Connect with us

ព័ត៌មានជាតិ

រដ្ឋមន្ត្រីការងារ ជំរុញក្រុមប្រឹក្សាអាជ្ញាកណ្តាលត្រូវដោះស្រាយវិវាទបុគ្គល និងវិវាទការងាររួមប្រកបដោយតម្លាភាព និងយុត្តិធម៌

បានផុស

នៅ

លោកបណ្ឌិត អ៊ិតសំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានជំរុញឲ្យក្រុមប្រឹក្សាអាជ្ញាកណ្តាលត្រូវដោះស្រាយវិវាទបុគ្គលនិងវិវាទការងាររួម ឈរលើគោលការណ៍តម្លាភាពនិងយុត្តិធម៌ពោល គឺធ្វើយ៉ាងណាឱ្យគ្រប់ភាគីអាចទទួលយកបានទាំងអស់គ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងបើកសិក្ខាសាលាពិគ្រោះយោបល់ត្រីភាគី ស្តីពីនីតិវិធីនៃការដោះស្រាយវិវាទបុគ្គល ដោយក្រុមប្រឹក្សាអាជ្ញាកណ្តាលនៅព្រឹកថ្ងៃទី១៥វិច្ឆិកានៅសណ្ឋាគារភ្នំពេញ លោក បណ្ឌិត អ៊ិតសំហេង បានមានប្រសាសន៍ថា «ជាធម្មតានៅពេលមានវិវាទកើតឡើងមិនមានភាគីណាមួយថាខ្លួនឯងខុសទេគឺសុទ្ធតែរកត្រូវរៀងៗខ្លួនហើយពេលដោះស្រាយបញ្ចប់អ្នកឈ្នះតែងតែថាយុត្តិធម៌រីឯអ្នកចាញ់ថាអយុត្តិធម៌។អានេះជារឿងធម្មជាតិតែយ៉ាងណាយើងត្រូវធ្វើឱ្យភាគច្រើនអាចទទួលយកបានហើយកន្លងមកក្រុមប្រឹក្សាអាជ្ញាកណ្តាលត្រូវបានដោះស្រាយដោយមាន៧០ភាគរយគ្រប់ភាគីអាចទទួលយកបានគឺល្អហើយនិងក្រសួងការងារកាត់សេចក្តី៥០ទៅ៦០ទទួលយកបានក៏ល្អដែរ»។

លោករដ្ឋមន្ត្រី បានជំរុញឲ្យក្រុមប្រឹក្សាអាជ្ញាកណ្តាល ត្រូវបង្កើនយន្តការដោះស្រាយជាបន្តទៀត ព្រោះថាបើឱ្យរកយុត្តិធម៌១០០ភាគរយមិនអាចរកបានទេសូម្បីតែព្រះក៏មិនអាចធ្វើបានដែរ។ដូចនេះវិស័យការងារក៏កុំសង្ឃឹមថា បាន ១០០​ភាគរយដែរ។

លោករដ្ឋមន្ត្រីបានបន្តទៀតថា« អ្វីដែលយើងធ្វើថ្ងៃនេះគឺយកសៃវៀនសង្គម យកការចចារជាសមូលហភាពឬការចចារត្រីភាគីបូករបស់យើងនេះគឺជាយន្តការសំខាន់ក្នុងការរៀបចំនូវក្របខណ្ឌគតិយុត្តក៏ដូចជាគោលនយោបាយនានាដើម្បីធានាថាបើទោះបីជាក្រសួងចេញសេចក្តីប្រកាសហើយនៅពេលនោះប្រកាសនោះទាំងអស់គ្នាអាចទទួលយកបាននិងចូលរួមអនុវត្តទាំងអស់គ្នា។អីចឹងទេខ្ញុំសង្ឃឹមថាបញ្ហាវិវាទបុគ្គលត្រូវបានដោះស្រាយដោយយន្តការកាន់តែមានប្រសិទ្ធភាព»។

លោករដ្ឋមន្ត្រីបានរំលឹកថា«កាលពី១០ឆ្នាំមុនយើងមិនស្រមៃថាយើងអាចអង្គុយស្រងំស្ងៀមទេព្រោះថាថ្ងៃណាក៏មានបាតុកម្ម៣ទៅ៥រោងចក្រដែរហើយនិយោជកនិងសហជីពមានកង្វល់ក្នុងការដោះស្រាយបញ្ហារៀងៗខ្លួនដៃគូពាក់ព័ន្ធនានាក៏បានស្នើសុំមកក្រសួងការងារជាបន្តបន្ទាប់។អីចឹងហើយបានជានៅឆ្នាំ២០១៣ពេលដែលខ្ញុំមកកាន់ជារដ្ឋមន្ត្រីក្រសួងការងារនេះបានកំណត់យកនូវយុទ្ធសាស្ត្រអាទិភាពទី១គឺសុខុដុមរមណីយកម្មទំនាក់ទំនាក់វិជ្ជាជីវៈ។១០ឆ្នាំមកនេះបញ្ហាទាំងនេះត្រូវបានឆ្លើយតបនិងដោះស្រាយកង្វល់នេះជាបណ្តើរៗរហូតមកដល់ឥឡូវនេះ»។

