ព័ត៌មានជាតិ

មកស្គាល់ឈ្មោះក្រុមហ៊ុនធំៗវិនិយោគវិស័យកសិកម្មក្នុងខេត្តកំពតមានទាំងក្នុងស្រុក និងក្រៅស្រុក

បានផុស

២ years មុន

នៅ

ថ្ងៃអង្គារ ២៦ ធ្នូ ២០២៣

ដោយ

គិតត្រឹមឆ្នាំ២០២៣ មានក្រុមហ៊ុនសម្បទានដីសេដ្ឋកិច្ចក្នុងខេត្តកំពតចំនួន ៤ ក្រុមហ៊ុន បានចូលខ្លួនមកវិនិយោគវិស័យកសិកម្មសម្រាប់នាំចេញទៅកាន់ទីផ្សារក្នុង-ក្រៅស្រុក។ នេះបើតាមលោក ហូង សំបូរ ប្រធានការិយាល័យកសិ-ឧស្សាហកម្មខេត្តកំពតបានថ្លែងប្រាប់កម្ពុជាថ្មី។

ក្រៅពីក្រុមហ៊ុនដែលទទួលបានដីសម្បទានសេដ្ឋកិច្ចវិនិយោគលើដំណាំកសិកម្ម ខេត្តកំពតក៏មានក្រុមហ៊ុនខ្នាតធំៗមួយចំនួនទៀតដែលវិនិយោគលើការដាំដុះដំណាំផ្សេងៗដើម្បីនាំចេញទៅក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងមកកាន់ «កម្ពុជាថ្មី» តាមប្រព័ន្ធតេឡេក្រាម លោក ហូង សំបូរ បានឲ្យដឹងថា គិតត្រឹមឆ្នាំ២០២៣ ខេត្តកំពតទទួលបានក្រុមហ៊ុនវិយោគសម្បទានដីសេដ្ឋកិច្ចសំខាន់ៗចំនួន ៤ ក្រុមហ៊ុន ក្នុងនោះក្រុមហ៊ុនវិនិយោគក្នុងស្រុក ចំនួន ២ និងក្រៅស្រុកចំនួន ២។

ក្រុមហ៊ុនវិនិយោគក្នុងស្រុកចំនួន ២ មាន៖

ក្រុមហ៊ុន ហ្វឺស បាយអូ-ថេក អេហ្គ្រីខលឈើរ័ល ខេមបូឌា បានចូលមកវិនិយោគក្នុងឆ្នាំ២០០៥ លើការដាំដុះដំណាំស្វាយចន្ទី។ ជាក់ស្ដែងក្នុងឆ្នាំ២០២៣ នេះ ក្រុមហ៊ុនអាចប្រមូលផលបានបរិមាណសរុប ៥២២តោន សម្រាប់ការលក់ក្នុងស្រុកដោយឈ្មួញមកទិញដល់ក្រុមហ៊ុន ដែលគិតជាមធ្យមតម្លៃ ៤ ៣០០ ០០០រៀល/តោន។

ក្រុមហ៊ុន កាឡាក់ស៊ីណាវាត្រា គ្រុប ឯ.ក បានចូលមកវិនិយោគក្នុងឆ្នាំ២០២១ ទើបទទួលបាន ស.ជ.ណ ពីរាជរដ្ឋាភិបាលក្នុងឆ្នាំ២០២១ ប៉ុន្តែនៅមិនទាន់បានដាំដុះនៅឡើយទេ។

ក្រុមហ៊ុនវិនិយោគក្រៅស្រុកចំនួន ២ រួមមាន៖

ក្រុមហ៊ុន ខេមទ្រី ខបភើរេសិន ក្រុមហ៊ុនរបស់ប្រទេសអ៊ីស្រាអែល បានចូលមកវិនិយោគក្នុងឆ្នាំ២០១០។ បច្ចុប្បន្ន ក្រុមហ៊ុនបានវិនិយោគលើការដាំដុះដំណាំអាកាស្យា ដោយក្នុងឆ្នាំ២០២៣ ទទួលបានបរិមាណផល ១៨០ ស្ទែរ (ស្ទែរ=១.៣ម៉ែត្រគូប)។

