ព័ត៌មានជាតិ

ទីតាំងថ្នាលបណ្ដុះកូនឈើខ្នាតអន្តរជាតិ ៤ កន្លែង គ្រោងរៀបចំជាគោលដៅទាក់ទាញអ្នកទេសចរ

បានផុស

៦ ខែ មុន

នៅ

ថ្ងៃព្រហស្បតិ៍ ១៨ មករា ២០២៤

ដោយ

ក្រសួងបរិស្ថានគ្រោងរៀបចំទីតាំងលេងកម្សាន្ត នៅកន្លែងដែលមានរៀបចំថ្នាលបណ្តុះកូនឈើខ្នាតអន្តរជាតិទាំង ៤ខេត្ត ឲ្យក្លាយទៅជាកន្លែងទេសចរដែលអាចទាក់ទាញភ្ញៀវទេសចរជាតិ-អន្តរជាតិទៅលេងកម្សាន្ត ដើម្បីអាចឲ្យពលរដ្ឋរស់នៅតំបន់នោះអាចរកប្រាក់ចំណូលសម្រាប់ផ្គត់ផ្គង់ជីវភាពគ្រួសារ។ នេះជាការគូសបញ្ជាក់របស់លោក អ៊ាង សុផល្លែត រដ្ឋមន្ត្រីក្រសួងបរិស្ថាន នាថ្ងៃទី១៧ ខែមករា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសអនុញ្ញាតឲ្យសមាគមអ្នកស្រឡាញ់បរិស្ថាន និងសង្គម ចូលជួបសម្តែងការគួរសម លោក អ៊ាង សុផល្លែត មានប្រសាសន៍ថា តាមរយៈយុទ្ធសាស្ត្រចក្រាវិស័យបរិស្ថាន គឺទិសដៅអាទិភាពរួមចំណែកលើកស្ទួយជីវភាពប្រជាសហគមន៍ឲ្យចាកផុតពីភាពក្រីក្រ តាមរយៈជំហានចម្បងៗដែលរួមមាន ការរៀបចំថ្នាលបណ្តុះកូនឈើខ្នាតអន្តរជាតិចំនួន ៤ កន្លែង ស្ថិតនៅខេត្តកំពង់ស្ពឺ កោះកុង/កំពង់សោម ត្បូងឃ្មុំ និងខេត្តសៀមរាប ដែលអាចមានសមត្ថភាពបណ្តុះកូនឈើយ៉ាងតិចជាង ១ លានដើម។

ចំពោះទីតាំងបណ្តុះកូនឈើទាំង ៤ កន្លែង រដ្ឋមន្ត្រីក្រសួងបរិស្ថាន សង្កត់ធ្ងន់ថា គ្រោងរៀបចំជាទីតាំងកម្សាន្ត និងបោះតង់ ទុកឲ្យប្រជាពលរដ្ឋក្នុងតំបន់អាចរកចំណូលតាមរយៈការយកថ្លៃសេវាកម្ម ពីភ្ញៀវទេសចរដោយអនុវត្តនូវគោលការណ៍ស្អាតតម្លៃសមរម្យស្របតាមយុទ្ធសាស្រ្តចក្រាវិស័យបរិស្ថាន ស្អាត បៃតង និងចីរភាព ដែលកំពុងផ្សព្វផ្សាយ និងអនុវត្តយ៉ាងសកម្ម ដើម្បីជំរុញឲ្យកម្ពុជាក្លាយជាប្រទេសអព្យាក្រឹតកាបូននៅឆ្នាំ២០៥០។

ទីតាំងរៀបចំថ្នាលបណ្តុះកូនឈើខ្នាតអន្តរជាតិចំនួន ៤ កន្លែង បើតាមលោករដ្ឋមន្ត្រី បណ្តុះកូនឈើ ៣ ប្រភេទ ទី១ កូនឈើសម្រាប់ចែកជូនប្រជាពលរដ្ឋ និងសិស្សានុសិស្សយកទៅដាំ ទី២ បណ្តុះជាឈើជំទង់ និងទី៣ បណ្តុះកូនឈើឲ្យក្លាយជាដើមឈើធំៗសម្រាប់លក់ជូនក្រុមហ៊ុន ឬស្ថាប័ន ដែលមានតម្រូវការដាំឈើលំអក្នុងបូរី ឬទីកន្លែងសាធារណៈនានា។

ឆ្លើយតបការលើកឡើងរបស់រដ្ឋមន្ត្រីក្រសួងបរិស្ថាន លោក ជុំ ហួត ប្រធានសមាគមអ្នកស្រឡាញ់បរិស្ថាន និងសង្គម បានប្តេជ្ញាចិត្តចូលរួមសហការជាមួយក្រសួងបរិស្ថាន ដើម្បីផ្តល់ប្រយោជន៍ជូនប្រជាពលរដ្ឋកម្ពុជា ជាពិសេសការផ្សព្វផ្សាយអំពីយុទ្ធនាការនានា ដូចជាយុទ្ធនាការកាត់បន្ថយថង់ប្លាស្ទិក និងយុទ្ធនាការដាំដើមឈើឲ្យច្រើនជាងការកាប់ រួមទាំងវិធានការ ៤ ចំណុច ទប់ស្កាត់បទល្មើសធនធានធម្មជាតិ ដែលក្រសួងបរិស្ថានបានដាក់ចេញ ដើម្បីបង្កើនគម្របព្រៃឈើកម្ពុជា ឲ្យបានចំនួន ៦០% នៅឆ្នាំ២០៥០៕