ឯកឧត្ដមបណ្ឌិត ហ៊ុន ម៉ាណែត ៖ យុទ្ធសាស្រ្ដបញ្ចកោណ-ដំណា​ក់​កាលទី ១ មានបេសកកម្មជាប្រវត្តិសាស្រ្ដចំបងចំនួន ២

ឯកឧត្ដមបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា បានឲ្យដឹងថា យុទ្ធសាស្រ្ដបញ្ចកោណ-ដំណា​ក់​កាលទី ១ មានបេសកកម្មជាប្រវត្តិសាស្រ្ដចំបងចំនួន ២សំខាន់ នោះគឺរក្សាសុខសន្តិភាព និងកសាងពង្រឹងមូលដ្ឋានគ្រឹះ សម្រាប់ជំរុញសន្ទុះនៃការអភិវឌ្ឍជាតិ។

ការឲ្យដឹងនេះ គ្រាដែលឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា បានអញ្ជើញជាអធិ​បតីភាពដ៏ខ្ពង់ខ្ពស់ ក្នុងកិច្ចប្រជុំពេញអង្គគណៈរដ្ឋមន្ត្រីលើកដំបូង សម្រាប់នីតិកាលទី ៧ នៃរាជរដ្ឋាភិបាល នាព្រឹកថ្ងៃទី ២៤ ខែសីហា​ ឆ្នាំ ២០២៣នេះ ដើម្បីដាក់ចេញនូវយុទ្ធសាស្រ្ដបញ្ចកោណ-ដំណាក់កាលទី ១។

ឯកឧត្ដមបណ្ឌិត ហ៊ុន ម៉ាណែត មានប្រសាសន៍ថា យុទ្ធសាស្រ្ដបញ្ចកោណ-ដំណាក់កាលទី ១ ដើម្បីកំណើនការងារ សមធម៌ ប្រសិទ្ធភាព និងចីរភាព មានបេសកកម្មជាប្រវត្តិសាស្រ្ដចំបងចំនួន ២ គឺ៖  

ទី១. រក្សាសុខសន្តិភាព ដែលសម្រេចបានមកដោយលំបាក ជាមួយនឹងការលះបង់មិនអាចកាត់ថ្លៃបាន និងពុនជ្រុំចលនានៃកំណើនសេដ្ឋកិច្ច និងការអភិវឌ្ឍជារួម។

ទី២. កសាងពង្រឹងមូលដ្ឋានគ្រឹះ សម្រាប់ជំរុញសន្ទុះនៃការអភិវឌ្ឍជាតិ ដែលឆ្លងកាត់បង្គោលចរនៃការប្រែខ្លួនជាប្រទេសមាន​ចំណូលមធ្យមកម្រិតខ្ពស់នៅឆ្នាំ ២០៣០ ឆ្ពោះទៅសម្រេចបាននូវចក្ខុវិស័យកម្ពុជាឆ្នាំ ២០៥០ តាមរយៈការកសាងភាពធន់ រឹងមាំនៃវិស័យទាំង ៥ ពោលគឺ ភាពធន់នៃវិស័យសាធារណៈ ភាពធន់នៃវិស័យសេដ្ឋកិច្ច ភាពធន់នៃវិស័យ ហិរញ្ញវត្ថុ ភាពធន់នៃវិស័យមូលធនមនុស្ស និងសង្គម និងភាពធន់វិស័យបរិស្ថាន និងការឆ្លើយតបទៅនឹងការប្រែប្រួលអាកាសធាតុ។

ឯកឧត្ដមបណ្ឌិត ហ៊ុន ម៉ាណែត បានបញ្ជាក់ថា​ យុទ្ធសាស្រ្ដបញ្ចកោណ-ដំណាក់កាលទី ១ ត្រូវបានដាក់ឲ្យអនុវត្តស្របតាមអភិក្រមចីរភាព នៃប្រព័ន្ធតួអង្គតែមួយដែលក្រសួង-ស្ថាប័នទាំងអស់ នៅក្រោមរចនាសម្ព័ន្ធរាជរដ្ឋាភិបាល ទាំងថ្នាក់ជាតិ និងថ្នាក់ក្រោមជាតិ ធ្វើការនៅក្នុងកិច្ចសហការ និងការសម្របសម្រួលរស់រវើក ប្រកបដោយថាមពល និងដោយបំពេញគ្នាទៅវិញទៅមក ព្រមទាំងបត់បែនតាមការប្រែប្រួល នៃបរិការណ៍ជាក់ស្ដែង ដើម្បីសម្រេចបាន​នូវគោលដៅអាទិ ភាព ដែលត្រូវបានដាក់ចេញ៕