សម្ដេច ស ខេង ប្រកាសថា ក្រុមការងារហិរញ្ញវត្ថុអន្តរជាតិ ប្រឆាំងការសម្អាតប្រាក់ ដកកម្ពុជា​ពីបញ្ជីប្រផេះហើយ

សម្តេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានប្រកាសថា ក្រុមការងារហិរញ្ញវត្ថុអន្តរជាតិ ប្រឆាំងការសម្អាតប្រាក់ (FATF) បានសម្រេចដកកម្ពុជា ចេញពីបញ្ជីប្រផេះ ប្រឆាំងការស្អាតប្រាក់ហើយ។ សម្ដេច ស ខេង ប្រកាសបែបនេះ នៅក្នុងពិធីបើកសន្និបាតក្រសួងមហាផ្ទៃ នៅព្រឹកថ្ងៃទី២២ ខែកម្ភៈ ឆ្នាំ២០២៣។ ដោយសម្តេចអះអាងថា ទទួលដំណឹងនេះពីលោក កើត រិទ្ធ រដ្ឋមន្រ្តីក្រសួងយុត្តិធម៌ ដែលរាយការណ៍ជូនសម្ដេច កាលពីថ្ងៃទី ២១ កុម្ភៈ។ បើតាមសម្តេច ស ខេង ចំពោះការប្រកាសជាផ្លូវការនឹងធ្វើឡើងនៅវេលាម៉ោង ១០ ថ្ងៃទី ២៣ កុម្ភៈ ស្អែកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈដំណឹង​ដ៏ល្អនេះ សម្តេច ស ខេង បានថ្លែងអបអរសាទរចំពោះការសម្រេចរបស់ FATF និងបានដាក់​ចេញទិសដៅការងារគន្លឹះបន្តទៀត ដើម្បីការពារនូវលទ្ធផលល្អនេះឱ្យបានជារៀងរហូត ពោលគឺមិនបណ្ដោយឱ្យកម្ពុជា វិលមកធ្លាក់ក្នុងបញ្ជីប្រផេះលើការងារប្រឆាំងការសម្អាតប្រាក់ជាថ្មីទៀតឡើយ។

ជាមួយគ្នានេះ សម្តេចក្រឡាហោម ស ខេង ក៏បានក្រើនរម្លឹកដល់ភាគីពាក់ព័ន្ធទាំងអស់ មិនត្រូវមានមោទកភាពជ្រុល រហូតបោះបង់ចោលកិច្ចការងារប្រឆាំងការសម្អាតប្រាក់ និងត្រូវខិតខំប្រឹងប្រែងរួមសាមគ្គីគ្នា បន្តការងារនេះបន្ថែមទៀត៕