កូនប្រុសលោក កែ គឹមយ៉ាន ត្រូវបានតែងតាំងជាអភិបាលរងខេត្តបន្ទាយមានជ័យ

លោក កែ សួនសុភាព ដែលជាកូនប្រុសរបស់លោក កែ គឹមយ៉ាន ត្រូវបានរាជរដ្ឋាភិបាលតែងតាំងជាអភិបាលរងខេត្តបន្ទាយមានជ័យ ខណៈអភិបាលរងម្នាក់ត្រូវផ្ទេរចេញ។ នេះបើយោងតាមអនុក្រឹត្យរបស់ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីកម្ពុជា ចុះថ្ងៃទី២៤ ខែសីហា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មាត្រា១ នៃអនុក្រឹត្យនេះ បានសម្រេចផ្ទេរភារកិច្ចលោក គឹង វណ្ណៈ ពីអភិបាលរងខេត្តបន្ទាយមានជ័យ ឱ្យមកបម្រើការ ងារនៅទីស្ដីការក្រសួងមហាផ្ទៃ។ មាត្រា២ នៃអនុក្រឹត្យដដែល បានសម្រេចតែងតាំងលោក កែ សួនសុភាព ឱ្យកាន់មុខតំណែងជាអភិបាលរងនៃគណៈអភិបាលខេត្តបន្ទាយមានជ័យ។

មុនទទួលបានការតែងតាំងជាអភិបាលរងខេត្តបន្ទាយមានជ័យ លោក កែ សួនសុភាព គឺជាមន្ត្រីនគរបាលជាតិ ឋានន្តរស័ក្តិឧត្តមសេនីយ៍ទោ ដែលមានតួនាទីជាអនុប្រធាននាយកដ្ឋានគ្រប់គ្រងសន្តិសុខឯកជន។ ប៉ុន្តែ នៅមុនមួយថ្ងៃនៃការតែងតាំងនេះ លោក កែ សួនសុភាព ត្រូវបានព្រះមហាក្សត្រនៃកម្ពុជា ត្រាស់បង្គាប់ផ្ទេរក្របខណ្ឌពីមន្ត្រីនគរបាលជាតិកម្ពុជា មកក្របខណ្ឌមន្ត្រីរដ្ឋបាលជាន់ខ្ពស់ក្រសួងមហាផ្ទៃ ដែលមានឋានន្តរស័ក្តិឧត្តមមន្ត្រី ថ្នាក់លេខ៣។

បច្ចុប្បន្ន លោក កែ សួនសុភាព ក៏កំពុងកាន់តួនាទីជាអនុប្រធានសហភាពសហព័ន្ធយុវជនកម្ពុជា ខេត្តបន្ទាយមានជ័យ និងជាប្រធានក្រុមការងារអភិវឌ្ឍន៍យុវជនខេត្តបន្ទាយមានជ័យផងដែរ៕

ដោយ៖ ធឿន វ៉ាន់សុង