មិនធ្លាប់មាន ឆ្នាំនេះ មន្ទីរវប្បធម៌រាជធានី ទទួលសម្ដែងរបាំត្រុដិ តាមស្ថាប័នរដ្ឋ និងឯកជន

ប្រធានមន្ទីរ វប្បធម៌ និងវិចិត្រសិល្បៈ រាជធានីភ្នំពេញ បានឱ្យដឹងថា នៅឆ្នាំថ្មី ឆ្នាំខាល ចត្វាស័ក នេះ ក្រុមសិល្បៈ នៃមន្ទីរ នឹងទទួលការអញ្ជើញទៅសម្ដែងរបាំត្រុដិ តាមស្ថាប័នរដ្ឋ និងក្រុមហ៊ុនឯកជននានា ដើម្បីកាត់ផ្ដាច់ឧបទ្រពចង្រៃឆ្នាំចាស់ ផ្លាស់ទទួលយកជោគជ័យឆ្នាំថ្មី។

លោក ជុំ វុឌ្ឍី ប្រធានមន្ទីរ វប្បធម៌ និងវិចិត្រសិល្បៈ រាជធានីភ្នំពេញ បានឱ្យ “កម្ពុជាថ្មី” ដឹងថា នៅថ្ងៃទី៥ ខែមេសា ឆ្នាំ២០២២ នេះថា រាល់ឆ្នាំ ក្រុមសិល្បៈ នៃមន្ទីរវប្បធម៌ និងវិចិត្រសិល្បៈ មិនដែលចេញសម្ដែងរបាំត្រុដិ តាមក្រុមហ៊ុនឯកជននានានោះទេ ពោលសម្ដែងតែនៅរមណីដ្ឋានវត្តភ្នំប៉ុណ្ណោះ គឺនៅក្រោយម៉ោងទេវតាចុះ។

លោក ជុំ វុឌ្ឍី បញ្ជាក់ថា ដើម្បីអបអរការបើកពិធីចូលឆ្នាំអធិកអធមឡើងវិញបន្ទាប់ពីផ្អាកដោយសារវិបត្តិជំងឺកូវីដ-១៩ កន្លងទៅនេះ ដូចនេះក្រសួង មន្ទីរនានា ក៏ដូចជាស្ថានទូត ក្រុមហ៊ុន រោងចក្រ ផ្សារទំនើប និងសាធារណជនទូទៅ អាចអញ្ជើញក្រុមសិល្បករជំនាញ នៃមន្ទីរវប្បធម៌ និងវិចិត្រសិល្បៈ រាជធានីភ្នំពេញទៅសម្ដែង ស្វាគមន៍ឆ្នាំថ្មី ទទួលលាភសិរីបាន តាមរយៈទូរសព្ទលេខ ០១១ ៤៤៨ ៨៩៨ ។

ប្រធានមន្ទីរ វប្បធម៌ និងវិចិត្រសិល្បៈ រាជធានីភ្នំពេញ រូបនេះបញ្ជាក់ថា របាំត្រុដិ មានសិល្បករសិល្បៈការិនី ជាង ២០ រូប ដែលមានទាំងតួ ព្រានព្រៃ១រូប តួប្រើស១រូប តួទន្សោង២រូប ក្ងោក២រូប យក្ស២រូប ព្រាយ២រូប ក្រុមអ្នកច្រៀង ក្រុមអ្នកកាន់​ដង​កញ្ឆា ក្រុមអ្នកភ្លេង មានអ្នកកាន់ស្គរ ទ្រអ៊ូរ និង​ទ្រសោ ជាដើម។

លោក ជុំ វុឌ្ឍី លើកឡើងថា របាំត្រុដិនេះ សម្ដែងក្នុងឱកាសបុណ្យឆ្លងពីឆ្នាំចាស់ចូលឆ្នាំថ្មី បណ្ដេញភាពឧបទ្រពចង្រៃ ទៅភាពសម្បូរណ៍សប្បាយ សំដៅ ឆ្នាំចាស់ដាច់ ដើម្បីត្រាច់ផ្លាស់ចូលឆ្នាំថ្មី ហើយការណ៍ដែលគេមិនបានប្រារព្ធពិធីបុណ្យឆ្លងឆ្នាំថ្មី ឬមិនចូលរួមអបអរសាទរនូវរបាំនេះ អាចនាំមកនូវទុក្ខសោកដោយប្រការណាមួយ។

គួរបញ្ជាក់ថា របាំត្រុដិ​ ជារបាំជនជាតិសំរ៉ែ ដែល​ជា​ជន​ជាតិ​ដើម​មួយ​រស់​នៅ​តាំង​ពី​បុរាណ​កា​ល​មក។ ជន​ជាតិ​សំរ៉ែ​សព្វ​ថ្ងៃ​រស់​នៅច្រើន​នៅភូមិ​ភាគ​ខាង​ជើង​បឹង​ទន្លេសាប។ ជារៀង​រាល់​ពេល​ចូល​ឆ្នាំជាន​ជាតិ​សំរ៉ែ​តែង​តែ​យក​របាំត្រុដិ​នេះ​ទៅ​លេង​ថ្វាយ​ព្រះ​ពរ​ព្រះរាជា​ខ្មែរ​នៅ​អង្គរ ប្រ​ជា​ប្រិយ​មួយ​បែប ដែល​គេ​និយម​មក​លេង​ពេល​ចូល​ឆ្នាំថ្មី ដើម្បី​ប្រ​សិទ្ធិ​ពរ​ដល់​អ្នក​ស្រុក។ ម្យ៉ាង​ទៀត​របាំ​ត្រុដិ​នេះ​ក៏នាំ​ផ្សា​ភ្ជាប់​ និង​ជំ​នឿ​បន់​ស្រន់​សុំ​ទឹក​ភ្លៀង​នៅ​ពេល​ដែល​មាន​ការ​រាំង​ស្ងួត។ ​ក្នុង​របាំនេះ​គេ​និយម​ប្រើ​កន្ទុយ​ក្ងោក​ដោយ​គេ​យល់​ថា ក្ងោក​ជា​តំណាង​ព្រះ​អាទិត្យ​។ មនុស្ស​បន់​ស្រន់​អង្វ​រព្រះ​អាទិត្យ សុំ​ឱ្យ​ព្រះ​អាទិត្យ​ផ្តល់​អំណោយ​ទឹក​ភ្លៀង​គ្រប់​គ្រាន់​ដើម្បី​ស្រែ​ចំការ៕

អត្ថបទ៖ ច័ន្ទ វីរៈ