តើការសិក្សាជំនាញព័ត៌មានវិទ្យា IT បច្ចុប្បន្ន ទទួលបានទីផ្សារការងារច្រើនដែរឬទេ?

បច្ចុប្បន្នគេសង្កេតឃើញថា មានយុវជន សិស្ស-និស្សិត ជាច្រើន បានសម្រុកនាំគ្នារៀនជំនាញ ព័ត៌មានវិទ្យា​ IT នៅតាមសាកលវិទ្យាល័យ ឬវិទ្យាស្ថាន ក្រោយប្រឡងចប់ថ្នាក់ទី១២។ យ៉ាងណាមិញ នេះគឺជាសញ្ញាល្អមួយ សម្រាប់ជំនាញបច្ចេកវិទ្យា ដែលសង្គមកំពុងមានតម្រូវការច្រើន ជាពិសេសក្រុមហ៊ុនតូចធំ សុទ្ធតែត្រូវការអ្នកអាយធី ដើម្បីធ្វើឱ្យអាជីវកម្មរបស់ពួកគេកាន់តែងាយស្រួលជាងមុន។

លោក ផូ សោភ័ណ្ឌ CEO​ ក្រុមហ៊ុនបច្ចេកវិទ្យា PHSAR TECH បានផ្ដល់បទសម្ភាសមកកាន់កម្ពុជាថ្មី ថា ទាក់ទងនឹងសំណួរ តើការសិក្សាជំនាញ ព័ត៌មានវិទ្យា IT សម្រាប់ពេលបច្ចុប្បន្ននេះ ទទួលបានទីផ្សារការងារ បានច្រើនដែរឬទេ? លោកថា​ សំណួរនេះ កើតមានតាំងពី ១០ឆ្នាំមុនមកម្លេះ អ្វីដែលអាចឆ្លើយបាននោះ លោកថា «មនុស្សមានការវិវត្តពីការប្រើប្រាស់ក្រដាសសម្រាប់ប្រាស្រ័យទាក់ទងគ្នា មកជាប្រើប្រាស់សារអេឡិចត្រូនិក សួរថា មួយណាមានភាពរហ័សជាង ប្រាកដណាស់គឺ សារអេឡិចត្រូនិក អ៊ីចឹងហើយ បច្ចេកវិទ្យាពិតជាមានសារៈសំខាន់ជាងគេ»។ លោក ផូ សោភ័ណ្ឌ បានបន្ថែមទៀតថា តាមពិតទៅ ជំនាញព័ត៌មានវិទ្យា IT មិនមែនមានតែសរសេរកូដ និងការបង្កើតកម្មវិធីតែមួយមុខនោះឡើយ។ ផ្ទុយទៅវិញ ការកាត់តវីដេអូ​ ឬឌីហ្សាញ សុទ្ធតែស្ថិតនៅក្នុងចំណោមបច្ចេកទេស ដែលជាតម្រូវការចាំបាច់នាពេលបច្ចុប្បន្ននេះ និងថ្ងៃអនាគតខាងមុខទៀត។​ អ្នកគ្រប់គ្រងរូបនេះ បានបន្តថា អ្វីដែលសំខាន់ជាងនេះទៅទៀតនោះ គឺជំនាញព័ត៌មានវិទ្យា IT នេះអាចទទួលបានប្រាក់ខែខ្ពស់ ទៅតាមបទពិសោធន៍ និងជំនាញរបស់បុគ្កលនោះខ្លូនឯង ហើយក៏អាស្រ័យទៅលើបុគ្គលនោះខ្លួនឯង តើស្រឡាញ់ជំនាញនេះបានកម្រិតណា​​ ហើយត្រូវដាក់គោលដៅសិក្សារៀនសូត្រជំនាញ IT ដោយការយកចិត្តទុកដាក់ និងស្វែងរកឱកាសការងារតាមបណ្តាក្រុមហ៊ុន ដែលត្រូវការជំនាញមួយនេះ។

លោក ផូ សោភ័ណ្ឌ បានផ្ដាំផ្ញើ និងលើកទឹកចិត្ត ដល់យុវជន ពិសេសប្អូនៗ សិស្ស-និស្សិត ទើបតែប្រឡងជាប់ ហើយមានបំណងបន្តការសិក្សា តែពុំមានលទ្ធភាពទិញកុំព្យូទ័រប្រើប្រាស់ តែចង់រៀន IT សាកល្បងវិធីសាស្រ្តដូចខាងក្រោម៖ទី១.សម្របនឹងធ្វើខ្លួនឱ្យដូចទឹកទន្លេមេគង្គ មានឡើង មានស្រក មានខុសមានត្រូវ អត់ឧបករណ៍ ប្រឡងទ្រឹស្ដីឱ្យជាប់ ជាមុនសិន។ ទី២.ចេះស្វែងរកឱកាស ទោះបីតូចស្ដួចស្ដើងយ៉ាងណា ក៏សន្សំដូចអ្នករែងមាសសន្សំប៉ុនចុងសក់ឡើង។ទី៣.ទទួលយកខ្លួនអ្នកជាខ្លួនឯងមកពីណា មានអត្តសញ្ញាណបែបណា? ប្រើប្រាស់ភាពខ្លាំងរបស់អ្នក ដើម្បីបង្កើតឱកាស ប្រើភាពខ្លាំងរបស់អ្នកដទៃ ដើម្បីការអភិវឌ្ឍ។ ពាក្យស្លោករបស់លោក ផូ សោភ័ណ្ឌ ចង់ចែករំលែកនោះគឺ «កុំព្រោះតែមូសតូចមួយក្បាល ធ្វើឱ្យដំណេករបស់អ្នកត្រូវបានរំខានពេញមួយយប់ កុំដោយសារតែកុំព្យូទ័រមួយគ្រឿង ធ្វើឱ្យក្ដីស្រម៉ៃជាអ្នកព័ត៌មានវិទ្យារបស់អ្នកត្រូវបានកប់ចោល ដោយមិនបានប្រើប្រាស់នាម ជាវិស្វករព័ត៌មានវិទ្យា»៕

អត្ថបទ ៖ សួស សិត