​ទឹកតូចឆ្នាំនេះ មិនជាឧបសគ្គដល់ការរៀបចំពិធីបុណ្យអុំទូក

នៅសល់រយៈពេលប្រមាណជាង ២ ខែទៀត នឹងដល់ថ្ងៃរៀបចំព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅចាប់ពីថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៣។

លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម ប្រាប់កម្ពុជាថ្មីនៅថ្ងៃទី ២៨ ខែសីហា ឆ្នាំ ២០២៣នេះថា កម្ពស់ទឹកទន្លេនៅឆ្នាំនេះ មិនមានអ្វីប៉ះពាល់ រំខានទៅដល់ការរៀបចំពិធីបុណ្យអុំទូកនោះទេ។

លោកបញ្ជាក់ថា យើងនៅសល់រយៈពេលជាង ២ ខែទៀត​ បានផុតរដូវវស្សា ខណៈបើមើលទឹកបឹងទន្លេសាប នៅស្ថាយជលសាស្ត្របឹងទន្លេសាប-កំពង់ហ្លួង ទឹកមានកម្ពស់ជាង ៤ ម៉ែត្រ ថ្វីបើកម្ពស់ទឹកឆ្នាំនេះ តូចជាងបណ្ដាឆ្នាំកន្លងទៅ​ ប៉ុន្តែមិនធ្វើឱ្យរំខានទៅដល់ការរៀបចំពិធីបុណ្យអុំទូក អកអំបុក សំពះព្រះខែនោះទេ។

​បើតាមលោក ចាន់ យុត្ថា ជាធម្មតាទឹកទន្លេទាប ក្នុងពេលអុំល្បឿនទឹកហូរខ្សោយជាងធម្មតា ដែលធ្វើឱ្យអ្នកអុំតឹងដៃបន្តិច ប៉ុន្តែបើឱ្យរំខានរហូតដល់ការអុំមិនបាននោះមិនមានទេ ខណៈរដូវវស្សានៅប្រមាណជាង ២ ខែ ដូច្នេះ ផ្ទៃរងទឹកភ្លៀង​នៅមានភ្លៀងបន្តបន្ទាប់ ដែលធ្វើឱ្យទឹកអាចកើនឡើងមកវិញខ្លះ មិនឱ្យទឹកស្រកលឿន​ពេកដែរ៕