មន្ត្រីសុខាភិបាល៖ អ្នកប្រើគ្រឿងញៀនដោយចាក់ម្ជុល ឆ្លងមេរោគអេដស៍ខ្ពស់ជាងគេ ក្នុងចំណោមក្រុមប្រឈមដទៃ

មន្ត្រីជាន់ខ្ពស់នៃក្រសួងសុខាភិបាលបានឱ្យដឹងថា បច្ចុប្បន្ននេះអ្នកប្រើប្រាស់គ្រឿងញៀនដោយចាក់ម្ជុលកំពុងប្រឈមមុខនឹងការឆ្លងជំងឺអេដស៍ខ្ពស់ជាងគេ ក្នុងចំណោមក្រុមប្រឈមដទៃនៅប្រទេសកម្ពុជា។ 

លោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍ សើរស្បែក និងកាមរោគ នៃក្រសួងសុខាភិបាល បានមានប្រសាសន៍នៅថ្ងៃទី២០ ខែកុម្ភៈនេះថា នៅកម្ពុជាមានក្រុមមនុស្សមួយចំនួនត្រូវបានចាត់ទុកជាក្រុមដែលប្រឈមមុខខ្ពស់នឹងការឆ្លងជំងឺអេដស៍ ក្នុងនោះមានក្រុមអ្នកប្រើប្រាស់គ្រឿងញៀនដោយចាក់ម្ជុលមានការឆ្លងខ្ពស់ជាងគេ រហូតដល់ទៅ ១៥ភាគរយ ដោយសារពួកគេប្រើប្រាស់សារ៉ាងរួមគ្នា ធ្វើឱ្យការចម្លងងាយស្រួល ខណៈបច្ចុប្បន្នតាមការប៉ាន់ស្មាន ក្រុមនេះមានប្រមាណ ៤ ០០០នាក់។

លោកវេជ្ជបណ្ឌិតបានបន្តថា បន្ទាប់មកក្រុមបំប្លែងភេទដែលក្រុមនេះមានការចម្លងប្រមាណ ៩,៦ ភាគរយ ហើយតាមការប៉ាន់ស្មាន ក្រុមនេះមានចំនួនប្រមាណ ៦ ០០០ នាក់ និងក្រុមបុរសស្រលាញ់បុរស ដែលមានការចម្លង ៤ ភាគរយ តាមការប៉ាន់ស្មាន ក្រុមនេះមានប្រមាណ ៤០ ០០០ នាក់។

លោកវេជ្ជបណ្ឌិត បានបន្តទៀតថា ក្រៅពីនេះក្រុមយុវវ័យក៏ជាក្រុមដែលចាត់ទុកមានការប្រឈមខ្ពស់ការឆ្លងជំងឺអេដស៍ដែរ ដែលទាមទារឱ្យមានការផ្សព្វផ្សាយអប់រំស្តីពីវិធីការពារជំងឺអេដស៍ឱ្យបានកាន់តែទូលំទូលាយបន្ថែមទៀត។

លោកវេជ្ជបណ្ឌិត អ៊ុក វិជ្ជា បានបន្ថែមថា តាមការប៉ាន់ស្មាន បច្ចុប្បន្ននេះកម្ពុជាមានអ្នកផ្ទុកជំងឺអេដស៍ប្រមាណ ៧៥ ០០០ នាក់ស្មើនឹង ០,៥៤ ភាគរយនៃប្រជាពលរដ្ឋសរុបនៅទូទាំងប្រទេស ក្នុងនោះមានប្រមាណ ៦២ ៤៦១ នាក់ទទួលបានព្យាបាល និងប្រមាណ ១២ ០០០ នាក់ទៀតនៅមិនទាន់មកព្យាបាលនៅឡើយ។

លោក ឈិម ឃិនដារ៉េត អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេសដ៍ បានមានប្រសាសន៍ថា អាជ្ញាធរជាតិប្រយុទ្ធនឹងជំងឺអេដស៍ បានសហការជាមួយអង្គការដៃគូ បានរៀបចំយុទ្ធសាស្ត្រមួយចំនួនដើម្បីបង្កើនការផ្សព្វផ្សាយដើម្បីឱ្យពួកគេបានយល់ ហើយស្ម័គ្រចិត្តមកធ្វើតេស្ត និងព្យាបាលជំងឺ។ ព្រោះប្រសិនបើពួកគេនៅបន្តលាក់មុខតទៅទៀត មិនព្រមចេញមកព្យាបាលទេនោះ វានឹងធ្វើឱ្យប៉ះពាល់ដល់អាយុជីវិត និងអាចបង្កហានិភ័យដល់មនុស្សផ្សេងៗទៀតផងដែរប្រសិនបើមិនបានការពារខ្លួនឱ្យបានត្រឹមត្រូវ។

លោក ទៀ ផល្លា អនុប្រធានអាជ្ញាធរជាតិប្រឆាំងជំងឺអេដស៍ បានឱ្យដឹងថា អ្នកផ្ទុកជំងឺអេដស៍ប្រមាណ ១២ ០០០ នាក់នោះមានអាយុចន្លោះពី ៥០ ទៅ ៧០ ឆ្នាំ ហើយត្រូវគេសង្ស័យថាបានឆ្លងមេរោគអេដស៍នេះយ៉ាងហោចណាស់ ១០ ឆ្នាំមកហើយ។

មន្ត្រីជាន់ខ្ពស់អាជ្ញាធរជាតិប្រយុទ្ធនឹងជំងឺអេសដ៍បានធ្វើការអំពាវនាវដល់អ្នកជំងឺអេដស៍ប្រមាណ ១ ២០០ នាក់ដែលកំពុងលាក់មុខចេញមកធ្វើតេស្ត និងព្យាបាលជំងឺឱ្យបានទាន់ពេលវេលា។

លោកវេជ្ជបណ្ឌិត អ៊ុក វិជ្ជា បានឱ្យដឹងថា តាមការប៉ាន់ស្មាននៅកម្ពុជាក្នុង១ឆ្នាំ មានអ្នកស្លាប់បាត់បង់ជីវិតដោយសារជំងឺអេដស៍ប្រមាណ ១ ២០០ នាក់ និងអ្នកឆ្លងជំងឺអេដស៍ថ្មីប្រមាណ ១ ១០០ នាក់៕

អត្ថបទ៖ សំអឿន