ព័ត៌មានជាតិ

កំពូលកីឡាការិនីស្នូកឃ័រកម្ពុជា ក្លាយជាទូតសុច្ឆន្ទៈអង្គការលំដាប់ពិភពលោកនៅប្រទេសកូរ៉េខាងត្បូង

បានផុស

៣ years មុន

នៅ

ថ្ងៃព្រហស្បតិ៍ ១៩ តុលា ២០២៣

ដោយ

អ្នកស្រី ស្រួង ភាវី ដែលជាកីឡាការិនីស្នូកឃ័រមួយរូប ពេលនេះត្រូវបានជ្រើសរើសឲ្យក្លាយទៅជាទូតសុច្ឆន្ទៈរបស់អង្គការ «ទាហានសម្រាប់ជួយសង្គ្រោះ» នៅប្រទេសកូរ៉េខាងត្បូង ដែលមានស្នាក់ការរហូតដល់ ១៣៤ ប្រទេសនៅជុំវិញពិភពលោក។

នៅលើទំព័រហ្វេសប៊ុក ជាផ្លូវការ នាថ្ងៃទី១៧ ខែតុលា នេះ អ្នកស្រី ស្រួង ភាវី បានឲ្យដឹងថា នេះគឺពិតមោនភាពមួយ ដែលអ្នកស្រីអាចឈានដល់មួយកម្រិតបន្ថែមទៀត ដោយត្រូវបានអង្គការដ៏ធំមួយលំដាប់ថ្នាក់ពិភពលោកនៃប្រទេសកូរ៉េខាងត្បូងជ្រើសរើសឲ្យធ្វើជាទូតសុច្ឆន្ទៈ។

អ្នកស្រីបានលើកឡើងថា «នេះជាមោទនភាពសម្រាប់ប្រជាជនខ្មែរយើងទាំងអស់ផងដែរ ដែលខ្ញុំជាជនជាតិខ្មែរម្នាក់ មានឱកាសធ្វើជទូតសុច្ឆន្ទៈរបស់អង្គការដ៏ធំលំដាប់ពិភពលោកមួយនេះ។ ជាកិត្តិយសសម្រាប់ខ្ញុំ ក៏ដូចជាកូនខ្មែរទាំងអស់ ដែលយើងជាជនបរទេសសោះរស់នៅក្នុងប្រទេសកូរ៉េ ហើយត្រូវបានអង្គការពិភពលោកដ៏ធំមានស្នាក់ការនៅប្រទេសកូរ៉េជ្រើសរើសឲ្យធ្វើជាទូតសុច្ឆន្ទៈរបស់អង្គការ»។

ទន្ទឹមនោះ អ្នកស្រី ស្រួង ភាវី ក៏បានអះអាងដែរថា រាល់ថវិកាទាំងអស់ដែលអ្នកនាងទទួលបាន នឹងយកដើម្បីទៅជួយដល់ប្រជាជនកម្ពុជា ជាពិសេសអ្នកដែលមានជំងឺបេះដូងចំហមកព្យាបាលនៅប្រទេសកូរ៉េ គឺអ្នកនាងមិនបានទៅទទូចសុំរៃអង្គាស ដល់អង្គការ សមាគម ក្រុមហ៊ុន ឬក៏ធនាគារនោះទេ។

អ្នកស្រីស្រួង ភាវី បានគូសបញ្ជាក់បន្ថែមថា «ខ្ញុំប្រើសុឆន្ទៈពិត បេះដូងពិត សមត្ថភាពពិត ដែលកើតចេញពីក្ដីស្រលាញ់ដ៏ជ្រាលជ្រៅរបស់ខ្ញុំ ដែលមានចំពោះជាតិ ប្រជាជន និងមាតុភូមិយើងទាំងមូល»៕