យ៉ាងណាក៏ដោយ លោករដ្ឋមន្ត្រីបានបន្ថែមថាវាមិនមានន័យថាយើងអាចបញ្ចប់វិវាទបានទាំងអស់នោះទេព្រោះថាវិវាទការងារមិនអាចបញ្ចប់បាននិងធ្វើឱ្យសូន្យនោះទេប៉ុន្តែសំខាន់គឺពេលវាកើតត្រូវមានយន្តការដោះស្រាយនិងឆ្លើយតបដោយយុត្តិធម៌ដល់គ្រប់ភាគីវិវាទទទួលយកបានទាំងអស់គ្នា។

លោករដ្ឋមន្ត្រីបានបញ្ជាក់ថា« ឥឡូវយើងបានបោះជំហានមួយជំហានទៀតចេញពីវិវាទរួមមកដោះស្រាយវិវាទបុគ្គលដែលបញ្ហានេះបន្ថែមភារកិច្ចទៅក្រុមប្រឹក្សាអាជ្ញាកណ្តាលហើយការចូលរួមរបស់យើងទាំងអស់គ្នានឹងជួយផ្តល់យុត្តិធម៌ដល់ពិភពលការងាររបស់យើងជូនដល់កម្មករនិយោជិតនិងនិយោជកក្នុងវិវាទនានាកើតឡើង»។

លោករដ្ឋមន្ត្រីបានឱ្យដឹងទៀតថាការរៀបចំសិក្ខាសាលានេះ គឺជាការបន្តអនុវត្តនូវយន្តការត្រីភាគី និងការជំរុញកិច្ចសន្ទនាសង្គម សំដៅសម្រេចឱ្យបាននូវការពិគ្រោះយោបល់គ្រប់ជ្រុងជ្រោយនិងពេញលេញ ដែលជាតម្រូវការរបស់ត្រីភាគី និងភាគីពាក់ព័ន្ធក្នុងវិស័យការងារពិសេសដើម្បីបង្ហាញនូវចំណុចស្នូលលើនីតិវិធីនៃការដោះស្រាយវិវាទបុគ្គលដោយក្រុមប្រឹក្សាអាជ្ញាកណ្តាល និង ប្រមូលធាតុចូលបន្ថែមពីគ្រប់ភាគីពាក់ព័ន្ធ ដើម្បីរៀបចំឱ្យបាននូវនីតិវិធីនៃការដោះស្រាយវិវាទបុគ្គលដោយក្រុមប្រឹក្សាអាជ្ញាកណ្តាលប្រកបដោយប្រសិទ្ធភាពនិងភាពជឿទុកចិត្តបានពីគូភាគីវិវាទ សំដៅបន្តធានានូវគុណតម្លៃទាំង៣ របស់ក្រុមប្រឹក្សាអាជ្ញាកណ្តាលក្នុងការដោះស្រាយវិវាទការងាររួម។

លោកបណ្ឌិត អ៊ិត សំហេង លើកឡើងថា ការធានានូវភាពសុខដុមរមនាក្នុងទំនាក់ទំនងវិជ្ជាជីវៈ គឺជាយុទ្ធសាស្រ្តអាទិភាពដែលត្រូវបានកំណត់នៅក្នុងផែនការយុទ្ធសាស្រ្តអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ២០១៩-២០២៣ ដើម្បីចូលរួមចំណែកសម្រេចឱ្យបានជោគជ័យនូវយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាល នីតិកាលទី៦ នៃរដ្ឋសភា។

លោករដ្ឋមន្ត្រីបានបញ្ជាក់បន្ថែមថាក្នុងន័យនេះ ក្រោមការប្តេជ្ញាចិត្តខ្ពស់របស់ថ្នាក់ដឹកនាំនិងមន្ត្រីរាជការក្រោមឱវាទក្រសួងការងារ និងបណ្តុះបណ្តាលវិជ្ជាជីវៈ ទំនាក់ទំនងវិជ្ជាជីវៈ នៅកម្ពុជាក្នុងរយៈពេល១០ឆ្នាំចុងក្រោយនេះត្រូវបានទទួលស្គាល់ថាកាន់តែមានភាពចាស់ទុំ ដែលធានាបាននូវភាពសុខដុមរមនា និងភាពទាក់ទាញសម្រាប់វិនិយោគិនជាតិ និងអន្តរជាតិ។ អត្រាសះជានៅក្នុងការដោះស្រាយវិវាទការងារដោយមន្ត្រីផ្សះផ្សាវិវាទនៃក្រសួងការងារ និងបណ្តុះបណ្តាលវិជ្ជាជីវៈ មានការកើនឡើងជាលំដាប់ ដែលកត្តានេះសរបញ្ជាក់ឱ្យឃើញអំពីប្រសិទ្ធភាពនិងសមត្ថភាពរបស់មន្ត្រីផ្សះផ្សាវិវាទនិងភាពចាស់ទុំនៅក្នុងទំនាក់ទំនងវិជ្ជាជីវៈ។

