ព័ត៌មានជាតិ

ស្រុកខ្មែរមានរថយន្តអគ្គិសនី ១៤៨ គ្រឿង ចុះបញ្ជីនៅក្រសួងសាធារណការ

បានផុស

៤ years មុន

នៅ

ថ្ងៃសុក្រ ២៧ ឧសភា ២០២២

ដោយ

រដ្ឋមន្រ្តីក្រសួងសាធារណការនិងដឹកជញ្ជូនបានបញ្ជាក់ថា រថយន្តអគ្គិសនីដែលចុះបញ្ជីនៅក្រសួងសាធារណការបានកើនឡើងដល់ ១៤៨ គ្រឿង។ ត្រឹម ៥ ខែដើមឆ្នាំ ២០២២ មានរថយន្តអគ្គិសនី ៨៤ គ្រឿង បានទៅចុះបញ្ជី ខណៈរដ្ឋាភិបាលបានដាក់គោលការណ៍ត្រឹមឆ្នាំ២០៥០ រថយន្ត ៤០ភាគរយនឹងដំណើរការដោយថាមពលអគ្គិសនី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន ចាន់ថុល រដ្ឋមន្រ្តីក្រសួងសាធារណការបានឲ្យដឹងថា សព្វថ្ងៃចរន្តការប្រើប្រាស់រថយន្តអគ្គិសនីកើនឡើងច្រើនជុំវិញពិភពលោក ខណៈក្រសួងបានរៀបចំគោលនយោយបាយដឹកជញ្ជូន ក្នុងនោះក៏មានការប្រើប្រាស់អគ្គិសនីផងដែរ។

លោកបន្តថា ក្នុងរយៈពេល ៥ ខែឆ្នាំ២០២២ រថយន្តអគ្គិសនីដែលចុះបញ្ជីមានចំនួន ៨៤ គ្រឿង បើប្រៀបធៀបនៅឆ្នាំ២០២១ មានតែ ៩ គ្រឿង ដែលនេះមានការកើនឡើងជាង ៨០០ ភាគរយ។

ដើម្បីសម្រួលដល់ការប្រើប្រាស់រថយន្តអគ្គិសនី ក្រសួងសាធារណការបានសហការជាមួយ UNDP ដំឡើងស្ថានីយសាកថាមពលបានពីរកន្លែងគឺមួយនៅក្រសួងសាធារណការ និងមួយទៀតនៅខេត្តព្រះសីហុន។ ដោយឡែក្រសួងក៏កំពុងរៀបចំដំឡើងស្ថានីយសាកថាមពលនៅខេត្តបាត់ដំបង និងនៅខេត្តសៀមរាបបន្តទៀត។

លោករដ្ឋមន្រ្តីបានបន្ថែមថា ក្រសួងសាធារណការបានសហការជាមួយដៃគូឯកជន លើការបំពាក់ស្ថានីយសាកថាមពលដោយថ្មីៗនេះស្ថានីយសាំងកាល់តិច ក៏បំពាក់ស្ថានីយសាកថាមពលនៅទីតាំងសាខាទី ៥០ របស់ខ្លួនផងដែរ។ ដោយឡែកបណ្តាញស្ថានីយសាំងផ្សេងៗក៏បានយល់ព្រមដូចជាស្ថានីយភីធីធី ស្ថានីយតូតាល ក៏ដូចជាស្ថានីយតេឡា។

លោកថា ក្រុមហ៊ុនភីធីធី គ្រោងដាក់ពីរកន្លែងតាមផ្លូវល្បឿនលឿនទៅខេត្តព្រះសីហនុ ខណៈស្ថានីយផ្សេងៗក៏កំពុងសិក្សាលើការរៀបចំបំពាក់ស្ថានីយសាកថ្មនៅទីតាំងរបស់ខ្លួន។

លោករដ្ឋមន្ត្រីបានបញ្ជាក់ថា ក្រសួងកំពុងសហការជាមួយ UNDP ដើម្បីរៀបចំផែនការមេ ដើម្បីដាក់មណ្ឌលបញ្ចូលថាមពលនៅទូទាំងប្រទេស ដើម្បីសម្រួលការប្រើប្រាស់រថយន្តអគ្គិសនីនៅកម្ពុជា៕

អត្ថបទ៖ ប៊ុណ្ណារ៉ា