ក្រុមហ៊ុន វើធើស ហ្គ្រីន ផ្លេនថេសិន (ខេមបូឌា) ភីធីអី អិលធីឌី ជាក្រុមហ៊ុនរបស់ប្រទេសម៉ាឡេស៊ី ចូលមកក្នុងឆ្នាំ២០១១ និងបានដាំដំណាំដូងប្រេងនៅក្នុងខេត្ត។ បរិមាណផលផ្លែដូងប្រេងក្រុមហ៊ុនមិនបានលក់ទៅណាឡើយ គឺក្រុមហ៊ុនមានរោងចក្រចម្រាញ់ប្រេងដូងពាក់កណ្ដាលសម្រេចលក់ក្នុងស្រុក (មិនទាន់មាននាំចេញទៅលក់ក្រៅប្រទេសទេ)។ ក្នុងឆ្នាំ២០២៣ នេះ ក្រុមហ៊ុន ម្រេចបានបរិមាណ(ជាផ្លែ ) ៣២ ០០០តោន ប្រេងឆៅកិនបាន ៣៩៥៧.៤៤ តោន។ លក់ទីផ្សារក្នុងស្រុកបានចំនួន ៣០០០ តោន។ ស្តុកក្នុងស៊ីទែន ៩៥៧.៤៤តោន។ លក់គិតជាតោន ដែលមានតម្លៃជាមធ្យម ៨០០ដុល្លារក្នុងមួយតោនផងដែរ។ សូមបញ្ជាក់ថា ចំពោះបរិមាណ ៣២០០០តោន មិនបានយកទៅកិនជាប្រេងឆៅទាំងអស់ទេ។

ដោយឡែក ចំពោះក្រុមហ៊ុនចំនួន ២ មានក្រុមហ៊ុន Longmate Agriculture co. ltd (ហ៊ុន ឡាក់) និង ក្រុមហ៊ុន World Tristar Entertainment Cambodia (សូ ងួន) បានធ្វើការដាំដុះចេកអំបូងលឿង ប៉ុន្តែមិនស្ថិតក្រោមការគ្រប់គ្រងរបស់មន្ទីរកសិកម្ម រុក្ខាប្រមាញ់ និងនេសាទខេត្ត (មិនមែនជាក្រុមហ៊ុនសម្បទានដីសេដ្ឋកិច្ច) ឡើយ។

លោក ហូង សំបូរ គូសបញ្ជាក់ថា ក្រុមហ៊ុនខាងលើមិនស្ថិតក្រោមការគ្រប់គ្រងរបស់មន្ទីរកសិកម្មទេ ប៉ុន្តែបើតាមទិន្នន័យដែលក្រុមការងារមន្ទីរចុះទៅសាកសួរកន្លងមក បច្ចុប្បន្នផ្ទៃដីដាំដុះចេកអំបូងលឿងក្នុងខេត្តមានផ្ទៃដីដាំដុះសរុប ១ ៤០៣ហ.ត ផ្ទៃដីប្រមូលផល ១ ៣២០ហ.ត អាចទទួលបានទិន្នផល ៤៣តោន/ហ.ត និងបរិមាណផល ៥៧ ១៩៥តោន។

ក្នុងនោះដែរ ក្រុមហ៊ុន Longmate Agriculture co. ltd (ហ៊ុន ឡាក់) មានផ្ទៃដីដាំដុះ ៤១១ ហ.ត និងផ្ទៃដីប្រមូលផល ៤១១ហ.ត ដែលទទួលបានទិន្នផល ៣៣តោន/ហ.ត និងបរិមាណផល ១៣ ៥៦៣តោន។ និងក្រុមហ៊ុន World Tristar Entertainment Cambodia (សូ ងួន) បានធ្វើការដាំដុះចេកអំបូងលឿងលើផ្ទៃដីសរុបប្រមាណ ៩៩២ហ.ត ផ្ទៃដីប្រមូលផល ៩០៩ហ.ត ទទួលបានទិន្នផល ៤៨តោន/ហ.ត និងបរិមាណផល ៤៣ ៦៣២តោន។

លោក ហូង សំបូរ ក៏បានអះអាងដែរថា កត្តាដែលធ្វើឲ្យក្រុមហ៊ុននានាសម្រេចចូលមកវិនិយោគក្នុងខេត្តកំពត ដោយសាររាជរដ្ឋាភិបាលមានចក្ខុវិស័យក្នុងការអភិវឌ្ឍន៍វិស័យកសិកម្មដើម្បីជម្រុញកំណើនសេដ្ឋកិច្ចជាតិ។ ដោយឡែកក៏ដោយសារមានការសហការពីអាជ្ញាធរមូលដ្ឋាន រួមទាំងភូមិសាស្រ្តដីសមស្របសម្រាប់ដាំដុះ ហេដ្ឋារចនាសម្ព័ន្ធផ្លូវ ភ្លើង និងប្រភពទឹកមានគ្រប់គ្រាន់សម្រាប់ប្រើប្រាស់ សំបូរកម្លាំងពលកម្ម៕