ក្រុមគ្រូពេទ្យបារាំងនឹងចុះពិនិត្យព្យាបាលជំងឺទូទៅ មិនយកកម្រៃ ជូនពលរដ្ឋនៅស្រុកព្រៃនប់

ក្រុមគ្រូពេទ្យស្ម័គ្រចិត្ត នៃសមាគមបេសកកម្មមនុស្សធម៌របស់ប្រទេសបារាំង សហការជាមួយសមាគមបេសកកម្មមនុស្សធម៌នៅកម្ពុជា នឹងចុះពិនិត្យព្យាបាលជំងឺទូទៅ ដោយមិនយកកម្រៃ ជូនបងប្អូនប្រជាពលរដ្ឋដែលរស់នៅក្នុងស្រុកព្រៃនប់ ចាប់ពីថ្ងៃទី២២ ដល់ថ្ងៃទី២៣ ខែកញ្ញា ឆ្នាំ២០២២ នៅទីស្នាក់ការគណបក្សប្រជាជនកម្ពុជាស្រុកព្រៃនប់ ស្ថិតក្នុងភូមិបឹងវែង ឃុំវាលចេញ ស្រុកព្រៃដប់ ខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ី ធារិន អភិបាល នៃគណៈអភិបាលស្រុកព្រៃនប់ បានឱ្យដឹងនៅក្នុងសេចក្តីជូនដំណឹង ចុះថ្ងៃទី១៦ ខែកញ្ញានេះ ដោយសូមបងប្អូនប្រជាពលរដ្ឋជ្រាបជាព័ត៌មាន និងសូមមកទទួលការពិនិត្យព្យាបាលជំងឺទូទៅតាមកាលបរិច្ឆេទ និងទីតាំងដែលបានជម្រាបជូនខាងលើ។

ជាមួយគ្នានេះលោកអភិបាស្រុកក៏បានណែនាំឱ្យបងប្អូនប្រជាពលរដ្ឋត្រូវគោរពឱ្យបានម៉ឺងម៉ាត់នូវវិធានការ ៣កុំ ៣ការពារ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្តី្រ នៃព្រះរាជាណាចក្រកម្ពុជា និងវិធានការនានារបស់ក្រសួងសុខាភិបាល។ លោកអភិបាលស្រុកបានបញ្ជាក់ថា រដ្ឋបាលស្រុកព្រៃនប់សង្ឃឹមយ៉ាងមុតមាំថា បងប្អូនប្រជាពលរដ្ឋនឹងចូលរួមអនុវត្តតាមខ្លឹមសារខាងលើ ដោយស្មារតីទទួលខុសត្រូវខ្ពស់៕

អត្ថបទ៖ សំអឿន