ទឹកក្នុងអាងកំពីងពួយជន់លិចផ្ទះពលរដ្ឋរាប់រយខ្នង ប៉ះពាល់​ស្រែចម្ការជាច្រើនហិកតា

ដំណាំស្រូវជាងមួយរយហិកតា និងផ្ទះពលរដ្ឋជិត ៣០០ ខ្នង ត្រូវបានទឹកជំនន់ដែលជនហៀរចេញពីអាងទឹកកំពីងពួយ លិចស្ទើរគ្មានសល់ ដែលបច្ចុប្បន្នអាជ្ញាធរមូលដ្ឋានកំពុងចុះពិនិត្យស្ថានភាពទឹក។

នៅព្រឹកថ្ងៃទី ៣១ ខែតុលា ឆ្នាំ២០២៣ លោកស្រេង សុខា អភិបាលនៃគណៈអភិបាលស្រុកបាណន់ និងលោក នៃ ពៅ មេឃុំតាគ្រាម ប៉ុស្តិនគរបាលតាគ្រាមនិងមេភូមិអន្លង់ស្វាយ បានចុះត្រួតពិនិត្យស្ថានភាពទឹកអាងកំពីងពួយដែល ហក់ឡើងខ្លាំង ដែលធ្វើ​ឲ្យ​ប៉ះពាល់ហេដ្ឋារចនាសម្ព័ន្ធជាច្រើនគឺ លិចផ្លូវបេតុងចំនួន ១ កន្លែងប្រវែង ១២០០ ម៉ែត្រ លិចផ្លូវគ្រួសក្រហម ៦ កន្លែងប្រវែង ៤៤៥០ ម៉ែត្រ និងលិចផ្ទះប្រជាពលរដ្នចំនួន ២៧១ ខ្នងផ្ទះ ស្មើនិង ៣៥០ គ្រួសារ លិចដំណាំស្រូវ ១០៥ ហិចតា និងដំណាំរួមផ្សំ ១៣ ហិចតា ស្ថិតនៅភូមិអន្លង់ស្វាយ ឃុំតាគ្រាម ដែលស្ថិតក្នុងចំណី អាងកំពីងពួយ៕

អត្ថបទ៖ សោ និយមរ័ត្ន