អាកាសចរស៊ីវិល៖ ការហោះហើរ​រវាងកម្ពុជា-ចិន កើនឡើងគុណនឹង៣

បច្ចុប្បន្នការហោះហើររវាងកម្ពុជា និងចិន មានកំណើនឡើងវិញ គុណនឹងបី បន្ទាប់ពីការរាតត្បាតជំងឺកូវីដ-១៩ បានធូរស្បើយ។ នេះជាការលើកឡើងរបស់លោក ស៊ិន ចាន់សិរីវត្ថា អ្នកនាំពាក្យអាកាសចរស៊ីវិល នៅក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់រដ្ឋលេខាធិការដ្ឋានអាកាសចរស៊ីវិល” ព្រឹកថ្ងៃទី ១៦ ខែ កញ្ញា ឆ្នាំ ២០២២។

លោក ស៊ិន ចាន់សិរីវត្ថា បានលើកឡើងថា ក្នុងអំឡុងពេលវិបត្តិកូវីដ-១៩ ការហោះហើរទៅមករវាងកម្ពុជាចិន មានតែ ៣ជើងប៉ុណ្ណោះ ខណៈបច្ចុប្បន្ន ការហោះហើរ មានភាពល្អប្រសើរ ដោយមានចំនួន ១៥ ជើងក្នុងមួយសប្តាហ៍។

ចំណែកការលក់សំបុត្រយន្តហោះទៅមកកម្ពុជា ចិន ក្នុងពេលមានភាពតានតឹងនៃកូវីដ-១៩ លោកបញ្ជាក់ថា មានតម្លៃរហូតដល់ ១ម៉ឺនដុល្លារ ខណៈបច្ចុប្បន្ន សំបុត្រទៅមក តម្លៃជាង ១ពាន់ដុល្លារប៉ុណ្ណោះ។

ចិន គឺជាទីផ្សារដ៏ធំ ហើយសំខាន់របស់កម្ពុជា។ នៅក្នុងឆ្នាំ ២០១៩ ការហោះហើររបស់ចិន ចូកម្ពុជា មានទៅដល់ ៣៥ភាគរយ ពោលគឺមានចំនួនច្រើនជាងការហោះហើររបស់ប្រទេសផ្សេងៗទៀត៕

អត្ថបទ៖ នាង រតនៈ