លោក គន់ គីម៖ ខេត្តចំនួន ១៦ទទួលរងគ្រោះ​ដោយទឹកជំនន់ប៉ះពាល់ផ្ទះជិត១៦០០ខ្នង

លោកទេសរដ្ឋមន្រ្តី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍ថា ទឹកជំនន់ និងជំនន់ទឹកភ្លៀងមួយរយៈពេលចុងក្រោយនេះ បានបណ្តាលឱ្យប៉ះពាល់ដល់ខេត្តចំនួន១៦នៅទូទាំង​ប្រទេសបង្កឱ្យលិចផ្ទះប្រជាពលរដ្ឋជិត១៦០០ខ្នងនិងដំណាំស្រូវជាង៤ម៉ឺនហិកតានិងហេដ្ឋារចនាសម្ព័ន្ធមួយចំនួនទៀត។

តាមរយៈសារសំឡេងនៅព្រឹកថ្ងៃទី១៣សីហានេះ លោកទេសរដ្ឋមន្រ្តី គន់ គីម បានបន្តថាគិត្រឹមថ្ងៃទី១៣នេះ បរិមាណទឹក​ភ្លៀងបានធ្លាក់ពីកម្រិតមធ្យមទៅច្រើនស្ទើរជារៀងរាល់ថ្ងៃនៅក្នុងក្របខណ្ឌទូទាំងប្រទេស ចាប់ពីខែ ឧសភា រហូតមកដល់បំណាច់ខែមិថុនា គូបផ្សំនឹងការទប់ទ្វារទឹកពីអាងស្តុកទឹក និងវារីអគ្គិសនីមួយចំនួនបានបង្កឱ្យមានការលិច​លង់នៅតាមបណ្តាខេត្តចំនួន១៦រួមមានខេត្តត្បូងឃ្មុំ ព្រះសីហនុ កោះកុង កំពត កែប បាត់ដំបង ពោធិសាត់ កំពង់ឆ្នាំង កំពង់ធំ សៀមរាប ក្រចេះ បន្ទាយមានជ័យ ព្រះវិហារ ឧត្តរមានជ័យ មណ្ឌលគីរីនិងរតនគីរី។

លោកទេសរដ្ឋមន្ត្រីបានបន្តទៀតថា ទឹកជំនន់នេះ បានបង្កឱ្យប៉ះពាល់ដល់ប្រជាពលរដ្ឋចំនួន២៧០៨គ្រួសារស្មើនឹង​ប្រជាជនជាង៤៩០០នាក់ ជម្លៀសប្រជាពលរដ្ឋ២៧៧គ្រួសារនៅខេត្តរតនគីរី លិចផ្ទះប្រជាពលរដ្ឋចំនួន១៥៩០​ខ្នងក្នុងនោះ ខូចខាត៤៥ខ្នង លិចសាលារៀន៤កន្លែង វត្តអារាម៤កន្លែងនិងប៉ះពាល់ស្រូវជាង៤ម៉ឺនហិកតា​ក្នុងនោះខូចខាតប្រមាណជាង១ម៉ឺនហិកតា ។

យ៉ាងណាក៏ដោយ លោកទេសរដ្ឋមន្ត្រីបានបន្ថែមថា ទឹកជំនន់នេះមិនទាន់មានស្ថានភាពធ្ងន់ធ្ងរនៅឡើយទេ។ ប៉ុន្តែយោងតាមការព្យាការណ៍របស់ក្រសួងជំនាញភ្លៀងនឹងបន្តធ្លាក់ពីតិចទៅច្រើន រយៈពេល២ខែទៅមុខជាបន្តទៀត ដែលបញ្ហានេះ នឹងបង្កឱ្យមានការខូចខាតកាន់តែធ្ងន់ជាងមុនដោយសារតែប្រភពទឹកនានា មានពេញប្រៀបនៅតាម​ទីវាលក៏មានកម្រិតពេញដែលអាចបង្កហានិភ័យផងដែរ។

គណៈកម្មាធិការជាតិគ្រប់គ្រងគ្រោះមហន្តរាយ បានត្រៀមរួចរាល់ហើយក្នុងការជួយសង្គ្រោះ​ដល់ប្រជាពលរដ្ឋនៅតាម​បណ្តា​​ខេត្តដែលមានបញ្ហាទឹកជំនន់កើតឡើងក្នុងមានក្រុមជួយសង្គ្រោះចំនួន១៦កង មានកម្លាំងរាប់ពាន់នាក់ សម្ភារៈ​ផ្សេងៗដូចជា ទូក ថ្នាំពេទ្យ ដើម្បីជួយសង្គ្រោះប្រជាពលរដ្ឋឱ្យបានទាន់ពេលវេលាដោយមិន​ឱ្យប្រជាពលរដ្ឋរងគ្រោះ​ណាម្នាក់ជួបគ្រោះថ្នាក់នោះឡើយ។ នេះជាការបន្ថែមរបស់លោក គន់ គីម។

លោកទេសរដ្ឋមន្ត្រីបានឱ្យដឹងទៀតថាទឹកជំនន់នៅតាមបណ្តាខេត្តទាំង១៦នេះគឺតាមខេត្តនីមួយៗអាចដោះស្រាយបានដោយមិនចាំបាច់ឱ្យថ្នាក់ជាតិជួយអន្តរាគមន៍នោះទេដោយសារទឹកជំនន់មានទ្រង់ទ្រាយតូចហើយតាមខេត្តមានកម្លាំងគ្រប់គ្រាន់ក្នុងការជួយប្រ ជាពលរដ្ឋដូចជាជម្លៀសប្រជាពលរដ្ឋទៅទីទួលសុវត្តិភាពជាដើម។

លោកទេសរដ្ឋមន្ត្រីបានបន្ថែមទៀតថា ក្រៅពីនេះក្រុមស្បៀងអាហារ និងពូជស្រូវ ដំណាំផ្សេងៗ ក៏បានត្រៀមរួចរាល់ដែរ​ដើម្បីចុះវាយតកម្លៃផលដំណាំដែលប៉ះពាល់ ដើម្បីជួយផ្តល់ជូនប្រជាពលរដ្ឋពេលទឹកស្រក អាចឱ្យប្រជាពលរដ្ឋ​ដាំដុះឡើងវិញផងដែរ៕ សំអឿន