្រមូលសំរាមអាចប្រមូលសំរាមបានកាន់តែរហ័ស និងងាយស្រួល។

លោកអភិបាលខេត្ត បានបន្តទៀតថា ជាមួយគ្នានេះដែរ ក្រុមហ៊ុនសំរាមនៅក្នុងខេត្ត ក៏ត្រូវមានកាតព្វកិច្ចមួយ គឺយកសំរាមឲ្យបានទៀងទាត់ និងឲ្យអស់នៅតាមមន្ទីរអង្គភាព និងនៅតាមសាធារណៈនានាឲ្យបានកាន់តែឆាប់រហ័ស និងស្អាត។ ប្រសិនក្រុមហ៊ុនប្រមូលសំរាម មិនបានគោរពតាមគោលការណ៍ និងកាតព្វកិច្ចរបស់ខ្លួនទេ នឹងឈានទៅរកការផ្ដាច់កុងត្រាទាំងស្រុងតែម្ដង។

យ៉ាងណាក៏ដោយ លោក សុខ លូ បានបន្តទៀតថា« បច្ចុប្បន្ននេះ ចាប់ផ្ដើមមានផ្លែផ្កាជាបណ្ដើរៗហើយ ដោយមានការប្រែប្រួលច្រើន ជាពិសេសបរិស្ថានជុំវិញផ្សារធំបាត់ដំបង(ផ្សារណាត់) ចាប់ផ្ដើមមានការទុកដាក់សំរាមមានរបៀបរៀបរយជាងមុន ដោយលែងមានសំរាមសល់ទុកចោលរាប់ថ្ងៃដូចមុនទៀតឡើយ ដូចនេះប្រជាពលរដ្ឋត្រូវតែបន្តចូលរួមជាមួយអាជ្ញាធរដើម្បីសោភ័ណភាពទីក្រុងរបស់យើង » ។

ទន្ទឹមនឹងនេះលោកអភិបាលខេត្តបានណែនាំដល់អភិបាលក្រុងស្រុក ត្រូវរៀបចំកិច្ចប្រជុំជាមួយជាមួយគណៈអភិបាល ដើម្បីស្វែងរកក្រុមហ៊ុនវិនិយោគផ្នែកប្រមូលសំរាមក្នុងស្រុក និងស្វែងរកទីលានចាក់សំរាមដែលទំនេរ ហើយចំពោះស្ទឹង ប្រឡាយ អូរគឺដាច់ខាតមិនត្រូវមានសំរាមឡើយ និងនាំគ្នាចូលរួមក្នុងការរើសសំរាមជាប្រចាំ ដោយមិនចាំបាច់មានទិវាអនាម័យអ្វីឡើយ ដើម្បីជាគំរូដល់ប្រជាពលរដ្ឋ និងដើម្បីសហគមន៍ស្អាតទាំងអស់គ្នា៕

អត្ថបទ៖ សំអឿន