សម្ដេចធិបតី គ្រោងជួបប្រជុំជាមួយឧត្តមក្រុមប្រឹក្សាពិគ្រោះយោបល់​ នៅដើមខែក្រោយនេះ

នៅថ្ងៃទី៦ ខែធ្នូ ឆ្នាំ២០២៣ ខាងមុខ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា គ្រោងអញ្ជើញបើកកិច្ចប្រជុំជាលើកដំបូងជាមួយប្រតិភូនៃឧត្តមក្រុមប្រឹក្សាពិគ្រោះ និងផ្ដល់យោបល់ នៅវិមានសន្តិភាព។ នេះបើតាមសេចក្ដីប្រកាសព័ត៌មានរបស់លេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់ នៅថ្ងៃទី២០ ខែវិច្ឆិកានេះ។

លេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់ តាមរយៈសេចក្ដីប្រកាសព័ត៌មានរបស់ខ្លួន នាថ្ងៃនេះ បានឱ្យដឹងថា ឧត្តមក្រុមប្រឹក្សាពិគ្រោះ និងផ្តល់យោបល់ នឹងបើកកិច្ចប្រជុំលើកដំបូង ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី៦ ខែធ្នូ ឆ្នាំ២០២៣ នៅវិមានសន្តិភាព។

កិច្ចប្រជុំជាលើកដំបូងរវាងសម្ដេចធិបតី ហ៊ុន ម៉ាណែត ជាមួយឧត្តមក្រុមប្រឹក្សាពិគ្រោះ និងផ្ដល់យោបល់ នៅដើមខែក្រោយនេះ នឹងមានការថ្លែងសុន្ទរកថាបើករបស់សម្ដេចធិបតី ហ៊ុន ម៉ាណែត ដោយនឹងលើកឡើងនូវចក្ខុវិស័យនៃការរួមចំណែករបស់ឧត្តមក្រុមប្រឹក្សាពិគ្រោះ និងផ្តល់យោបល់ ដែលជាយន្តការពហុគំនិតក្រៅរដ្ឋសភា ក្នុងការលើកស្ទួយប្រជាធិបតេយ្យសេរីពហុបក្ស។ ក្នុងឱកាសនោះ ក៏បានបើកឱ្យមានការថ្លែងមតិរបស់ប្រធានប្រតិភូគណបក្សនីមួយៗ ដែលជាសមាជិកនៃឧត្តមក្រុមប្រឹក្សាពិគ្រោះ និងផ្ដល់យោបល់ ហើយបន្ទាប់មក នឹងមានពិធីពិសាភោជនាអាហារសាមគ្គីរវាងសម្ដេចធិបតី និងបណ្ដាប្រតិភូទាំងអស់។  

យោងតាមសេចក្ដីប្រកាសព័ត៌មានដដែលនេះ ក្រោយបញ្ចប់កិច្ចប្រជុំដ៏មានសារសំខាន់នេះ លោកបណ្ឌិត ឈឹម ផលវរុណ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្ដល់យោបល់ នឹងធ្វើសន្និសីទកាសែត នាឱកាសនោះផងដែរ។

គួរជម្រាបថា កាលពីថ្ងៃទី៣១ ខែតុលា ឆ្នាំ២០២៣ កន្លងទៅ សមាសភាពឧត្ដមក្រុមប្រឹក្សាពិគ្រោះ និងផ្ដល់យោបល់ សម្រាប់អាណត្តិថ្មីនេះ ដែលមានចំនួន១៤៥រូប មកពីគណបក្សនយោបាយចំនួន២៩ ត្រូវបានព្រះករុណា ព្រះមហាក្សត្រនៃកម្ពុជា តែងតាំងជាផ្លូវការ ដោយក្នុងនោះ ប្រធានប្រតិភូនៃគណបក្សនីមួយៗមានឋានៈស្មើទេសរដ្ឋមន្ត្រី ខណៈប្រតិភូ អមចំនួន៤រូបទៀត មានឋានៈពីអគ្គនាយក អនុរដ្ឋលេខាធិការ រដ្ឋលេខាធិការ និងរដ្ឋមន្ត្រី។ ជាមួយគ្នានេះ អនុក្រឹត្យរបស់សម្ដេចធិបតី ហ៊ុន ម៉ាណែត ក៏បានសម្រេចតែងតាំងមន្ត្រីជាជំនួយការប្រធានប្រតិភូចំនួន២៩រូបថែមទៀត មានឋានៈស្មើអគ្គនាយករង៕

ដោយ៖ ធឿន វ៉ាន់សុង