លោក ស ថេត ណែនាំឱ្យបន្តរឹតបន្តឹងការអនុវត្តច្បាប់ចរាចរណ៍ ដើម្បីលុបបំបាត់គ្រោះថ្នាក់

រយៈពេល៩ខែ ឆ្នាំនេះ គ្រោះថ្នាក់ចរាចរណ៍មានការថយចុះគួរឱ្យកត់សំគាល់ ខណៈការពង្រឹងច្បាប់ចរាចរណ៍នៅតែបន្ត ដើម្បីឈានទៅលុបបំបាត់គ្រោះថ្នាក់ចរាចរណ៍ឱ្យកាន់តែទាប ហើយបង្កើនសណ្តាប់ធ្នាប់ដល់ពលរដ្ឋនៅពេលធ្វើដំណើរក្នុងក្របខណ្ឌទូទាំងប្រទេស។ នេះជាការអះអាងរបស់អគ្គស្នងការនគរបាលជាតិ លោកនាយឧត្តមសេនីយ៍ ស ថេត នាព្រឹកថ្ងៃទី១៤ ខែកញ្ញា ឆ្នាំ២០២៣នេះ។

ក្នុងឱកាសដឹកនាំកិច្ចប្រជុំស្តីពីការបន្តអនុវត្តវិធានការរឹតបន្តឹងការអនុវត្តច្បាប់ចរាចរណ៍ផ្លូវគោក នាព្រឹកមិញ លោកនាយឧត្តមសេនីយ៍ ស ថេត បានថ្លែងឱ្យដឹងថា យោងតាមរបាយការណ៍អំពីស្ថានភាពគ្រោះថ្នាក់ចរាចរណ៍ពីមន្ត្រីជំនាញ គឺក្នុងរយៈពេល៩ខែ ឆ្នាំ២០២៣ មានការថយចុះគួរឱ្យកត់សំគាល់ បើប្រៀបធៀបរយៈពេលដូចគ្នា ក្នុងឆ្នាំ២០២២។ តែយ៉ាងណាមិញ លោកអគ្គស្នងការនគរបាលជាតិ បានអះអាងថា កិច្ចការងារពង្រឹងច្បាប់ចរាចរណ៍នៅតែបន្ត ដើម្បីកុំឱ្យប្រជាពលរដ្ឋនៅតាមបណ្តារាជធានី-ខេត្ត មានការស្រពិចស្រពិល ឬយល់ច្រឡំ ហើយអនុវត្តខុស ព្រោះថា ការរៀបចំច្បាប់ចរាចរណ៍ ជាកត្តាដ៏សំខាន់ណាស់ ដើម្បីលុបបំបាត់គ្រោះថ្នាក់ចរាចរណ៍ ហើយបង្កើនសណ្តាប់ធ្នាប់គ្រប់ពេលធ្វើដំណើរក្នុងក្របខណ្ឌទូទាំងប្រទេស។

ដើម្បីអនុវត្តច្បាប់ចរាចរណ៍ផ្លូវគោកក្នុងក្របខណ្ឌទូទាំងប្រទេសឱ្យកាន់តែល្អ និងមានប្រសិទ្ធភាពនោះ លោកនាយឧត្តមសេនីយ៍ ស ថេត បានណែនាំឱ្យក្រុមការងារត្រូវអប់រំផ្សព្វផ្សាយដល់ប្រជាពលរដ្ឋក្នុងមូលដ្ឋានឱ្យបានកាន់តែទូលំទូលាយ ហើយគ្រប់មន្ត្រីនគរបាលចរាចរណ៍ត្រូវអនុវត្តវិន័យឱ្យបានខ្ជាប់ខ្ជួន ដោយបំពេញការងារប្រកបដោយតម្លាភាព សុក្រិត្យភាព វិជ្ជាជីវៈ និងក្រមសីលធម៌។

បន្ថែមពីនេះ លោកនាយឧត្តមសេនីយ៍ ក៏បានណែនាំដល់ស្នងការនគរបាលខេត្ត ដែលមានរោងចក្រច្រើន ពិសេសមានកម្មករ កម្មការរិនីរោងចក្រច្រើន ត្រូវធ្វើយ៉ាងណាយកចិត្តទុកដាក់ខ្ពស់ក្នុងការសម្រួលការធ្វើដំណើររបស់ពួកគាត់ បើក្នុងករណីមានការធ្វេសប្រហែសនោះ នឹងបង្កឱ្យមានគ្រោះថ្នាក់ ហើយអាចឱ្យមានអ្នកស្លាប់ និងរបួសច្រើន។ ជាមួយគ្នានោះ លោក ក៏បន្តជំរុញឱ្យពង្រឹងការសម្រួលចរាចរណ៍ដល់សិស្សានុសិស្សនៅពេលចេញចូលសាលារៀនឱ្យបានជាប់ជាប្រចាំផងដែរ ចាប់ពីថ្នាក់ខេត្ត ស្រុក ខណ្ឌ ឃុំ សង្កាត់ ធ្វើយ៉ាងណាកុំឱ្យមានគ្រោះថ្នាក់៕