​​ជំនន់ទឹកស្ទឹងព្រែកត្នោតលិច​ផ្ទះពលរដ្ឋកើនដល់ជិត ១ 000 ខ្នង​ក្នុងខណ្ឌដង្កោ

គិតត្រឹមព្រឹកថ្ងៃទី ​២០ ខែតុលា ឆ្នាំ ២០២៣ នេះ ស្ថានភាពទឹកជំនន់តាមសណ្តស្ទឹងព្រែកត្នោត នៃមូលដ្ឋានខណ្ឌដង្កោបានកើនឡើងសន្សឹមៗ​បណ្ដាលឱ្យជន់លិចដែលមាន ៩ សង្កាត់ ស្មើ ៤១ភូមិ ដោយបានជន់លិចផ្ទះ ៩៣៣ខ្នង ដែលមាន ១០០៥ គ្រួសារ សរុបមនុស្ស ៣៧២៦នាក់។ នេះបើយោងតាមរបាយការណ៍របស់អាជ្ញាធរខណ្ឌដង្កោ។

លោក ស្រី គឹម ញិប អភិបាលខណ្ឌដង្កោ មិនទាន់អាចសុំការបញ្ជាក់បានទេ ខណៈនៅថ្ងៃទី ១៩ ខែតុលា លោកស្រី បានដឹកនាំកម្លាំងចម្រុះចុះត្រៀមនៅគោលដៅងាយរងគ្រោះ និងជួយសង្គ្រោះ ជួយជញ្ជូនអីវ៉ាន់ របស់បងប្អូនប្រជាពលរដ្ឋ ដែលបាននិងកំពុងរងគ្រោះដោយការជន់លិច។

លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយមមានប្រសាសន៍ថា ទឹកនៅផ្នែកខាងលើចាប់ផ្តើមស្រកហើយ បណ្តាទ្វារទឹកមួយចំនួនបានបិទទាំងស្រុងដូចជា ទ្វារទឹករបស់អាងទឹកតាសាល ចំណុច​ពាមឃ្លៃទឹកចាប់ផ្តើមស្រក ដោយឡែកទ្វារទឹករលាំងជ្រៃក៏បានទម្លាក់ទ្វាចុះដែរ ខណៈការប៉ះពាល់គឺកើតមានឡើងចំពោះប្រជាពលរដ្ឋដែលរស់នៅតាមសណ្ដស្ទឹងព្រែកត្នោត៕