ព័ត៌មានជាតិ

បេក្ខជន និងអាណាព្យាបាលគាំទ្ររដ្ឋាភិបាលអនុញ្ញាតឲ្យជាប់បាក់ឌុបទាំងអស់គ្នា

បានផុស

៦ years មុន

នៅ

ថ្ងៃព្រហស្បតិ៍ ១៧ ធ្នូ ២០២០

ដោយ

សមាគមគ្រឹះស្ថានឧត្តមសិក្សាកម្ពុជា អាណាព្យាបាលនិងបេក្ខជនប្រឡងបាក់ឌុបបានសំដែងនូវការ គាំទ្រចំពោះរាជរដ្ឋាភិបាល និងក្រសួងអប់រំយុវជននិងកីឡា ដែលបានអនុញ្ញាតឲ្យបេក្ខជនប្រឡងឌីប្លូមនិងបាក់ឌុប ជាប់ដោយស្វ័យប្រវត្តិដោយមិនមានការប្រឡង។

លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជាបានមានប្រសាសន៍ នៅព្រឹកថ្ងៃទី១៧ ខែធ្នូនេះថា «ការអនុញ្ញាតឲ្យសិស្សប្រឡងជាប់ដោយស្វ័យប្រវត្តិគឺសមស្របណាស់ សម្រាប់ប្រទេសយើងស្ថិតក្នុងសម័យកូវីដនេះ។ ហើយការឲ្យជាប់ទាំងអស់គ្នាហ្នឹងក៏ជាក្តីមហាករុណាដ៏វិសេសវិសាលរបស់សម្តេចនាយករដ្ឋមន្ត្រីរបស់យើងហើយដែលលោកបានអនុគ្រោះលើបញ្ហាហ្នឹង»។

លោកបានបន្តថា សមាគមគាំទ្រជានិច្ចចំពោះការប្រឡងបាក់ឌុបថ្នាក់ជាតិនេះ ព្រោះយើងយល់ច្បាស់ថា ការចំណាយថវិកាតិចទទួលបានផលច្រើន។

លោកបានបន្តទៀតថា «ក្នុងសម័យឯកឧត្តម ហង់ ជួនណារ៉ុន ទៀតលោកបានធ្វើបាក់ឌុបគឺល្អហ្មងខ្ញុំនៅតែគាំទ្រអីចឹង។ ប៉ុន្តែធ្វើម៉ិចសម័យកូវីដ១៩ យើងមិនអាចប្រឡងកើត យើងមិនអាចពន្យាៗបន្តទៀតបានទេ»។

លោកបានលើកឧទាហរណ៍មកបញ្ជាក់ថា ឧបមាថាក្រសួងធ្វើស្រាប់តែផ្ទះកូវីដ១៩ តើអ្នកណាជាអ្នកទទួលខុសត្រូវ គឺរដ្ឋាភិបាលដដែលទេ។គ្រាន់តែព្រឹត្តិការណ៍ថ្ងៃទី០៣វិច្ឆិកា និងព្រឹត្តិការណ៍២៨វិច្ឆិការដ្ឋាភិបាលត្រូវចំណាយថវិកាប៉ុន្មាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានលើកឡើងថា«សូមចាត់ទុកជាឆ្នាំស៊យសម្រាប់បេក្ខជនយើងតែជាថ្នូរមកវិញនូវសេចក្តីសុខសម្រាប់ឪពុកម្តាយបងប្អូនបានជួបជុំគ្នាសង្គមខ្មែរប្រទេសជាតិទាំងមូលបានសុខនៅមិនទាន់មានស្លាប់ដោយសារកូវីដ១៩នៅឡើយទេនៅស្រុកគេមានស្លាប់ច្រើន។សូមអាណាព្យាបាលនិងសិស្សមេត្តាយល់យោគ»។

កញ្ញា អ៊ីម ស្រីម៉ី រៀននៅសាលាវិទ្យាល័យ ហ៊ុន សែន អង្គស្នួល បានបង្ហាញចំណាប់អារម្មណ៍ថា «ចំពោះខ្ញុំផ្ទាល់យល់ថា ការសម្រេចឲ្យបេក្ខជនប្រឡងជាប់ដោយស្វ័យប្រវត្តិនេះក៏ជាជម្រើសត្រឹមត្រូវដែរព្រោះស្ថានភាពប្រទេសកំពុងតែតានតឹង រដ្ឋាភិបាលសម្រេចបែបនេះក៏ព្រោះតែគិតពីសុវត្ថិភាពរបស់សិស្សានុសិស្សជាចំបង ណាមួយក៏ជាជម្រើសដ៏សមស្របសម្រាប់សិស្សានុសិស្សរួមទាំងរដ្ឋាភិបាល»។

យ៉ាងណាក៏ដោយកញ្ញាយល់ថាការសម្រេចបែបនេះ ក៏មានការប៉ះពាល់ដល់ផ្លូវចិត្តរបស់សិស្សដែលខំរៀនមួយចំនួនដែរ ព្រោះពួកគាត់មិនបានដឹងពីសមត្ថភាពដែលខំរៀនអស់រយៈពេល១២ឆ្នាំមិនបានទទួលលទ្ធផលដែលរំពឹងទុក។

ចំណែក កញ្ញា សេង សុវណ្ណនីកា រៀននៅវិទ្យាល័យព្រែកដំបូក ស្រុកស្រីសន្ធរខេត្តកំពង់ចាម បានសំដែងការរីករីករាយ ចំពោះសិស្សផ្សេងៗទៀតដែលបានជាប់ទាំងអស់គ្នា។ កញ្ញាបានបន្តថា«វាត្រូវតែអីចឹងហើយឲ្យធ្វើម៉ិចបើមានបញ្ហាកូវីដ១៩»។

រីឯអាណាព្យាបាលមួយចំនួននៅរាជធានីភ្នំពេញ បានលើកឡើងស្រដៀងគ្នាថា រដ្ឋាភិបាលឲ្យជាប់ទាំងអស់គ្នា ក៏ជាការល្អប្រសើរដែរ ព្រោះបញ្ហាកូវីដ១៩ នៅមិនទាន់ចប់នៅឡើយ បើនៅតែបន្តពន្យាទៀតនោះក៏មិនកើតដែរ។ដូចនេះមានតែឲ្យជាប់ទាំងអស់គ្នាទៅហើយស្វែងរកសាលារៀនរៀនរៀងៗខ្លួនទៅ។

កាលពីល្ងាចថ្ងៃទី១៦ ខែធ្នូ ឆ្នាំ២០២០ក្រសួងអប់រំយុវជននិងកីឡាបានសម្រេចឱ្យបេក្ខជនបាក់ឌុប និងឌីប្លូមឆ្នាំនេះ «ជាប់ស្ថាពរទាំងអស់»តាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ប៉ុន្តែមិនមានការកំណត់និទ្ទេសទេ៕

អត្ថបទ ៖ សំអឿន

Related Topics:ប្រឡងបាក់ឌុប