Connect with us

ព័ត៌មានជាតិ

៤ខែឆ្នាំនេះ ខ្យល់កន្ត្រាក់បណ្តាលឲ្យមនុស្សស្លាប់និងរបួសជិត២០នាក់ និងបំផ្លាញផ្ទះជិត២០០០ខ្នង

បានផុស

នៅ

មន្ត្រីជាន់ខ្ពស់គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា នៅក្នុងរយៈពេល៤ខែដើមឆ្នាំ២០២២នេះបាតុភូតខ្យល់កន្ត្រាក់បានបណ្តាលឱ្យរលំ និងខូខាតផ្ទះសម្បែងជិត២០០០ខ្នង និងបណ្តាលឱ្យមនុស្សស្លាប់និងរបួសជិត២០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍នៅព្រឹកថ្ងៃទី០៥ ខែឧសភានេះថា ចាប់ពីខែមករា រហូតមកដល់ខែមេសា ឆ្នាំ២០២២នេះ បាតុភូតខ្យល់កន្ត្រាក់បានកើតឡើងចំនួន៦០លើកបណ្តាលឱ្យរលំផ្ទះចំនួន៣៥៨ខ្នង របើកដំបូលផ្ទះចំនួន១៤៨៤ខ្នង សាលារៀន១៤ខ្នង អគាររដ្ឋបាល៤កន្លែង ស្លាប់មនុស្ស២នាក់ ដោយម្នាក់នៅខេត្តកណ្តាល និងម្នាក់ទៀតនៅខេត្តសៀមរាប និងរងរបួសចំនួន១៦នាក់។

លោក ឃុន សុខា បានបន្តថា ចំនួននេះបើប្រៀបធៀបទៅនឹងរយៈពេលដូចគ្នាឆ្នាំ២០២១កន្លងទៅឃើញថា មានប្រហាក់ប្រហែលគ្នា តែករណីស្លាប់និងរបួសមានការកើនឡើងបន្តិច។ លោកបានបន្តទៀតថា នៅក្នុងរយៈពេល៤ខែដើមឆ្នាំ២០២១បាតុភូតខ្យល់កន្ត្រាក់បានកើតឡើងចំនួន៦១លើក បណ្តាលឲ្យរលំផ្ទះនិងខូខាតធ្ងន់ធ្ងរចំនួន២០៩ខ្នងរបើកដំបូលផ្ទះចំនួន១៣២០ខ្នង សាលារៀនចំនួន១០ខ្នងអគាររដ្ឋបាលចំនួន៥ស្លាប់មនុស្ស១នាក់និងរបួសចំនួន៨នាក់។

លោក ឃុន សុខា បានបញ្ជាក់ថា ប៉ុន្តែបើធៀបទៅនឹងឆ្នាំ២០២០ឃើញថា មានការថយចុះ ខណៈ៤ខែឆ្នាំ២០២០មានបាតុភូតខ្យល់កន្ត្រាក់បានកើតឡើងចំនួន៧៦លើកបណ្តាលឲ្យរលំផ្ទះចំនួន៥៣២ខ្នងរបើកដំបូលផ្ទះចំនួន២៩៤១ខ្នងសាលារៀន២១ខ្នងអគាររដ្ឋបាលចំនួន១៦កន្លែងមនុស្សស្លាប់២នាក់និងរបួស២៩នាក់។

លោក ឃុន សុខា បានឱ្យដឹងទៀតថា នៅឆ្នាំនេះរដូវវស្សាហាក់មានការលឿនជាងឆ្នាំមុន ដោយសារការប្រែប្រួលអាកាសធាតុដែលធ្វើឱ្យមានភ្ញៀងធ្លាក់ច្រើន។ យ៉ាងណាក៏ដោយ លោកបានអះអាងថា ស្ថានភាពគ្រោះធម្មជាតិនាពេលនេះ មានសភាពប្រហាក់ប្រហែលនឹងដើមឆ្នាំ២០២១កន្លងទៅដែរ ពោលគឺមិនធ្ងន់ធ្ងរពេកទេ។

លោក ឃុន សុខា បានអំពាវនាវដល់បង្អូនប្រជាពលរដ្ឋមានការប្រុងប្រយ័ត្នចំពោះខ្យល់កន្ត្រាក់ និងរន្ទះបាញ់ដែលតែងតែកើតមាននៅក្នុងរដូវភ្លៀងធ្លាក់ញឹកញាប់៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម