ទូតប៉ាគីស្ថាន៖ ក្រុងព្រះសីហនុ នឹងក្លាយជាតំបន់ទេសចរណ៍យ៉ាងពិតប្រាកដនៅថ្ងៃខាងមុខ

លោក Zaheeruddin Babar Thaheem ឯកអគ្គរដ្ឋទូតប៉ាគីស្ថាន ប្រចាំព្រះរាជាណាចក្រកម្ពុជា សង្ឃឹមថា ក្រុងព្រះសីហនុ នឹងក្លាយជាតំបន់ទេសចរណ៍យ៉ាងពិតប្រាកដនៅថ្ងៃខាងមុខ ដោយសារទីក្រុងនេះមានការអភិវឌ្ឍនូវហេដ្ឋារចនាសម្ព័ន្ធថ្មីៗ គួរឱ្យទាក់ទាញជាច្រើន។

ការលើកឡើងរបស់លោកឯកអគ្គរដ្ឋទូតប៉ាគីស្ថាននេះ បានធ្វើឡើងកាលពីរសៀលថ្ងៃទី៥ ខែកក្កដា ឆ្នាំ២០២២ នៅក្នុងជំនួបពិភាក្សាការងារជាមួយលោក គួច ចំរើន អភិបាលនៃគណៈអភិបាលខេត្តព្រះសីហនុ។

លោកឯកអគ្គរដ្ឋទូតប៉ាគីស្ថានបានមានប្រសាសន៍ថា នេះជាលើកទី២ ដែលលោកធ្វើដំណើរមកកាន់ខេត្តព្រះសីហនុហើយឃើញថា ទីក្រុងនេះមានការអភិវឌ្ឍរីកចម្រើនខ្លាំងមានដូចជា ឆ្នេរសមុទ្រ ផ្លូវ និងហេដ្ឋារចនាសម្ព័ន្ធជាច្រើនទៀត។

លោកបានបន្តថា ខេត្តព្រះសីហនុ មានសក្តានុពលវិនិយោគ និងទេសចរណ៍ជាទីក្រុងថ្មី ដែលមានអាកាសយានដ្ឋានអន្តរជាតិ អាចទទួលយន្តហោះធុនធំមកពីបណ្តាប្រទេសចុះចតបាន ផ្លូវល្បឿនលឿនអាចទាក់ទាញស្រូបយកភ្ញៀវទេសចរកាន់តែច្រើននាពេលខាងមុខ។ ហើយកំពង់ផែទឹកជ្រៅវាបានផ្តល់សក្តានុពលសេដ្ឋកិច្ចជាទីក្រុងហិរញ្ញវត្ថុនាពេលខាងមុខផងដែរ។ លោកសង្ឃឹមថា ក្រុងព្រះសីហនុ នឹងក្លាយជាតំបន់ទេសចរណ៍យ៉ាងពិតប្រាកដនៅថ្ងៃខាងមុខ ហើយនៅមានកត្តាជាច្រើនផ្សេងទៀតជួយលើកកម្ពស់សក្តានុពលរបស់ប្រទេសកម្ពុជា។

នៅក្នុងជំនួបនោះលោក គួច ចំរើន បានមានប្រសាសន៍ថា រាជរដ្ឋាភិបាលកម្ពុជាបានកំណត់ខេត្តព្រះសីហនុ
ជាតំបន់សេដ្ឋកិច្ចពិសេសគំរូពហុបំណង និងជាតារារះនាទិសនារតី។ រាជរដ្ឋាភិបាលបានផ្តល់ហិរញ្ញប្បទានអភិវឌ្ឍខេត្តព្រះសីហនុ មានដូចជា ផ្លូវថ្នល់ ភ្លើងបំភ្លឺផ្លូវ សួនច្បារ លំហរឆ្នេរសាធារណៈ បន្ទប់ទឹកសាធារណៈ អាងប្រព្រឹតកម្មទឹកកខ្វក់ និងរូបសំណាកបដិមា បង្កើនការទាក់ទាញភ្ញៀវទេសចរ។ ការអភិវឌ្ឍថ្មីៗបន្ថែមទៀត រួមមានការងារស្តាអូរ ប្រឡាយ និងការសាងសង់ទីលានចាក់សំរាម ជាដើម។

លោកអភិបាលខេត្តបានបន្តថា ខេត្តព្រះសីហនុមានសក្តានុពលជាច្រើនដូចជា កំពង់ផែទឹកជ្រៅ ស្រូបយកទំនិញកុងតឺន័រ ៧០ភាគរយក្នុងប្រទេសកម្ពុជា បច្ចុប្បន្នរាជរដ្ឋាភិបាល បានសហការជាមួយរាជរដ្ឋាភិបាលជប៉ុន តាមរយៈJICA កសាងពង្រីកទីលានកុងតឺន័រ និងផែដែលមានជំរៅទឹករហូត១៣,៥០ម៉ែត្រគ្រោងនឹងបញ្ចប់ការសាងសង់នៅឆ្នាំ២០២៥ មានសមត្ថភាពអាចឱ្យនាវាមានចំណុះ៥ម៉ឺនតោនចូលចតបាន។ អាកាសយានដ្ឋានអន្តរជាតិបានពង្រីកផ្លូវរត់​រហូត​៣,៤០០ម៉ែត្រ អាចឱ្យយន្តហោះប្រភេទធំហោះឆ្លងទ្វីបចុះចតបាន និងកំពុងបន្តសាងសង់ស្ថានីយចេញដំណើរឱ្យកាន់តែមានភាពទាក់ទាញបន្ថែមទៀត។

លើសពីនេះទៀត រាជរដ្ឋាភិបាលបានសាងសង់ផ្លូវល្បឿនលឿនពីភ្នំពេញមកកាន់ខេត្តព្រះសីហនុ និងគ្រោងបញ្ចប់នៅ​ខែ១០​ ឆ្នាំ២០២២ ខាងមុខ។ មិនត្រឹមប៉ុណ្ណោះខេត្តព្រះសីហនុមានឆ្នេរសមុទ្រប្រវែង១៧៥គីឡូម៉ែត្រនិងមានកោះចំនួន ៣២ផងដែរ។

លោកអភិបាលខេត្តបានបន្តទៀតថា ខេត្តព្រះសីហនុ មានការវិនិយោគពីវិនិយោគិនបរទេស និងភ្ញៀវទេសចរបរទេស ហើយសង្ឃឹមថា ក្រោយបញ្ចប់ជំងឺកូវីដ-១៩ អ្នកវិនិយោគ និងទេសចរនឹងមកកាន់ខេត្តព្រះសីហនុកាន់តែច្រើនជាក់ជាមិនខាន។

ក្នុងឱកាសនោះ លោក Zaheeruddin Babar Thaheem បានស្នើសុំការអនុញ្ញាតចូលចត នាវាយោធារបស់ប្រទេសប៉ាគីស្ថាននៅកំពង់ផែស្វយ័តក្រុងព្រះសីហនុ នៅចុងខែកក្កដា ឆ្នាំ២០២២ ខាងមុខនេះ និងសុំអញ្ជើញលោកអភិបាលខេត្តព្រះសីហនុចូលរួមក្នុងកម្មវិធីចូលចតនាវាយោធាប៉ាគីស្ថាននៅកំពង់ផែស្វយ័តក្រុងព្រះសីហនុផងដែរ៕

អត្ថបទ៖ សំអឿន