លោករដ្ឋមន្ត្រី បញ្ជាក់ទៀតថា វិវាទការងាររួមដែលដោះស្រាយមិនសះជាដោយមន្ត្រីផ្សះផ្សាវិវាទនៃក្រសួងការងារ និងបណ្តុះបណ្តាលវិជ្ជាជីវៈ ត្រូវបានបញ្ជូនទៅក្រុមប្រឹក្សាអាជ្ញាកណ្តាលដើម្បីដោះស្រាយ។ ជាមួយគ្នានេះ ក្រុមប្រឹក្សាអាជ្ញាកណ្តាលត្រូវបានទទួលស្គាល់ថាជាស្ថាប័នដោះស្រាយវិវាទការងារក្រៅប្រព័ន្ធតុលាការ ដែលបានដោះស្រាយសះជាក្នុងអត្រា ៧០%នូវវិវាទការងាររួមដែលក្រសួងបានបញ្ជូនទៅ។

នៅក្នុងសិក្ខាសាលានេះ លោករដ្ឋមន្ត្រីបានធ្វើការណែនាំនូវចំណុចមួយចំនួនសម្រាប់គ្រប់ភាគីធ្វើការពិនិត្យ ពិចារណា និងលើកយោបល់ ក៏ដូចជាសំណើដំណោះស្រាយ រួមមាននីតិវិធីក្នុងការដោះស្រាយវិវាទបុគ្គលដោយក្រុមប្រឹក្សាអាជ្ញាកណ្តាលដូចជា ប្រភេទវិវាទបុគ្គល, ចំនួនអាជ្ញាកណ្តាល, សិទ្ធិតំណាងរបស់ភាគីវិវាទ, រយៈពេលនៃការដោះស្រាយ, ប្រភេទសេចក្តីបង្គាប់, និងបន្ទុកភស្តុតាងនិង ការដាក់ឱ្យដំណើរការការដោះស្រាយវិវាទបុគ្គលដោយក្រុមប្រឹក្សាអាជ្ញារួមមានកត្តាធនធានមនុស្ស, កត្តាសម្ភារៈ និងកត្តាហិរញ្ញវត្ថុរបស់ក្រុមប្រឹក្សាអាជ្ញាកណ្តាល៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

កីឡា៣ ម៉ោង មុន

សំបុត្រ VIP ទស្សនាការប្រកួតរវាង Messi និង Ronaldo តម្លៃខ្ពស់កប់ក្ដោង

ព័ត៌មានជាតិ៣ ម៉ោង មុន

ក​.​ប​.​ប ចុះ​ពិសោធន៍​ផលិតផល​ត្រី​ប្រ​ម៉ា​ហើម​និង​ត្រីងៀត​គ្រប់​ប្រភេទ​នៅ​ស្រុក​ក្រគរ​រក​ពុំ​ឃើញ​មាន​សារ​ធាតុគីមី

ព័ត៌មានជាតិ៤ ម៉ោង មុន

មន្ទីរសាធារណការខេត្តបន្ទាយមានជ័យចុះផ្សព្វផ្សាយច្បាប់ចរាចរណ៍ផ្លូវគោក ដើម្បី​ជំនួយស្មារតី​ដល់​អ្នកបើកបរ

ជីវិតកម្សាន្ដ៤ ម៉ោង មុន

ស្ថាប័ន Miss Grand ថៃ ប្រកាសមិនអនុញ្ញាតឱ្យអតីត Miss Universe ចូលរួមប្រកួតកម្មវិធីរបស់ខ្លួន

ព័ត៌មានជាតិ៤ ម៉ោង មុន

ទេសរដ្ឋមន្ត្រី លី ធុជ ចាត់​ទុក​ជំនួយ​របស់​ចិន គឺជា​ផ្នែក​ដ៏​សំខាន់​ក្នុង​ដំណើរការ​ឆ្ពោះទៅ​កម្ពុជា​គ្មាន​មីន​ឆ្នាំ​២០២៥

Sokha Hotels

ព័ត៌មានពេញនិយម