សម្តេចធិបតី ហ៊ុន ម៉ាណែត នឹងអញ្ជើញជួបសំណេះសំណាលជាមួយពលរដ្ឋខ្មែរ រស់នៅ អាមេរិកជាង ២,៥០០នាក់

តាមកម្មវិធីដែលបានគ្រោងទុក សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវ ពេជ ចន្ទមុន្នី ហ៊ុន ម៉ាណែត នឹងអញ្ជើញជួបសំណេះសំណាលជាមួយប្រជាពលរដ្ឋខ្មែរ រស់នៅសហរដ្ឋអាមេរិកជាង ២,៥០០ នាក់។

សូមជម្រាបថា យន្តហោះពិសេសរបស់ព្រះរាជាណាចក្រកម្ពុជា​ បានចុះចតប្រកបដោយសុវត្តិភាព នៅអាកាសយានដ្ឋានអន្តរជាតិ Newark Liberty កាលពីវេលាម៉ោង ៧ និង១៣នាទីយប់​ ថ្ងៃទី ២១ ខែកញ្ញា ឆ្នាំ ២០២៣ ម៉ោងនៅបុរីញ៉ូវយ៉ក​ សហរដ្ឋអាមេរិក ​​ត្រូវនឹងម៉ោង ៦និង ១៣នាទីព្រឹក ថ្ងៃទី ២២ ខែកញ្ញា​ ឆ្នាំ ២០២៣ ម៉ោងនៅព្រះរាជា ណាចក្រកម្ពុជា។

វត្តមាននៃការអញ្ជើញដល់របស់សម្តេចធិបតី ហ៊ុន ម៉ាណែត​ និងលោកជំទាវបណ្ឌិត​ ត្រូវបានទទួលការស្វាគមន៍យ៉ាងកក់ក្តៅបំផុត ពីសំណាក់លោកស្រី អ៊ាត សោភា ឯកអគ្គរាជទូតវិសាមញ និងពេញសមត្ថភាព នៃតំណាងអចិន្រ្តៃយ៍របស់ព្រះរាជាណាចក្រកម្ពុជា ព្រមទាំងលោក-លោកស្រី ជាឥស្សរជនការទូត តំណាងអចិន្រ្តៃយ៍របស់ព្រះរាជាណាចក្រកម្ពុជា ប្រចាំអង្គការសហប្រជាជាតិ ជាច្រើនរូប។

ក្នុងនោះដែរ វត្តមានទៅដល់របស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ត្រូវបានទទួលការស្វាគមន៍ ពីតំណាងប្រជាពលរដ្ឋខ្មែរ រស់នៅសហរដ្ឋអាមេរិក ជាច្រើនរូប។ ប្រជាពលរដ្ឋខ្មែរទាំងអស់ បានសម្ដែងការស្វាគមន៍យ៉ាងកក់ក្តៅបំផុត ចំពោះវត្តមានរបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ដែលបានអញ្ជើញមកាន់បុរីញ៉ូវយ៉ក ជាលើកដំបូង ដើម្បីថ្លែងសុន្ទរកថាគន្លឹ:ទៅកាន់កិច្ចពិភាក្សាទូទៅ នៃមហាសន្និបាតអង្គការសហប្រជាជាតិ លើកទី ៧៨។

តាមកម្មវិធីដែលបានគ្រោងទុក សម្តេចធិបតី ហ៊ុន ម៉ាណែត នាយករដ្ឋមន្រ្តី នឹងអអញ្ជើញថ្លែងសុន្ទរកថាគន្លឹ:ទៅកាន់កិច្ចពិភាក្សាទូទៅ នៃមហាសន្និបាតអង្គការសហប្រជាជាតិ នៅវេលាម៉ោង ៤ រសៀល ថ្ងៃទី ២២ ខែកញ្ញា ឆ្នាំ ២០២៣ ម៉ោងនៅបុរីញូយ៉ក ត្រូវនឹងម៉ោងប្រមាណ ៣ភ្លឺ ថ្ងៃទី ២៣ ខែកញ្ញា ឆ្នាំ ២០២៣ ម៉ោងនៅព្រះរាជាណាចក្រកម្ពុជា។

ជាមួយគ្នានេះ​ សម្តេចធិបតី ហ៊ុន​ ម៉ាណែត នឹងជួបពិភាក្សាទ្វេភាគីជាមួយអគ្គលេខាធិការអង្កការសហប្រជាជាតិ ប្រធានក្រុមប្រឹក្សាអឺរ៉ុប​ នាយករដ្ឋមន្រ្តីបង់ក្លាដែស រដ្ឋមន្រ្តីការបរទេសឥណ្ឌា អនុរដ្ឋមន្រ្តីស្តីទីការបរទេសអាមេរិក និងបណ្តាក្រុមហ៊ុនអាមេរិកជាច្រើនទៀត។

ក្រៅពីនោះសម្តេចធិបតី ហ៊ុន ម៉ាណែត នឹងធ្វើជំនួបជាមួយប្រធានមជ្ឈមណ្ឌលសម្រាប់ការអភិវឌ្ឍប្រកបដោយចីរភាព នៃសាកលវិទ្យាល័យ Columbia និងជាប្រធានផ្នែកដោះស្រាយការអភិវឌ្ឍដោយចីរភាព របស់អង្គការសហប្រជាជាតិ។ ពិសេសទៅទៀតនោះ សម្តេចធិបតី ហ៊ុន ម៉ាណែត និងលោកជំទាវបណ្ឌិត នឹងជួបសំណេះសំណាលដោយផ្ទាល់ជាមួយប្រជាពលរដ្ឋ សហគមន៍ខ្មែររស់នៅសហរដ្ឋអាមេរិក ប្រមាណជាង ២,៥០០នាក់៕