ជប៉ុន សន្យាផ្ដល់ការបណ្ដុះបណ្ដាលសមត្ថភាពមន្ត្រីអង្គភាពស៊ីម៉ាក់កម្ពុជា

មជ្ឈមណ្ឌលសកម្មភាពកំចាត់កម្ពុជា (CMAC) បានចុះកិច្ចព្រមព្រៀងសហប្រតិបត្តិការជាមួយភាគីជប៉ុន ក្នុងការផ្ដល់ជំនួយគាំទ្រការអភិវឌ្ឍធនធានមនុស្សកម្ពុជា ជាពិសេសផ្ដល់ការបណ្ដុះបណ្ដាលសមត្ថភាពមន្ត្រីជំនាញនៃសារមន្ទីរតេជោសន្តិភាព។ ពិធីចុះហត្ថលេខានេះ បានធ្វើឡើងគ្រាដែលប្រតិភូ CMAC ដឹកនាំដោយលោក ហេង រតនា ធ្វើទស្សនកិច្ចនៅប្រទេសជប៉ុន។

តាមរយៈបណ្ដាញសង្គមហ្វេសប៊ុករបស់លោក ហេង រតនា ប្រធានមជ្ឈមណ្ឌលសកម្មភាពកំចាត់កម្ពុជា (CMAC) បានឱ្យដឹងថា នៅថ្ងៃទី៦ ខែវិច្ឆិកា​ ឆ្នាំ២០២៣នេះ​ នៅសាលាក្រុងអូគីណាវ៉ា​ លោក និងអភិបាលក្រុងអូគីណាវ៉ា​ ព្រមទាំងប្រធានអង្គការ JICA ប្រចាំក្រុងអូគីណាវ៉ា និងសម្ព័ន្ធសារមន្ទីក្រុងអូគីណាវ៉ា​ បានចុះហត្ថលេខាលើកិច្ចព្រមព្រៀមសហប្រតិបត្តិការ​រួមគ្នានមួយស្ដីពីកិច្ចការមីន។

កិច្ចព្រមព្រៀងនេះ គឺភាគីជប៉ុន បានឯកភាពផ្តល់ជំនួយក្នុងការគាំទ្រអភិវឌ្ឍន៍ធនធានមនុស្សរបស់​កម្ពុជា។ គោលដៅសំខាន់នៃកិច្ចព្រមព្រៀងរវាងកម្ពុជា និងភាគីជប៉ុន នាពេលនេះ គឺផ្តល់ការបណ្តុះបណ្តាលពង្រឹងសមត្ថភាពមន្ត្រីជំនាញនៃសារមន្ទីរតេជោសន្តិភាព ខេត្តសៀមរាប រយៈពេល៣ឆ្នាំ (​២០២៤-២០២៦)។ កិច្ចសហប្រតិបត្តិការបណ្ដុះបណ្ដាលនេះ មន្ត្រីជំនាញនៃអង្គភាពសុីម៉ាក់ នឹងត្រូវបញ្ជូនទៅបណ្តុះបណ្តាលនៅសារមន្ទីរសន្តិភាពក្រុងអូគីណាវ៉ា ប្រទេសជប៉ុន​ ហើយក៏មានមន្ត្រីជំនាញរបស់ជប៉ុនមកពីក្រុងអូគីណាវ៉ា មកចូលរួមរៀបចំបណ្តុះបណ្តាលដោយផ្ទាល់នៅកម្ពុជាដែរ។

លោក ហេង រតនា បានចាត់ទុកការកសាងសមត្ថភាពធនធានមនុស្សប្រកបដោយវិជ្ជាជីវៈ និងទេពកោសល្យ ពិតជាមានសំខាន់ណាស់ ដើម្បីសម្រេចនូវគោលដៅនៃការអប់រំផ្សព្វផ្សាយអំពីតម្លៃសន្តិភាព​ និងធានាដល់ការសម្រេចបានទស្សនវិស័យអរគុណសន្តិភាព។ បើតាមលោកប្រធាន CMAC រូបនេះ ការកសាងអគារសារមន្ទីរ «តេជោសន្តិភាព» ក្នុងខេត្តសៀមរាប គឺដើម្បីរៀបចំដាក់បង្ហាញរូបភាព​ វត្ថុតាង​ និងឯកសារទាំងឡាយពាក់ព័ន្ធការស្វែងរកសន្តិភាពដោយលំបាក ជីវិតពិតនៃជនរងគ្រោះ ក៏ដូចកិច្ចការនៃសកម្មភាពកំចាត់មីននៅកម្ពុជា។

ក្នុងពេលទស្សនកិច្ចនៅក្រុងអូគីណាវ៉ានេះ លោក ហេង រតនា និងប្រតិភូនៃមជ្ឈមណ្ឌលជាតិសកម្មភាពកំចាត់កម្ពុជា (CMAC) ក៏បានទៅទស្សនាសារមន្ទីរចំនួន៣កន្លែង ដោយក្នុងនោះ សារមន្ទីរចំនួន២ គឺជាសារមន្ទីរសន្តិភាព​ របស់អាជ្ញាធរក្រុង និងមួយកន្លែងទៀត ជាសារមន្ទីរសន្តិភាព ដែលបង្កើតឡើង ដោយសហគមន៍ស្ត្រីជាអតីតសិស្សដែលជាអ្នកចូលរួមក្នុងសង្គ្រាម ហើយនៅរស់រានមានជីវិតនៅអូគីណាវ៉ា។

គួរជម្រាបថា ដោយមានការអនុញ្ញាតពីសម្តេចធិបតី​ ហ៊ុន ម៉ាណែត នាយករដ្ឋមន្ត្រីនៃកម្ពុជា លោក ហេង រតនា ប្រធានមជ្ឈមណ្ឌលសកម្មភាពកំចាត់មីនកម្ពុជា​ (CMAC) បានដឹកនាំគណៈប្រតិភូអង្គភាពសុីម៉ាក់ដេីម្បីបំពេញការងារនៅជប៉ុននេះ៕