ព័ត៌មានជាតិ
បុណ្យចូលឆ្នាំថ្មី តើពលរដ្ឋម្នាក់ៗ នឹងធ្វើអ្វីខ្លះនៅពេលទៅដល់ស្រុកកំណើត?
ពិធីបុណ្យចូលឆ្នាំថ្មី ប្រពៃណីជាតិខ្មែរ នឹងឈានចូលមកដល់នៅម៉ោង១០ និង០០នាទីព្រឹក នាថ្ងៃទី ១៤ ខែមេសា ឆ្នាំ ២០២២ខាងមុខនេះ។ ជារៀងរាល់ឆ្នាំប្រជាពលរដ្ឋខ្មែរទូទៅ រួមមាន៖ កម្មកររោងចក្រ កម្មករសំណង់ បុគ្គលិកក្រុមហ៊ុនឯកជន និងមន្រ្តីរាជការស៊ីវិលនៅតាមក្រសួង-ស្ថាប័ននានា តែងតែទទួលបានឱកាសដើម្បីឈប់សម្រាកជួបជុំគ្រួសារ។
មានស្រុកកំណើតនៅខេត្តកំពត និងជានិស្សិតឆ្នាំទី ៣ នៃសាកលវិទ្យាល័យកម្ពុជា កញ្ញា សី ចរិយា បានបង្ហាញអារម្មណ៍សប្បាយរីករាយ ត្បិតជិតបានទៅជួបជុំគ្រួសារ ដែលខកខានមិនបានជួបជុំយូរណាស់មកហើយ កញ្ញារំពឹងថា ឱកាសនោះជាពេលវេលាដែលបានជួបមិត្តចាស់ៗ ហើយបានធ្វើបុណ្យទាននារដូវកាលនេះផងដែរ។
យុវតីរូបនេះ បានឲ្យដឹងថា បើតាមន័យជាទូទៅបុណ្យចូលឆ្នាំថ្មី គឺបញ្ជាក់ពីការឈប់សម្រាករបស់ពលរដ្ឋ ហើយយកពេលឈប់សម្រាកនេះធ្វើសកម្មភាពល្អៗ ជាមួយបងប្អូន។ មួយវិញទៀតវាជាឱកាស ក្នុងការធ្វើបុណ្យឧទ្ទិសកុសលជូនដល់ដូនតា ដែលបានចែកឋានទៅ និងជូននំចំណី លុយកាក់ទៅដល់ម្តាយឪពុក និងចាស់ៗផ្សេងទៀត។
សម្រាប់កញ្ញា នៅពេលទៅដល់ស្រុកកំណើតក្នុងថ្ងៃចូលឆ្នាំកញ្ញានឹង «ថ្ងៃទី ១ ទៅវត្តជាមួយគ្រួសារ ថ្ងៃទី ២ ធ្វើម្ហូបជូនម៉ែ ថ្ងៃទី ៣ ទៅដើរលេងជាមួយបង ហើយថ្ងៃចុងក្រោយនៅផ្ទះមើលក្មួយៗ និងលេងជាមួយពួកគេ»។
ស្រដៀងគ្នានេះដែរ មានស្រុកកំណើតនៅខេត្តព្រៃវែង លោកស្រី ស៊ាង ស្រឹប បានឲ្យដឹងថា គ្រួសារលោកស្រីបាននាំគ្នាមករស់នៅ និងប្រកបមុខរបរនៅរាជធានីភ្នំពេញ ជាច្រើនឆ្នាំមកហើយ។ ដូច្នេះបុណ្យចូលឆ្នាំថ្មី ជាឱកាសដែលលោកស្រីអាចទៅជួបជុំសាច់ញាត្តិ ជាពិសេសជូនប្រាក់កាសខ្លះ និងគ្រឿងឧបភោគបរិភោគ ដល់អ្នកមានគុណទាំងសងខាង។ លោកស្រីបន្តថា អត្ថន័យបុណ្យចូលឆ្នាំសម្រាប់អ្នកស្រី គឺការបានជួបជុំបងប្អូនសាច់ញាត្តិ បន្ទាប់មកនាំគ្នាធ្វើម្ហូបពិសារជុំគ្នា ត្បិតពេលវេលាបែបនេះ ត្រូវបានអាក់ខានរយៈពេល ២ឆ្នាំមកហើយ។
