សម្ដេចតេជោ លើកទឹកចិត្តឲ្យពង្រឹងចំណងមិត្តភាពរវាងកម្ពុជា និងសមាជិកគំនិតផ្ដួចផ្ដើមចតុភាគីពិសេសកម្ពុជា-ឥណ្ឌា

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកទឹកចិត្តឲ្យពង្រឹងចំណងមិត្តភាព និងជំរុញកិច្ចសហប្រតិបត្តិការ ព្រមទាំងពង្រឹងទំនាក់ទំនងបន្ថែមទៀតរវាងកម្ពុជា និងសមាជិកនៃគំនិតផ្ដួចផ្ដើមចតុភាគី ជាពិសេសរវាងកម្ពុជា និងឥណ្ឌា។ ការលើកទឹកចិត្ត របស់សម្ដេចតេជោនាយករដ្ឋមន្ត្រីខាងលើនេះ បានធ្វើឡើងក្នុងពិធីប្រគល់-ទទួលវ៉ាក់សាំងបង្ការជំងឺកូវីដ-១៩ (Covishield) ចំនួន ២០ ម៉ឺនដូស ជាជំនួយរបស់ប្រទេសឥណ្ឌា នៅព្រឹកថ្ងៃទី ១២ ខែមេសា ឆ្នាំ ២០២២នេះ។

សម្ដេចតេជោ ហ៊ុន សែន បានបង្ហាញសេចក្ដីសោមនស្សក្រៃលែង ដោយបានចូលរួមជាមួយលោកស្រី ដេវីយ៉ានី ខូប្រាហ្គេដ ឯកអគ្គរដ្ឋទូតឥណ្ឌាប្រចាំកម្ពុជា ដើម្បីទទួលវ៉ាក់សាំងបង្ការជំងឺកូវីដ-១៩ ប្រភេទកូវីស្សែល (COVISHIELD) ចំនួន ៣២៥,០០០ ដូស ដែលជាអំណោយសប្បុរសធម៌ដ៏ថ្លៃថ្លារបស់ប្រជាជន និងរដ្ឋាភិបាលឥណ្ឌា ក្រោមគំនិតផ្ដួចផ្ដើមចតុភាគី (QUAD Initiative) ជូនចំពោះប្រជាជន និងរាជរដ្ឋាភិបាលកម្ពុជា។ អំណោយដ៏ថ្លៃថ្លានេះ គឺជាសក្ខីភាពដ៏ពិតប្រាកដនៃចំណងមិត្តភាព និងសាមគ្គីភាពរវាងកម្ពុជា-ឥណ្ឌា និងសមាជិកដទៃទៀតនៃគំនិតផ្ដួចផ្ដើមនេះ ដែលរួមមាន៖ សហរដ្ឋអាមេរិក, ជប៉ុន, និងអូស្ត្រាលី។

ជាមួយគ្នានេះសម្ដេចតេជោ ហ៊ុន សែន បានលើកឡើងដែរថា ក្នុងនាមប្រជាជន និងរាជរដ្ឋាភិបាលកម្ពុជា សម្ដេចសូមសម្ដែងនូវអំណរគុណដល់ប្រទេសឥណ្ឌា ដែលជាមិត្តយល់ចិត្តថ្លើមរបស់កម្ពុជា។ វត្តមានរបស់ឥណ្ឌា តាំងពីឆ្នាំ ១៩៨១ ក្រោយការបិទបញ្ចប់របបខ្មែរក្រហម បានចូលរួមចំណែកយ៉ាងសំខាន់ក្នុងការជួយស្ដារសង្គម-សេដ្ឋកិច្ចកម្ពុជាឡើងវិញ តាមរយៈជំនួយមនុស្សធម៌, ការជួយគាំទ្រវិស័យពាណិជ្ជកម្ម ​និងវប្បធម៌ និងការផ្ដល់កម្ចីហិរញ្ញប្បទានជាដើម ទាំងក្នុងក្របខណ្ឌទ្វេរភាគី និងពហុភាគី។ ជាលទ្ធផល ទំនាក់ទំនងសង្គម-សេដ្ឋកិច្ច ពាណិជ្ជកម្ម និងការវិនិយោគរវាងកម្ពុជា-ឥណ្ឌា មានការរីកចម្រើនគួរឲ្យកត់សម្គាល់ ទោះបីជាមានការថមថយបន្តិចបន្តួច ក្នុងអំឡុងពេលនៃការឆ្លងរាលដាលនៃជំងឺកូវីដ-១៩ ក៏ដោយ។

សម្ដេចតេជោនាយករដ្ឋមន្ត្រី បានថ្លែងបន្តថា «ក្នុងបរិការណ៍ដែលការឆ្លងរាលដាលនៃជំងឺកូវីដ-១៩ បានថមថយ និងជារួមដោយយើងបានគ្រប់គ្រងស្ថានការណ៍ នៃការឆ្លងរាលដាលបានយ៉ាងល្អប្រសើរ ខ្ញុំសូមលើកទឹកចិត្តឲ្យមានការពង្រឹងចំណងមិត្តភាព ការជំរុញកិច្ចសហប្រតិបត្តិការ និងការពង្រឹងទំនាក់ទំនងបន្ថែមទៀតរវាងកម្ពុជា និងសមាជិកនៃគំនិតផ្ដួចផ្ដើមចតុភាគី ជាពិសេសរវាងកម្ពុជា-ឥណ្ឌា ពាក់ព័ន្ធនឹងពាណិជ្ជកម្ម ការវិនិយោគ បច្ចេកវិទ្យាព័ត៌មាន ការបន្ធូរបន្ថយលក្ខខណ្ឌធ្វើដំណើរ និងការតភ្ជាប់ជើងហោះហើរត្រង់ និងការជំរុញអភិវឌ្ឍវិស័យទេសចរណ៍»៕

អត្ថបទ៖ ឃួន សុភ័ក្រ