ថ្លៃដោះមីនពីផ្ទៃដី ក្នុងមួយម៉ែត្រការ៉េ ចាយលុយអស់ប៉ុន្មាន?

លោកទេសរដ្ឋមន្រ្តី លី ធុជ អនុប្រធានទី ១ អាជ្ញាធរមីន បានឱ្យដឹងថា ផ្ទៃដីដោះមីនក្នុងមួយម៉ែត្រក្រឡា ប្រើប្រាស់ថវិកា អស់ ៩០០រៀល ទៅ ១០០០រៀល។ លោក បានលើកឡើងទៀតថា ពលរដ្ឋអាចចំណាយថវិការបស់​ខ្លួនបរិច្ចាគត្រឹម ១ពាន់រៀល គឺអាចរួមចំណែកជួយបោស​សម្អាតមីនចេញពីកម្ពុជា បាន ១ម៉ែត្រក្រឡា។ ការលើកឡើងរបស់ប្រធានអាជ្ញាធរមីនដូចនេះ នៅក្នុងសន្និសីទ​សារព័ត៌មានរសៀលថ្ងៃទី ០៧ ខែ កក្កដា ឆ្នាំ ២០២២។

បើតាមលោក លី ធុជ គិតមកដល់ពេលនេះ មានសម្បុរសជនប្រមាណជាង​ ១ម៉ឺននាក់ បានបរិច្ចាគប្រាក់ ដើម្បីយុទ្ធនា​ការនៅកម្ពុជា ដោយគិតជាថវិកាប្រមាណជាង ១៥លានដុល្លារហើយ។ លោកស្នើឱ្យពលរដ្ឋចូលរួមបន្ថែម​ទៀត ទោះ ១ដុល្លារ ឬ២ដុល្លារក្តី គឺមានតម្លៃទាំងអស់។

លោកទេសរដ្ឋមន្រ្តី បានគូសបញ្ជាក់ថា រយៈពេលជាង ៣០ឆ្នាំមកនេះ មានប្រជាជនស្លូតត្រង់រងគ្រោះដោយសារមីន​ប្រមាណ ៦៣ ០០៣នាក់។ ក្នុងនោះស្លាប់ចំនួន ១៩ ៨១៨នាក់ របួសចំនួន ៣៦ ១០៨ នាក់ ពិការចំនួន ៩ ០៧៧នាក់។

គិតចាប់ពីឆ្នាំ ១៩៩២ ដល់ខែ ឧសភា ឆ្នាំ ២០២២ អាជ្ញាធរមីន បានបោសសម្អាតផ្ទៃដីមីនបានចំនួន ២៤១០ គីឡូម៉ែត្រ ដែលមានមីនប្រឆាំងមនុស្ស ១ ១៤០ ៧៩៤គ្រាប់ មីនតោនចំនួន ២៦ ០៤៣ គ្រាប់ និងសំណល់ជាតិផ្ទុះពីសង្គ្រាម ៣ ០០៣ ៨៣៥គ្រាប់។ អាជ្ញាធរមីន គ្រោងបោសសម្អាតមីនឱ្យអស់ពីកម្ពុជា ត្រឹមឆ្នាំ ២០២៥ខាងមុខ៕