ត្រូវឆ្លងតែ ២ប្រទេសទៀតប៉ុណ្ណោះ បេសកកម្មជិះកង់រៃអង្គាសថវិកា លោក ទីវ តារារិទ្ធិ នឹងដល់គោលដៅ

ក្នុងដំណើរជិះកង់ដ៏វែងឆ្ងាយរបស់ លោក ទីវ តារារិទ្ធ តាមតំបន់ភូមិអាស៊ីអាគ្នេយ៍ ដើម្បីរៃអង្គាសថវិកាជូនដល់ មន្ទីរពេទ្យកុមារអង្គរ ចម្ងាយប្រមាណជិត ៨ពាន់គីឡូម៉ែត្រ លោកបានឆ្លងកាត់ប្រទេសតំបន់អាស៊ីជាច្រើន។ ក្នុងដំណើរបេសកកម្មនោះ លោកត្រូវឆ្លងកាត់ប្រទេស ២ទៀតប៉ុណ្ណោះ គឺម៉ាឡេស៊ី និង ថៃ មុននឹងបញ្ចប់នៅ​គោលដៅ​ចុងក្រោយ ទឹកដីនៃខេត្តសៀមរាប ក្នុងចម្ងាយសរុបជាង ​៩៧០០គីឡូ​ម៉ែត្រ ។

បើតាម លោក ទីវ តារារិទ្ធ កំណាត់ផ្លូវចុងក្រោយ ដែលលោកនឹងត្រូវបន្តដំណើរ គឺចេញពីប្រទេសសឹង្ហបុរី តាមបណ្តោយ ឆ្នេរសមុទ្រខាងកើតម៉ាឡេស៊ី ចូលទៅប្រទេសថៃ ដោយនឹងឆ្លងតាមឈូងសមុទ្រថៃ ទៅដីគោកវិញ នៅផ្នែកខេត្ត ឈុនបុរី។ លោកបន្តថា បន្ទាប់មក លោកនឹងបន្តជិះកង់ពីនោះ ទៅបញ្ចប់កម្មវិធីនៅគោលដៅចុងក្រោយ ខេត្តសៀមរាប។

ជុំវិញការធ្វើដំណើរនេះ លោកបញ្ជាក់ឱ្យដឹងដែរថា លោកនឹងធ្វើដំណើរតាមណាមួយ ក្នុងចំណោម កំពង់ចម្លង នៅខេត្តសុងខ្លា និងកំពង់ចម្លង កោះសាមុយ ដែលគេអនុញ្ញាតឱ្យលោកធ្វើដំណើរជាមួយកង់ ឆ្លងឈូងសមុទ្រថៃ ។

គួររំលឹកថា កម្មវិធីជិះកង់តាមតំបន់ភូមិភាគអាស៊ីអាគ្នេយ៍នេះ ធ្វើឡើងក្នុងគោលបំណង ដើម្បីរៃអង្គាសប្រាក់ជួយកុមារកម្ពុជា ដែលមានជំងឺមហារីក និងជំងឺផ្សេងៗ ដែលកំពុងសម្រាកព្យាបាល និងមានតម្រូវការព្យាបាល នៅមន្ទីពេទ្យកុមារអង្គរ Angkor Hospital for Children ។
គិតមកដល់ពេលនេះ ការជិះកង់ដើម្បីរៃអង្គាសប្រាក់ជួយកុមារកម្ពុជា របស់លោក ទីវ តារារិទ្ធ មានរយៈពេលជាង ២ខែហើយ រាប់ចាប់តាំងពីថ្ងៃដែលលោកចាប់ផ្តើមចេញដំណើរ នៅថ្ងៃទី០១ ខែមិថុនា ឆ្នាំ២០២៣ ដល់ថ្ងៃទី១១ ខែសីហា ឆ្នាំ២០២៣ ។

ក្នុងដំណើរដ៏វែងឆ្ងាយ តែម្នាក់ឯង លោកបានជួបឧបសគ្គជាច្រើនពិបាកនឹងពណ៌នា ព្រោះតែលោកត្រូវជិះកង់ឆ្លងកាត់ ទឹកដីដែលមិនធ្លាប់រស់នៅ មិនស្គាល់ភូមិសាស្ត្រច្បាស់ ហើយពឹងផ្អែកតែលើផែនទីអេឡិចត្រូនិចប៉ុណ្ណោះ ដែលភាគច្រើន Google Map នាំផ្លូវលោក ទៅតែតំបន់ព្រៃស្ងាត់គ្មានមនុស្ស។
លោកថា “តាំងតែចេញមកពីផ្ទះថ្ងៃដំបូង ខ្ញុំដឹងច្បាស់ថាខ្ញុំនឹងប្រឈមនឹងឧបសគ្គ និងគ្រោះថ្នាក់ជាច្រើន ប៉ុន្តែខ្ញុំដឹងថា ខ្ញុំអាចធ្វើការងារនេះបាន ដើម្បីកុមារកម្ពុជាជាច្រើន នៅមន្ទីពេទ្យកុមារអង្គរ Angkor Hospital for Children” ។

ទោះជាបែបនេះក្តី ​លោកនៅតែមានកម្លាំងចិត្ត នៅពេលដែលបានមើលឃើញពី​ការយកចិត្តទុកដាក់ ពីបងប្អូន​ប្រជាពលរដ្ឋ​កម្ពុជា ចំពោះរូបលោក។ លោកបានទម្លាយអារម្មណ៍តាមរយៈសំណេរមួយថា “ថ្ងៃខ្លះខ្ញុំជិះកង់បណ្តើរ ទឹកភ្នែករលីង​រលោង​បណ្តើរ ព្រោះរំភើបចិត្តខ្លាំងពេក ដោយបានមើលឃើញថា អ្នកទាំងអស់គ្នាបានយកចិត្តទុកដាក់ដល់ខ្ញុំ និងជាពិសេស គាំទ្រកម្មវិធីជិះកង់ដើម្បីកុមារកម្ពុជា ដោយបានបរិច្ចាគថវិកាផ្ទាល់ខ្លួនជួយដល់ពួកយើងនៅ មន្ទីពេទ្យកុមារអង្គរសៀមរាប” ។

គួរបញ្ជាក់ថា កម្មវិធីជិះកង់សប្បុរសធម៌ “Southest Asia Bike Touring for Charity” ក្នុងតំបន់អាស៊ីអាគ្នេយ៍ ដើម្បីរៃអង្គាសថវិកាជូនមន្ទីរពេទ្យកុមារអង្គរនេះ គឺមានការឯកភាពពីនាយកមន្ទីរពេទ្យកុមារអង្គរ វេជ្ជបណ្ឌិត ងួន ច័ន្ទភក្ត្រា ដោយចាប់​ផ្តើម​ពីថ្ងៃទី ០១ ខែមិថុនា រហូតដល់ថ្ងៃទី ៣១ ខែសីហា ឆ្នាំ២០២៣៕

អត្ថបទដោយ៖ សុធាវី