រដ្ឋាករទឹកខេត្តបាត់ដំបង ច្រានចោលការចោទប្រកាន់លើការចាក់ដីក្នុងស្ទឹងសង្កែ ដែលជាទីតាំងកំពុងសាងសង់រោងចក្រប្រព្រឹត្តកម្មទឹកស្អាត

ថ្មីៗនេះមានបណ្តាញសង្គមមួយចំនួន បាននឹងកំពុងបំពុលទៅតាមការបង្ហាញតាមរយ: google បន្ទាប់ពីមានរីសតមួយកន្លែងបានបំពានទៅលើដីច្រាំងស្ទឹងសង្កែត្រង់ចំណុចភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង រួចមក។

បន្ទាប់ពីក្រុមការងារបានចុះទៅបញ្ជាអោយម្ចាស់រីសតធ្វើការកាយយកអាចម៍ដីចេញពីក្នុងស្ទឹង និងបញ្ជាអោយវ៉ៃវេ​រ៉ង់​ដាចោលរួចមក ស្រាប់តែមានគណនីហ្វេសប៊ុកចំនួន២ បានបង្ហោះថា មានមួយកន្លែងទៀតដែលបានចាក់ដីចូលទៅក្នុងស្ទឹងសង្កែដូចគ្នា គឺគណនីហ្វេសប៊ុកឈ្មោះ Sakoun Sok និង ស៊ិន វណ្ណឌី ដោយបង្ហោះគ្មានការចុះសិក្សា និងគ្មានការពិចារណា ដោយគ្រាន់តែមើលនឹងភ្នែកតាមរយ: google តែប៉ុណោះ ។

រដ្ឋាករទឹកខេត្តបាត់ដំបង បញ្ជាក់ថា ធាតុពិតការចាក់ដីចូលទៅក្នុងស្ទឹងសង្កែត្រង់ចំណុចភូមិកំពង់សីមា សង្កាត់វត្តគរ ក្រុងបាត់ដំបង គឺជាការដ្ឋានសាងសង់រោងចក្រប្រព្រឹត្តកម្មទឹកស្អាតរបស់អង្គភាពរដ្ឋាករទឹកបាត់ដំបង ដែលត្រូវបានប្រារព្ធពិធី បញ្ចុះបឋមសិលាបើកការដ្ឋានសាងសង់រោងចក្រប្រព្រឹត្តកម្មទឹកស្អាត ក្រោមអធិបតីភាពឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្រ្តីក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ កាលពីថ្ងៃទីថ្ងៃទី២៥ ខែមករា ឆ្នាំ២០២៣ កន្លងទៅ ដែលគម្រោងនេះ គឺជាកិច្ចព្រមព្រៀងឥណទានសម្បទានរវាងរដ្ឋាភិបាលកម្ពុជា និងធនាគារអភិវឌ្ឍន៍អាស៊ី (ADB) និងទីភ្នាក់ងារសម្រាប់ការអភិវឌ្ឍបារាំង (AFD) ដែលមានទឹកប្រាក់ប្រហែលជាង ៣៣,៦ លានដុល្លារអាមេរិក ដែលត្រូវសាងសង់រោងចក្រប្រព្រឹត្តិកម្មទឹកស្អាត។ 

ទីតាំងខាងលើ គឺជាស្ថានីយ៍សម្រាប់ទាញយកទឹកពីក្នុងស្ទឹងសង្កែ មិនខុសអីពីស្ថានីយ៍នៅវត្តលៀប និងនៅវត្តកណ្តឹងនោះឡើយ ហើយក្រោយពីសាងសង់រួចគេនឹងកាយអាចម៍ចេញដើម្បីអោយប្រព័ន្ធខ្សែទឹកហូរជាធម្មតា ដែលស្ថានីយ៍នេះ មានសមត្ថភាពផលិតទឹកស្អាត ៥០,០០០ ម៉ែត្រគូបក្នុងមួយថ្ងៃ ។ 

គម្រោងនេះ មានគោលដៅបំពេញបន្ថែមនូវតម្រូវការផ្គត់ផ្គង់ទឹកស្អាតដែលមានការខ្វះខាតសម្រាប់ក្រុងបាត់ដំបងទាំងមូល និងតាមឃុំនានា របស់ស្រុកពីរ គឺស្រុកថ្មគោល និងស្រុកសង្កែ ដែលមានព្រំប្រទល់ជាប់នឹងក្រុងបាត់ដំបង ដែលជាការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការសម្រេចឲ្យបាននូវផែនការអភិវឌ្ឍន៍វិស័យផ្គត់ផ្គង់ទឹកស្អាត ជូនដល់ប្រជាពលរដ្ឋតាមទីប្រជុំជនឲ្យបាន៨៥% នៅត្រឹមឆ្នាំ២០២៥ និង១០០% ត្រឹមឆ្នាំ២០៣០ ។

អាស្រ័យហេតុនេះ សូមសាធារណៈជន និងជាពិសេសម្ចាស់គណនីហ្វេសបូក Sakoun Sok និង ស៊ិន វណ្ណឌី សូមមេត្តាជ្រាប ដោយសិក្សាអោយបានត្រឹមត្រូវមុននឹងបង្ហោះអ្វីមួយ ជៀសវាងនូវការបង្ហោះព័ត៌មានក្លែងក្លាយ នាំអោយមានភាពភាន់ច្រឡំនៅក្នុងសង្គម៕

អត្ថបទ៖ សោ និយមរ័ត្ន