ព័ត៌មានជាតិ

ឯកឧត្ដម ហ៊ុន ម៉ានី ទទួលជួបប្រតិភូ ស.ស.យ.ក ចំនួន ២០ រូប ដើម្បីស្ដាប់លទ្ធផលចូលរួមកម្មវិធីបណ្ដុះបណ្ដាលអ្នកដឹកនាំវ័យក្មេងកម្ពុជា

បានផុស

៣ years មុន

នៅ

ថ្ងៃអង្គារ ១៤ វិច្ឆិកា ២០២៣

ដោយ

នាថ្ងៃទី ១៤ ខែវិច្ឆិកា ឆ្នាំ ២០២៣ នេះ ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានទទួលជួបប្រតិភូ ស.ស.យ.ក ចំនួន ២០ រូប ដើម្បីស្តាប់របាយការណ៍សង្ខេបអំពីលទ្ធផល នៃការចូលរួមកម្មវិធីបណ្ដុះបណ្ដាលអ្នកដឹកនាំវ័យក្មេងកម្ពុជា ក្រោមប្រធានបទ“នវានុវត្តន៍ និងសហគ្រិនភាពក្នុងយុគសម័យឌីជីថល” នៅខេត្តក្វាងស៊ី និងទីក្រុងប៉េកាំង នៃសាធារណរដ្ឋប្រជាមានិតចិន កាលពីថ្ងៃទី ០៧ ដល់ថ្ងៃទី ១៨ ខែតុលា ឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពីស្តាប់របាយការណ៍ ឯកឧត្ដម ហ៊ុន ម៉ានី បានកោតសរសើរ និងវាយតម្លៃខ្ពស់ដល់ថ្នាក់ដឹកនាំ និងគណៈប្រតិភូទាំងអស់ ដែលខិតខំប្រឹងប្រែងក្នុងការចាប់យកចំណេះជំនាញថ្មីតាមរយៈកម្មវិធីបណ្ដុះបណ្ដាលនៅប្រទេសចិន រយៈពេលជាង ១០ ថ្ងៃនេះ។

ទន្ទឹមនោះ ឯកឧត្ដម ហ៊ុន ម៉ានី ក៏បានផ្តល់អនុសាសន៍បន្ថែមឲ្យគណៈប្រតិភូបន្តទំនាក់ទំនងជាមួយភាគីចិន ដើម្បីបន្តកិច្ចសហការប្រតិបត្តិការរួមគ្នា និងផ្សារភ្ជាប់ទំនាក់ទំនងរវាងយុវជនកម្ពុជា-ចិន ទៅលើគម្រោងផ្សេងៗ សម្រាប់យុវជនជំនាន់ក្រោយនាពេលអនាគតផងដែរ។

គួរជម្រាបថា កម្មវិធីនេះ បានរៀបចំ និងគាំទ្រដោយសហព័ន្ធយុវជនទូទាំងប្រទេសចិន (All-China Youth Federations) គោលបំណងពង្រឹងការផ្លាស់ប្ដូរ និងកិច្ចសហប្រតិបត្តិការរួមគ្នា ក្នុងការជំរុញឲ្យមានការអភិវឌ្ឍទំនាក់ទំនង រវាងយុវជនកម្ពុជា និងយុវជនចិន៕