លោកស្រីថា «និយាយទៅ ឲ្យតែបានជួបម៉ែឪទៅគឺបានហើយ បានជូន [គ្រឿងបរិភោគ] ពួកគាត់ទាំងសងខាងរួចរាល់ គឺចប់រឿងហើយ ចំណែកកូន និងប្ដី គេចង់ទៅលេងនៅណាក៏ទៅទៅ»។
ប្រជាពលរដ្ឋមួយរូបទៀត គឺលោក ពិន រ៉ុង បានឲ្យដឹងដែរថា លោកមានរម្មណ៍សប្បាយជាខ្លាំង នៅពេលដែលបុណ្យចូលឆ្នាំថ្មីឈានចូលមកដល់ ជាពិសេសគឺលោកបានឈប់សម្រាក និងវិលទៅស្រុកកំណើតដើម្បីជួបជុំឪពុកម្ដាយ។ មានកំណើតកើតជានៅខេត្តតាកែវ យុវជន ពិន រ៉ុង បានបន្តទៀតថា សម្រាប់បុណ្យចូលឆ្នាំថ្មីនៅឆ្នាំនេះ វាពិតជាមានអត្ថន័យណាស់សម្រាប់លោកក្នុងនាមជាខ្មែរ ពីព្រោះជាឱកាសនេះ គឺអាចអនុញ្ញាតឲ្យលោកធ្វើបុណ្យ និងសងគុណដល់ឪពុកម្ដាយរបស់លោក។
លោកបញ្ជាក់ដូច្នេះថា «ប្រពៃណីខ្មែរយើងត្រូវមាន [បុណ្យចូលឆ្នាំ] រាល់ឆ្នាំ ហើយណាមួយការប្រារព្ធពិធីនេះបានជួបជុំគ្រួសារ និងបានទៅវត្តទៅវ៉ា ធ្វើបុណ្យចឹងទៅណា ហើយពេលខ្ញុំទៅដល់ផ្ទះ គឺទៅជួបម៉ែមុនគេ ហើយជូនរបស់របរគាត់តិចតួច»។
ដោយឡែកយុវជន មកពីខេត្តព្រៃវែងមួយរូបទៀត គឺលោក ខេន សា បានឲ្យដឹងដែរថា លោកនឹងចេញដំណើរទៅស្រុកកំណើតនៅថ្ងៃទី ១៤ នាពេលព្រឹក ពីព្រោះនៅមានការងារខ្លះមិនទាន់រួចរាល់។ លោកបន្តថា លោកមានការនឹករលឹកអ្នកផ្ទះជាខ្លាំង ដោយសារក្នុងរយៈពេល ២ឆ្នាំទៅហើយ ដែលលោកមិនបានជួបពួកគាត់សោះ និងអាចទិញគ្រឿងឧបភោគបរិភោគខ្លះ ដូចជាទឹកក្រូចជាដើម ដាក់ទៅជាមួយផងដែរ។
លោកលើកឡើងបែបនេះថា «បុណ្យចូលឆ្នាំជាបុណ្យជាតិ ហើយខ្ញុំបានទិញទឹកក្រូច ដើម្បីជូនយាយនិងឪពុកម្ដាយនៅពេលខ្ញុំបានទៅដល់ផ្ទះ»។
