​​ក្រសួងការងារ អនុញ្ញាត​ឱ្យកម្មករ និយោជិត ឈប់​សម្រាក​ថ្ងៃបុណ្យអុំទូក

ក្រសួងការងារ និងបណ្ដុះបណ្ដាលវិជ្ជាជីវៈ បានអនុញ្ញាតឱ្យកម្មករ និយោជិត ទាំងអស់ ឈប់សម្រាក​ដោយ​មានប្រាក់ឈ្នួល ក្នុងឱកាសព្រះរាជពិធីបុណ្យ​អុំទូក បណ្ដែតប្រទីប និងសំពះព្រះខែ អកអំបុក ខាងមុខ ក្នុងរយៈពេល៤ថ្ងៃ ។

ក្នុងសេចក្តីជូនដំណឹងរបស់ក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ការឈប់សម្រាកនេះ នឹងចាប់ផ្ដើមនៅថ្ងៃទី៣០-៣១-០១-និងថ្ងៃទី២ ខែវិច្ឆកា ឆ្នាំ២០២០ ជំនួសឱ្យថ្ងៃទី១ ដែលចំត្រូវថ្ងៃ​អាទិត្យ​។

យ៉ាងណាក៏ដោយ ក្រសួងបាន​បញ្ជាក់​ថា ចំពោះរោងចក្រ សហគ្រាស ទាំងឡាយណា ដែល​កម្មវត្ថុ​អាជីវ​កម្ម​មាន​ចរិត​លក្ខណៈ​សកល​ត្រូវ​ប្រព្រឹត្ត​ទៅជាប្រចាំ និងមិនអាច​បញ្ឈប់​សកម្មភាព​បាន ហើយការឈប់​សម្រាកបុណ្យនៃកម្មករនិយោជិតទាំងអស់ព្រមគ្នាក្នុងពេលតែមួយនាំឱ្យខូចប្រយោជន៍ដល់សាធារណជន ឬក៏ធ្វើឱ្យខូចដំណើរការរបស់រោងចក្រ សហគ្រាស នោះ ម្ចាស់ត្រូវរៀបចំបែងចែកឱ្យកម្មករ និយោជិត បាន​ឈប់សម្រាកទៅតាមថ្ងៃបុណ្យនីមួយៗដោយ​ផ្លាស់ប្ដូរ​គ្នា ខណៈកម្មករនិយោជិត ដែលធ្វើការ​ថ្ងៃឈប់​បុណ្យ​នេះ មាន​សិទ្ធិ​ទទួលនូវប្រាក់បំណាច់បន្ថែមដែលមានចំនួនស្មើនឹង​ប្រាក់ឈ្នួល​ថ្ងៃ​ធ្វើការ​ធម្មតា៕