ក្រសួងរៀបចំដែនដី បាននិងកំពុងជំរុញការអនុវត្តគម្រោងសាងសង់លំនៅឋានតម្លៃសមរម្យជាង ៨ពាន់ខ្នង

ក្រសួងរៀបចំដែនដី នគរូបនីយកម្ម និងសំណង់ បាននិងកំពុងជំរុញការអនុវត្តគម្រោងសាងសង់លំនៅឋានតម្លៃសមរម្យចំនួន ៤គម្រោង នៅរាជធានីភ្នំពេញ និងខេត្តកណ្ដាល ដោយមានក្រុមហ៊ុនចំនួន ៤ កំពុងអនុវត្តគម្រោងទាំងនេះ។

លោក ថេង ច័ន្ទសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងរៀបចំដែនដី នគរូបនីយកម្ម និងសំណង់” នាព្រឹកថ្ងៃទី ២៤ ខែសីហានេះថា អនុវត្តតាមគោលនយោបាយរបស់រាជរដ្ឋាភិបាល ក្នុងការលើកកម្ពស់សិទ្ធិទទួលបាន លំនៅឋានតម្លៃសមរម្យរបស់ប្រជាពលរដ្ឋ ក្រសួងបាននិងកំពុងជំរុញការអនុវត្តគម្រោងសាងសង់ចំនួន ៤គម្រោង ស្ថិតនៅរាជធានីភ្នំពេញ និងខេត្តកណ្ដាល មានចំនួន ៨,៣៣១ខ្នង និងចំណែកឯកជនចំនួន ២,៩៦០ខ្នង ដូចខាងក្រោម៖

-ក្រុមហ៊ុន WorldBridge Home Co.,Ltd អភិវឌ្ឍគម្រោង “លំនៅឋានទីក្រុងរណបសិរីមង្គល” ចំនួន ២,៤៥៧ខ្នង លើផ្ទៃដីទំហំ ២៤ហិកតា ស្ថិតនៅភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្ដាល។ ក្រុមហ៊ុននេះ បានបញ្ចប់គម្រោងដំណាក់កាលទី ១ និងបានប្រគល់លំនៅឋានចំនួន ៦៨០ខ្នង ជូនប្រជាពលរដ្ឋនៅថ្ងៃទី ៩ ខែមេសា ឆ្នាំ ២០២០ ហើយការសាងសង់ដំណាក់កាលទី ២ សម្រេចបាន ៩៥ភាគរយ។

-ក្រុមហ៊ុន B & BM Development Co.,Ltd អភិវឌ្ឍគម្រោង “បុរីសែនមនោរម្យព្រែកតាទែន” ចំនួន ៥, ៣៤០ខ្នង លើផ្ទៃដីទំហំ ៨០ហិកតា ស្ថិតនៅភូមិស្លែងដីដុះ ឃុំព្រែកតាទែន ស្រុកពញា​ឮ ខេត្តកណ្ដាល សម្រេចបាន ៩៣ភាគរយ។

-ក្រុមហ៊ុន ARAKAWA Co.,Ltd អភិវឌ្ឍគម្រោង “លំនៅឋានអារ៉ាខាវ៉ា” ចំនួន ២,៩៦០។ ចំណែកឯកជនលើផ្ទៃដីទំហំ ១៣,៦៨០ម៉ែត្រក្រឡា ស្ថិតនៅភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ក្នុងនោះ ដំណាក់កាលទី ១ សម្រេចបាន ១០០ភាគរយ និងដំណាក់កាលទី ២ សម្រេចបាន ៧៧ភាគរយ។

-ក្រុមហ៊ុន ប៊ីអជីភី ប្រផឹធី ឌីវេឡុបម៉ិន ឯ.ក អភិវឌ្ឍ “បុរីហ្គ្រេនផាក” ចំនួន ៥៣៤ខ្នង លើផ្ទៃដីទំហំ ៥,១៦ហិកតា ស្ថិតនៅភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ។ ក្នុងនោះ ដំណាក់កាលទី ១ សម្រេចបាន ១០០ភាគរយ និងដំណាក់កាលទី ២ សម្រេចបាន ១៣ភាគរយ៕

អត្ថបទ៖ ឃួន សុភ័ក្រ