គ.ជ.ប បន្តជូនដំណឹងពីការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២៣

គណៈកម្មាធិការជាតិរៀបចំការបោះឆ្នោត ដែលហៅកាត់ថា (គ.ជ.ប) បានជូនដំណឹងដល់ប្រជាពលរដ្ឋថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២៣ ត្រូវចាប់ផ្ដើមពីថ្ងៃទី ១ ដល់ថ្ងៃទី ១៩ ខែតុលា ឆ្នាំ ២០២៣ នៅតាមសាលាឃុំ-សង្កាត់ និងនៅតាមភូមិមួយចំនួនក្នុងឃុំ-សង្កាត់។

សេចក្ដីជូនដំណឹងរបស់ គ.ជ.ប ដែលផ្សព្វផ្សាយជាថ្មី នៅថ្ងៃទី ២០ ខែកញ្ញា ឆ្នាំ ២០២៣នេះ បានឲ្យដឹងថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២៣ មានគោលដៅធានាឲ្យបញ្ជីឈ្មោះបោះឆ្នោតមានភាពពេញលេញ ភាពត្រឹមត្រូវ និងមានបច្ចុប្បន្នភាពប្រកបដោយសុវត្ថិភាព តាមរយៈការស្រង់ និងលុបឈ្មោះបោះឆ្នោត គឺក្នុងករណី៖ ទី១. អ្នកដែលបានទទួលមរណភាព ទី២. អ្នកដែលត្រូវដកសិទ្ធិបោះឆ្នោតបណ្ដោះអាសន្ន ទី៣. អ្នកដែលបានផ្លាស់ប្ដូរលំនៅឋាន ឬទីសំណាក់ចេញទៅឃុំ-សង្កាត់ផ្សេង ដោយមានឯកសារជាសំអាងត្រឹមត្រូវ និងច្បាស់លាស់ ដើម្បីលុបចេញពីបញ្ជីឈ្មោះបោះឆ្នោត។

មួយវិញទៀត គ.ជ.ប បានបញ្ជាក់ថា សម្រាប់ការកែតម្រូវឈ្មោះ ឬទិន្នន័យអ្នកបោះឆ្នោត ត្រូវធ្វើតាមសំណើរបស់សាមីខ្លួន ដោយផ្អែកលើឯកសារសំអាងត្រឹមត្រូវ។ ជាក់ស្ដែង ការចុះឈ្មោះបោះឆ្នោត ត្រូវសំដៅលើ៖ ទី១. ប្រជាពលរដ្ឋខ្មែរដែលមានសិទ្ធិបោះឆ្នោត ហើយមិនទាន់បានចុះឈ្មោះបោះឆ្នោតពីមុនមក ទី២. ប្រជាពលរដ្ឋខ្មែរដែលមានអាយុ ១៨ឆ្នាំឡើង (កើតមុន ឬកើតត្រឹមថ្ងៃទី ១ ខែមករា ឆ្នាំ ២០០៦) ទី៣. ប្រជាពលរដ្ឋខ្មែរដែលបានផ្លាស់ប្ដូរលំនៅឋាន ឬទីសំណាក់ចូលក្នុងឃុំថ្មី សង្កាត់ថ្មី ត្រូវទៅចុះឈ្មោះបោះឆ្នោត នៅតាមឃុំ-សង្កាត់ ដែលសាមីខ្លួនកំពុងរស់នៅ ឬស្នាក់អាស្រ័យនៅ។

សូមជម្រាបជូនថា ការពិនិត្យបញ្ជីឈ្មោះ និងការចុះឈ្មោះបោះឆ្នោតនេះ គឺពិតជាមានសារៈសំខាន់សម្រាប់ប្រជាពលរដ្ឋ ដែលត្រូវចុះឈ្មោះបោះឆ្នោតថ្មី និងប្រជាពលរដ្ឋផ្សេងទៀត ដែលត្រូវផ្លាស់ទីលំនៅទៅកាន់ទីកន្លែងថ្មីជាដើម៕

អត្ថបទ៖ សួស សិត