កីឡាការិនី ខាន់ ចេសា ឧបត្ថម្ភថវិកា ១ពាន់ដុល្លារជូនកាកបាទក្រហមកម្ពុជា

បន្ទាប់ពីទទួលបានមេដាយមាសមួយគ្រឿង និងប្រាក់មួយគ្រឿង សម្រាប់ការប្រកួតក្នុងព្រឹត្តិការណ៍ស៊ីហ្គេមជូនកម្ពុជា គ្រាប់ពេជ្រកម្ពុជាកញ្ញា ខាន់ចេសា បានឧបត្ថម្ភថវិកាចំនួន១ពាន់ដុល្លារជូនកាកបាទក្រហមកម្ពុជា។

គ្រាប់ពេជ្រកម្ពុជា​ ខាន់ ខេសា បានប្រកួត​​ក្នុងព្រឹត្តិការណ៍ស៊ីហ្គេមដែលលើវិញ្ញាសា Ne-Waza NOGI ទម្ងន់-៥២​គីឡូក្រាម Ne-Waza GI ទម្ងន់-៥២​គីឡូក្រាម។ កញ្ញា ទទួលបានមេដាយមាសមួយគ្រឿង និងប្រាក់មួយគ្រឿងជូនកម្ពុជា ក្នុងនាមកម្ពុជាជាម្ចាស់ផ្ទះ។ កីឡាការិនីរូបនេះ មកកម្ពុជាមិនត្រឹមតែក្នុងនាមជាអត្តពលិកប៉ុណ្ណោះទេ កញ្ញា ខាន់ ចេសា ក៏បានចូលរួមក្នុងពិធីសប្បុរសធម៌ដែរ ដោយជួយឧបត្ថម្ភថវិកាចំនួន ១០០០ដុល្លារ ជូនដល់កាកបាទក្រហមកម្ពុជា ក្នុងឱកាសខួបទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៣ ក្រោមប្រធានបទ “រួមគ្នាជាមួយកាកបាទក្រហមកម្ពុជា ដើម្បីបរិយាបន្នសង្គម”។

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានចេញបណ្ណថ្លែងអំណរគុណយ៉ាងជ្រាលជ្រៅចំពោះកញ្ញា ខាន់ ចេសា ដែលបានឧបត្ថម្ភថវិកាចំនួន ១០០០ដុល្លារ ជូនកាកបាទក្រហមកម្ពុជាក្នុងឱកាស​ខួបទី​១៦០នេះ។

សូមជម្រាបថា កីឡាការិនី ខាន់ ចេសា វ័យ២២ឆ្នាំ ជាកូនខ្មែរ-អាមេរិក គឺជាកីឡាការិនីជីជីតស៊ូ ជម្រើសជាតិកម្ពុជា ដែលមានភាពល្បីល្បាញខ្លាំងទាំងនៅលើឆាកជាតិ និងអន្តរជាតិ ជាពិសេស ក្នុងឱកាសកម្ពុជា ជាម្ចាស់ផ្ទះនៃព្រឹត្តិការណ៍កីឡាស៊ីហ្គេម លើកទី៣២នេះ កញ្ញា ខាន់ ចេសា បានឈ្នះមេដាយ និងផ្តួលគូប្រកួតយ៉ាងអស្ចារ្យ ធ្វើឱ្យមុខមាត់កម្ពុជាកាន់តែល្បីល្បាញនៅលើឆាកអន្តរជាតិថែមទៀត៕