ទណ្ឌិតជិត ៤០០ នាក់ត្រូវបានស្នើសុំបន្ធូរបន្ថយ និងលើកលែងទោសក្នុងពិធីបុណ្យអុំទូក និងបុណ្យឯករាជ្យជាតិ

លោក គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌បានឱ្យដឹងថា ក្នុងឱកាសពិធីបុណ្យអុំទូក បណ្តែត​ប្រទីប និងសំពះព្រះខែ និងពិធីបុណ្យឯករាជ្យជាតិខាងមុខនេះគណៈកម្មការជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោសបានបញ្ជូនសំណើគោរពជូនសម្តេចតេជោនាយករដ្ឋមន្ត្រី ដើម្បីពិនិត្យ និងសម្រេចស្នើសុំព្រះមហាក្សត្រផ្តល់ការអនុគ្រោះទោសដល់ទណ្ឌិតសរុបចំនួន ៣៨១ នាក់ក្នុងនោះស្រី ៣០ នាក់។

តាមរយៈប្រព័ន្ធតេឡេក្រាមនៅថ្ងៃទី ៥វិច្ឆិកានេះ លោក គឹម សន្តិភាពបានសរសេរថា ក្នុងចំណោមទណ្ឌិតចំនួន៣៨១​នាក់ត្រូវបានស្នើសុំបន្ធូរបន្ថយទោស និងលើកលែងទោសក្នុងពិធីបុណ្យអុំទូកនិងបុណ្យ-បន្ថយទោស ៣ ខែ ដល់ទណ្ឌិតចំនួន ២៦៨ នាក់ (ស្រី ២១ នាក់)

-បន្ថយទោស ៦ ខែ ដល់ទណ្ឌិតចំនួន ៨១ នាក់ (ស្រី ០៨ នាក់)

-បន្ថយទោស ៩ ខែ ដល់ទណ្ឌិតចំនួន ២៦ នាក់ (ស្រី ០០ នាក់)

-បន្ថយទោស ១២ ខែ ដល់ទណ្ឌិតចំនួន ០៥ នាក់ ( ០០ នាក់)

-ស្នើសុំលើកលែងទោស ចំនួន ០១ នាក់ (ស្រី ០១ នាក់)។

កាលពីថ្ងៃទី ០៦ ខែតុលាឆ្នាំ ២០២២កន្លងទៅនេះ ទណ្ឌិតចំនួន ៦៨៣នាក់ក្នុងនោះស្រី ៦៤នាក់ ត្រូវបានពន្ធនាគារ និងមណ្ឌលកែប្រែរាជធានីខេត្តធ្វើសំណើទៅក្រសួងយុត្តិធម៌សុំលើកលែងទោស និងបន្ធូរបន្ថយទោសក្នុងឱកាសពិធីបុណ្យអុំទូក បណ្តែតប្រទីប និងសំពះព្រះខែ និងបុណ្យឯករាជ្យជាតិ ឆ្នាំ២០២២។

គួរបញ្ជាក់ថា ព្រះរាជាណាចក្រកម្ពុជាបានកំណត់យកពិធីបុណ្យចំនួន០៥សំរាប់ស្នើសុំបន្ធូរបន្ថយទោស និងលើកលែងទោសឲ្យទណ្ឌិតក្នុងនោះមាន៖ ១.ទិវាជ័យជម្នះលើរបបប្រល័យពូជសាសន៍ ៧ មករា។ ២.ពិធីបុណ្យចូលឆ្នាំថ្មីប្រពៃណីជាតិខ្មែរ។ ៣.ពិធីបុណ្យវិសាខបូជា។ ៤.ពិធីបុណ្យឯករាជ្យជាតិ និង៥.ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ៕

អត្ថបទ៖ សំអឿន