ងាកមកយុវតី ដែលមានស្រុកកំណើត នៅខេត្តកំពង់ចាមឯណេះវិញ កញ្ញា ហុង កនិ្នកា និសិ្សតឆ្នាំទី ៤ នៃវិទ្យាស្ថានបច្ចេកវិទ្យាកម្ពុជា បានឲ្យដឹងថា កញ្ញាមានក្តីរំភើបជាខ្លាំង ដែលនឹងអាចជួបលោកឪពុកអ្នកម្ដាយ បងប្អូនញាត្តិមិត្ត និងបាននៅផ្ទះជុំគ្នា ខណៈដែលអស់រយៈពេលជាច្រើនឆ្នាំមក ហើយដែលកញ្ញាមករៀននៅរាជធានីភ្នំពេញ និងមិនមានពេលវេលាជួបជុំក្រុមគ្រួសារ។
និស្សិតរូបនេះបន្តថា ពិធីបុណ្យចូលឆ្នាំថ្មី ជាពិធីបុណ្យមួយដែលតំណាងឲ្យឆ្នាំចាស់ផ្លាស់ឆ្នាំថ្មី ផ្លាស់រឿងអាក្រក់ៗឲ្យអស់ទៅតាមឆ្នាំចាស់។ ប៉ុន្តែគួរឲ្យស្តាយរយៈពេលឈប់សម្រាក សម្រាប់កញ្ញាគឺបានតិច។
កញ្ញាបញ្ជាក់បែបនេះ «ខ្ញុំនឹងប្រើប្រាស់ពេលវេលាដ៏តិចតួចនេះ ជួយលក់ដូរម៉ែពុក ធ្វើម្ហូបជូនគាត់ពិសារ ទៅវត្តជាមួយគ្នា និងទៅជួបមិត្តចាស់ៗ ដែលបែកគ្នាយូរ ហើយលេងចូលឆ្នាំខ្មែរទាំងអស់គ្នា»៕
អត្ថបទ៖ លន់ សេនី
-
ចរាចរណ៍៤ ថ្ងៃ ago
ឆ្នាំ២០២៣ ខេត្តកំពង់ចាម មានអ្នកស្លាប់ព្រោះគ្រោះថ្នាក់ចរាចរណ៍ជាង១រយនាក់ និងរបួសជាង២រយនាក់
-
ជីវិតកម្សាន្ដ១ សប្តាហ៍ ago
លេចមុខតួឯកប្រុសក្នុងរឿង “កងដៃចាំស្នេហ៍” ស្នាងភ្នួស សុំឲ្យគ្រប់គ្នាអហោសិកម្ម
-
ព័ត៌មានអន្ដរជាតិ១ សប្តាហ៍ ago
យន្តហោះក្រុមហ៊ុនអាកាសចរណ៍ Jetstar មួយគ្រឿង បុកគ្នាជាមួយរថយន្តសន្តិសុខអាកាសយាដ្ឋាន
-
ព័ត៌មានជាតិ២ ថ្ងៃ ago
សម្តេចតេជោ ហ៊ុន សែន សម្រេចជួយកសាងកុដិ-ទិញដីពង្រីកវត្តសម្រាប់ព្រះសង្ឃ និងកូននេនសីហា
-
បច្ចេកវិទ្យា១៧ ម៉ោង ago
កុំពឹងផ្អែកលើប្រព័ន្ធសន្តិសុខ App ធនាគារទាំងស្រុង ត្រូវពង្រឹងសុវត្ថិភាពបន្ថែម
-
ព័ត៌មានអន្ដរជាតិ៥ ថ្ងៃ ago
រូបភាពបុរសម្នាក់លើឆ្នេរ អង់គ្លេស ក្លាយជាព័ស្តុតាងថា បានឆ្លងភពចូលមកឆ្នាំ ១៩៤៣
-
ព័ត៌មានជាតិ៦ ថ្ងៃ ago
មន្រ្តីក្រសួងបកស្រាយវីដេអូរថភ្លើងបើកលើផ្លូវជាតិ ពលរដ្ឋសង្ស័យបើកខុសបច្ចេកទេស
-
វប្បធម៌ ជំនឿ៣ ថ្ងៃ ago
ទំនាយលោកយាយ Baba Vanga ជិតក្លាយជាការពិតមួយទៀតហើយ