លោក ហេង សួរ ៖ ស្ថានភាពទីផ្សារការងារនៅកម្ពុជា មានភាពរឹងមាំដោយរក្សាបានអត្រាមានការងារធ្វើខ្ពស់

រដ្ឋមន្ត្រីក្រសួងការងារថ្មី បានបញ្ជាក់ថា ស្ថានភាពទីផ្សារការងារនៅកម្ពុជា មានភាពរឹងមាំដោយរក្សាបានអត្រាមានការងារធ្វើខ្ពស់ប្រមាណជា ៩៩ភាគរយ ហើយលក្ខខណ្ឌការងារ និងជីវភាពរស់នៅរបស់កម្មករ-និយោជិត មានភាពប្រសើរឡើងជាបន្តបន្ទាប់។

ការបញ្ជាក់នេះ​ បានធ្វើឡើងក្នុងពិធីសំណេះសំណាលរវាងឯកឧត្ដមបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា ជាមួយកម្មករ-និយោជិតចំនួន ១៨,០១៣នាក់ នៅខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី ២៩ ខែសីហា ឆ្នាំ ២០២៣។

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា បច្ចុប្បន្ននៅរាជធានីភ្នំពេញ មានរោងចក្រ-សហគ្រាសចំនួន ៩,៣២៣ មានកម្មករ-និយោជិតជាង ៦៦ម៉ឺននាក់ ដែលមានប្រាក់ឈ្នួលសរុបជាង ២ពាន់លានដុល្លារ ក្នុងមួយឆ្នាំ។

ក្នុងនោះ រោងចក្រ-សហគ្រាស វិស័យកាត់ដេរចំនួន ៧៣៤ មានកម្មករ-និយោជិតជាង ៣៤ម៉ឺននាក់ ដែលមានប្រាក់ឈ្នួលសរុបជាង ១ពាន់លានដុល្លារក្នុងមួយឆ្នាំ ហើយរាជធានីភ្នំពេញជាប៉ូលសេដ្ឋកិច្ចទីមួយ និងជាតំបន់ ដែលមានការអភិវឌ្ឍរោងចក្រ-សហគ្រាស ច្រើនជាងគេ។

លោករដ្ឋមន្ត្រីក្រសួងការងារ បានបញ្ជាក់បន្ថែមថា ស្ថានភាពទីផ្សារការងារនៅកម្ពុជា មានភាពរឹងមាំដោយរក្សាបាននូវអត្រាមានការងារធ្វើខ្ពស់ប្រមាណជា ៩៩ភាគរយ នៃកម្លាំងពលកម្មសរុបចំនួនប្រមាណ ១០,៨លាននាក់។

លោកបន្ថែមទៀតថា លក្ខខណ្ឌការងារ និងជីវភាពរស់នៅរបស់កម្មករ-និយោជិត មានភាពប្រសើរឡើងជាបន្តបន្ទាប់។ ជាក់ស្តែងប្រាក់ឈ្នួលអប្បបរមារបស់កម្មករ-និយោជិត បានកើនពី ៤០ដុល្លារ នៅឆ្នាំ ១៩៩៧ ដល់ ២០០ដុល្លារ ក្នុងឆ្នាំ ២០២៣៕